ചിക്കൻ കഴിക്കാൻ ഇനി പോക്കറ്റ് കീറും! ഒരാഴ്ച കൊണ്ട് കൂടിയത് 40 രൂപ
കേരളത്തിൽ അടുത്തിടെയായി കോഴിയിറച്ചി വിലയിലുണ്ടായ കുതിച്ചുചാട്ടം സാധാരണക്കാരുടെയും ഹോട്ടൽ വ്യാപാരികളുടെയും ബജറ്റുകളെ പാടെ തെറ്റിച്ചിരിക്കുകയാണ്. ഒരാഴ്ചയ്ക്കുള്ളിൽ മാത്രം കിലോയ്ക്ക് നാൽപ്പത് രൂപയോളമാണ് വർദ്ധിച്ചത്. നിലവിൽ ഇടുക്കി ഉൾപ്പെടെയുള്ള സംസ്ഥാനത്തെ പ്രധാന വിപണികളിൽ കോഴി വില 165 രൂപ മുതൽ 175 രൂപ വരെയായി ഉയർന്നു കഴിഞ്ഞു. കേരളത്തിലേക്ക് പ്രധാനമായും ഇറച്ചിക്കോഴി എത്തുന്ന തമിഴ്നാട്ടിലെ ഫാമുകളിൽ അനുഭവപ്പെടുന്ന കനത്ത ചൂടാണ് ഈ പ്രതിസന്ധിക്ക് പ്രധാന കാരണം. കടുത്ത ചൂട് മൂലം ഫാമുകളിൽ കോഴികൾ വ്യാപകമായി ചത്തുപോകുന്നതും ഉൽപാദനം പകുതിയോളമായി കുറഞ്ഞതും വിപണിയിൽ വലിയ തോതിൽ ക്ഷാമം സൃഷ്ടിച്ചിട്ടുണ്ട്. ഇതിന് പുറമെ, നിലവിലെ സാഹചര്യം മുതലെടുത്ത് വൻകിട വ്യാപാരികൾ പൂഴ്ത്തിവെപ്പ് നടത്തുന്നതായും വിപണിയിലേക്ക് ആവശ്യത്തിന് ലോഡുകൾ എത്തിക്കാതെ വില കൃത്രിമമായി ഉയർത്താൻ ശ്രമിക്കുന്നതായും ആക്ഷേപമുണ്ട്.ഈ വിലക്കയറ്റം ഏറ്റവും കൂടുതൽ ബാധിച്ചിരിക്കുന്നത് ഹോട്ടൽ, കേറ്ററിങ് മേഖലകളെയാണ്. നിലവിലുള്ള പാചകവാതക ക്ഷാമത്തിന് പിന്നാലെ കോഴി വിലയും കൂടിയായതോടെ ഹോട്ടലുകൾ കനത്ത നഷ്ടത്തിലാണ് മുന്നോട്ട് പോകുന്നത്. ഇതേ അവസ്ഥ തുടർന്നാൽ മെനുവിൽ നിന്ന് ചിക്കൻ വിഭവങ്ങൾ താത്കാലികമായി ഒഴിവാക്കേണ്ടി വരുമെന്ന ആശങ്കയിലാണ് ഹോട്ടലുടമകൾ. വിവാഹങ്ങളും മറ്റ് ആഘോഷങ്ങളും സജീവമായ ഈ സീസണിൽ കേറ്ററിങ് നടത്തുന്നവരും മുൻകൂട്ടി ഉറപ്പിച്ച തുകയ്ക്ക് ഓർഡറുകൾ പൂർത്തിയാക്കാൻ കഴിയാതെ ബുദ്ധിമുട്ടുന്നുണ്ട്. വരും ദിവസങ്ങളിൽ തമിഴ്നാട്ടിലും കേരളത്തിലും വേനൽമഴ ലഭിച്ച് ചൂട് കുറഞ്ഞാൽ മാത്രമേ കോഴി ഉൽപാദനം സാധാരണ നിലയിലാകുകയുള്ളൂ എന്നും, എങ്കിൽ മാത്രമേ വിലയിൽ കാര്യമായ കുറവുണ്ടാകൂ എന്നുമാണ് വ്യാപാരികൾ പ്രതീക്ഷിക്കുന്നത്.
റെയിൽവേ സ്റ്റേഷനുകൾ വരുന്നു പൊരിച്ച കോഴിയും, കോച്ച് റസ്റ്ററന്റുകളും
റെയിൽവേ സ്റ്റേഷനുകളിൽ ഇനി രുചികരമായ പൊരിച്ച കോഴിയും! യാത്രക്കാർക്ക് പുതുമയേറിയ ഭക്ഷണ അനുഭവം നൽകാൻ റെയിൽവേ ഒരുങ്ങുന്നു. ഷൊർണൂർ, തിരൂർ, കോഴിക്കോട്, വടകര, തലശ്ശേരി, കണ്ണൂർ, കാഞ്ഞങ്ങാട്, മംഗളൂരു സെൻട്രൽ എന്നീ എട്ടു സ്റ്റേഷനുകളിൽ പ്രമുഖ ആഗോള ബ്രാൻഡുകളുടെ ചിക്കൻ വിഭവങ്ങൾ ലഭ്യമാകും. ടിക്കറ്റിതര വരുമാനം വർദ്ധിപ്പിക്കാനും സ്റ്റേഷനുകളെ വൈവിധ്യവത്കരിക്കാനുമുള്ള റെയിൽവേയുടെ പുതിയ ചുവടുവെപ്പാണിത്.സ്റ്റേഷനുകളുടെ മുഖച്ഛായ മാറ്റുന്നതിന്റെ ഭാഗമായി കണ്ണൂർ ഉൾപ്പെടെയുള്ള 18 സ്റ്റേഷനുകളിൽ എടിഎം മെഷീനുകൾ ഇതിനകം പ്രവർത്തനക്ഷമമായിക്കഴിഞ്ഞു. ഐസ്ക്രീം പാർലറുകൾ, പലചരക്ക് കടകൾ, ചെരുപ്പുകടകൾ, ഗിഫ്റ്റ് ഷോപ്പുകൾ, മൊബൈൽ സ്റ്റോറുകൾ, ബ്യൂട്ടി പാർലറുകൾ തുടങ്ങിയവയും ഉടൻ തന്നെ സ്റ്റേഷനുകളിൽ എത്തുന്നതാണ്.യാത്രക്കാർക്ക് ഏറെ കൗതുകകരമായ ‘കോച്ച് റസ്റ്ററന്റുകളും’ റെയിൽവേ സ്റ്റേഷനുകളിൽ തരംഗമാകുകയാണ്. പയ്യന്നൂർ, പാലക്കാട് ടൗൺ സ്റ്റേഷനുകളെ തുടർന്ന് കോഴിക്കോട് സ്റ്റേഷനിലും കോച്ച് റസ്റ്ററന്റ് ഉടൻ ആരംഭിക്കും. പഴയ റെയിൽവേ കോച്ചുകൾ ഭക്ഷണശാലകളായി മാറ്റുന്ന ഈ പദ്ധതിക്കായി കോഴിക്കോട്ട് ടെൻഡർ നടപടികൾ പൂർത്തിയായിട്ടുണ്ട്. ഏകദേശം 40 ലക്ഷം രൂപ ചെലവിൽ പയ്യന്നൂരിൽ നിർമ്മാണം പുരോഗമിക്കുന്ന കോച്ച് റസ്റ്ററന്റ് പദ്ധതി ഉടൻ തന്നെ യാഥാർത്ഥ്യമാകും.
ഛത്തീസ്ഗഢിലെ സുർഗുജയിൽ നിന്ന് പുറത്തുവന്ന ഹൃദയഭേദകമായ ദൃശ്യം രാജ്യത്തിന്റെ വിവിധ ഭാഗങ്ങളിൽ നിന്നുള്ള വയോധികരുടെ ദയനീയമായ അവസ്ഥയിലേക്ക് വിരൽ ചൂണ്ടുന്നതാണ്.
. 90 വയസ്സുകാരിയായ അമ്മായിയമ്മയെ 500 രൂപയുടെ പെൻഷൻ ലഭിക്കുന്നതിനായി കെ.വൈ.സി വിവരങ്ങൾ നൽകാൻ 50-കാരിയായ മരുമകൾ ചുമന്ന് മൂന്ന് കിലോമീറ്റർ ബാങ്കിലെത്തിച്ചത് വലിയ ചർച്ചകൾക്ക് വഴിവെച്ചിരിക്കുകയാണ്. സാങ്കേതികവിദ്യയുടെ മുന്നേറ്റത്തിൽ ഡിജിറ്റൽ ഇന്ത്യയെക്കുറിച്ച് അഭിമാനിക്കുമ്പോഴും, ഉൾനാടൻ ഗ്രാമങ്ങളിലെ വയോധികർക്ക് അത് എത്രത്തോളം ഉപകാരപ്രദമാണ് എന്നത് ചോദ്യമുയർത്തുന്നു. കിടപ്പിലായവർക്കും നടക്കാൻ പ്രയാസമനുഭവിക്കുന്നവർക്കും വീട്ടിലെത്തി സേവനങ്ങൾ നൽകാൻ സംവിധാനങ്ങൾ ഉണ്ടെങ്കിലും അത് കൃത്യമായി നടപ്പിലാകുന്നില്ല എന്നതിന്റെ തെളിവാണ് ഈ സംഭവം. അതേസമയം, സ്വന്തം രക്തത്തിൽ പിറന്നവരല്ലെങ്കിലും അമ്മായിയമ്മയോട് മരുമകൾ കാണിച്ച സ്നേഹവും കരുണയും എല്ലാവർക്കും ഒരു പാഠമാണ്. എന്നാൽ, ഇത് ഒരു ഒറ്റപ്പെട്ട സംഭവമല്ല എന്നും, രാജ്യത്തിന്റെ വിവിധ ഭാഗങ്ങളിൽ പെൻഷൻ, റേഷൻ, മരുന്ന് എന്നിവയ്ക്കായി ഇത്തരത്തിൽ നെട്ടോട്ടമോടുന്ന വയോധികരുണ്ട് എന്നും അധികൃതർ മനസ്സിലാക്കേണ്ടതുണ്ട്.സാങ്കേതികവിദ്യയുടെ പേരിൽ ആരെയും പ്രയാസപ്പെടുത്താത്ത, എല്ലാവർക്കും സൗകര്യപ്രദമായ സംവിധാനങ്ങൾ ഒരുക്കാൻ സർക്കാർ മുൻകൈ എടുക്കേണ്ടതുണ്ട്.