ബസുകൾ വാങ്ങാൻ സ്പോൺസർഷിപ്പ്; പുതിയ പദ്ധതിയുമായി കെ.എസ്.ആർ.ടി.സി.
പൊതുഗതാഗത സംവിധാനം കൂടുതൽ ശക്തിപ്പെടുത്തുന്നതിനായി ബസുകൾ സ്പോൺസർ ചെയ്യാൻ അവസരമൊരുക്കി കെ.എസ്.ആർ.ടി.സി. ഗ്രാമീണ മേഖലകളിലടക്കം യാത്രാസൗകര്യം വർധിപ്പിക്കുന്നതിന്റെ ഭാഗമായാണ് വിവിധ സ്ഥാപനങ്ങളിൽനിന്നും വ്യക്തികളിൽനിന്നും സ്പോൺസർഷിപ്പ് സ്വീകരിക്കുന്നത്. ഇതിനായുള്ള മാർഗനിർദേശങ്ങളും കോർപറേഷൻ പുറത്തിറക്കി. തദ്ദേശസ്വയംഭരണ സ്ഥാപനങ്ങൾ, സഹകരണ സ്ഥാപനങ്ങൾ, കമ്പനികൾ, ട്രസ്റ്റുകൾ എന്നിവയ്ക്ക് പുറമെ സി.എസ്.ആർ ഫണ്ട് ഉപയോഗിച്ചും ബസുകൾ നൽകാം. ഒൻപത് മുതൽ 15 മീറ്റർ വരെ നീളമുള്ള എ.സി പ്രീമിയം, എ.സി സീറ്റർ, എ.സി സ്ലീപ്പർ, സൂപ്പർഫാസ്റ്റ്, ഫാസ്റ്റ് പാസഞ്ചർ തുടങ്ങിയ ബസുകളാണ് പദ്ധതിയിലൂടെ സ്വീകരിക്കുക. സ്പോൺസർ ചെയ്യുന്ന സ്ഥാപനത്തിന്റെയോ സംഘടനയുടെയോ പേര്, ബ്രാൻഡ് എന്നിവ നിശ്ചിത മാനദണ്ഡങ്ങൾ പാലിച്ച് ബസുകളിൽ പ്രദർശിപ്പിക്കാനും പരസ്യസാധ്യതകൾ പ്രയോജനപ്പെടുത്താനും അവസരമുണ്ടാകും. ബസുകൾ നേരിട്ട് വാങ്ങിനൽകുകയോ അതിനുള്ള തുക കെ.എസ്.ആർ.ടി.സിക്ക് കൈമാറുകയോ ചെയ്യാം. ഇത്തരത്തിൽ ലഭിക്കുന്ന ബസുകളുടെ പൂർണ നിയന്ത്രണം കെ.എസ്.ആർ.ടി.സിക്കായിരിക്കുമെന്നും മാർഗനിർദേശത്തിൽ വ്യക്തമാക്കുന്നു.
തടവുകാരുടെ ഭക്ഷണ മെനുവിൽ മാറ്റം; മട്ടനും മീനും ഒഴിവാക്കാൻ ജയിൽ വകുപ്പിന്റെ ശുപാർശ
തടവുകാരുടെ ഭക്ഷണക്രമത്തിൽ മാറ്റം വരുത്താൻ ജയിൽ വകുപ്പ് ശുപാർശ ചെയ്തു. ചെലവ് കുറയ്ക്കുന്നതിനൊപ്പം തടവുകാരുടെ ആരോഗ്യവും പരിഗണിച്ചാണ് മെനു പരിഷ്കരിക്കാനുള്ള നിർദേശം. മട്ടനും മീനും ഒഴിവാക്കി പകരം കോഴിക്കറി, സോയ ചങ്ക്സ്, മുട്ട എന്നിവ ഉൾപ്പെടുത്താനാണ് പ്രധാന ശുപാർശ. ഇതിലൂടെ പ്രതിവർഷം 5.6 കോടി രൂപ വരെ ലാഭിക്കാനാകുമെന്ന് ജയിൽ വകുപ്പ് മേധാവി എസ്. ശ്രീജിത്ത് ആഭ്യന്തരവകുപ്പിന് നൽകിയ കത്തിൽ വ്യക്തമാക്കി. മട്ടൻ സ്ഥിരമായി കഴിക്കുന്നത് ഹൃദ്രോഗം ഉൾപ്പെടെയുള്ള ജീവിതശൈലീ രോഗങ്ങൾക്ക് കാരണമാകാമെന്നും കത്തിൽ ചൂണ്ടിക്കാട്ടുന്നു. കൂടാതെ മട്ടനും മീനും വാങ്ങുന്നതിലും സൂക്ഷിക്കുന്നതിലും പ്രായോഗിക ബുദ്ധിമുട്ടുകളുണ്ടെന്നും വകുപ്പ് വ്യക്തമാക്കി. നിലവിൽ മട്ടൻ വാങ്ങാൻ വർഷം 5.72 കോടി രൂപയും മീനിന് 4.8 കോടി രൂപയുമാണ് ചെലവാകുന്നത്. അതേസമയം കോഴിക്ക് 1.26 കോടിയും സോയ ചങ്ക്സിനും മുട്ടയ്ക്കുമായി 3.4 കോടിയും മാത്രമാണ് ചെലവ് പ്രതീക്ഷിക്കുന്നത്. നിലവിലെ ക്രമത്തിൽ തിങ്കളാഴ്ചയും ബുധനാഴ്ചയും ഉച്ചഭക്ഷണത്തിന് മീനും ശനിയാഴ്ച മട്ടനുമാണ് നൽകുന്നത്. മാംസാഹാരം കഴിക്കാത്ത തടവുകാർക്ക് പകരമായി പച്ചക്കറി കറികളും നൽകുന്നുണ്ട്. ആരോഗ്യപ്രശ്നങ്ങളുള്ള തടവുകാർക്ക് ഡോക്ടറുടെ നിർദേശപ്രകാരമുള്ള ഭക്ഷണക്രമം തുടരും. പുതിയ മെനു നടപ്പാക്കുന്നതോടെ ചെലവ് കുറയ്ക്കുന്നതിനൊപ്പം കൂടുതൽ ആരോഗ്യകരമായ ഭക്ഷണക്രമം ഉറപ്പാക്കാനാകുമെന്നാണ് ജയിൽ വകുപ്പിന്റെ വിലയിരുത്തൽ.
ശബരിമല മണ്ഡലകാലം; മുന്നൊരുക്കങ്ങൾ ഇനിയും പൂർത്തിയായില്ല
ശബരിമല മണ്ഡലകാലം ആരംഭിക്കാനിരിക്കെ മുന്നൊരുക്കങ്ങൾ വൈകുന്നു. കെട്ടിടങ്ങളുടെ അറ്റകുറ്റപ്പണികളും ശുചീകരണ പ്രവർത്തനങ്ങളും ഇതുവരെ ആരംഭിച്ചിട്ടില്ല. ടെൻഡർ, ലേലം നടപടികൾ വൈകുന്നതാണ് പ്രധാന തിരിച്ചടി. ശുചിമുറികളും വിരിപ്പുകളും ശുചീകരിക്കുന്ന നടപടികളും തുടങ്ങിയിട്ടില്ല. സാധാരണ സെപ്റ്റംബർ പകുതിയോടെ 80 ശതമാനം ജോലികളും പൂർത്തിയാകാറുണ്ട്. എന്നാൽ ഇത്തവണ പല ജോലികളും ടെൻഡർ ക്ഷണിച്ച ഘട്ടത്തിലാണ്. അരവണയ്ക്കുള്ള ഡപ്പികളും ഫ്ലിപ്പ് ലിഡുകളും ആവശ്യത്തിന് എത്തിയിട്ടില്ല. ഓഗസ്റ്റിൽ എത്തേണ്ട ഡപ്പികൾക്കുള്ള ടെൻഡർ ഇപ്പോഴാണ് നൽകിയിരിക്കുന്നത്. ഒരുക്കങ്ങൾ വൈകുന്നത് തീർഥാടനകാലത്ത് വിശ്വാസികൾക്ക് ദുരിതമാകുമെന്ന ആശങ്ക ശക്തമാണ്.