മുല്ലപ്പെരിയാർ സമിതിയിലെ അഴിച്ചുപണിയും രാഷ്ട്രീയ വിവാദങ്ങളും
മുല്ലപ്പെരിയാർ വിഷയത്തിൽ വീണ്ടും നിർണായക നീക്കങ്ങളുമായി കേന്ദ്ര സർക്കാർ. മുല്ലപ്പെരിയാർ അണക്കെട്ടിന്റെ സമഗ്ര സുരക്ഷാ വിലയിരുത്തലിനായി ദേശീയ ഡാം സുരക്ഷാ അതോറിറ്റി രൂപീകരിച്ച സ്വതന്ത്ര വിദഗ്ധ സമിതിയിൽ നിന്ന് കേരളത്തിന്റെ പ്രതിനിധിയായ ടി.കെ. ശിവരാജനെ ഏകപക്ഷീയമായി മാറ്റിയിരിക്കുകയാണ്. മുൻ സി.ഡബ്ല്യു.സി ചീഫ് എഞ്ചിനീയർ കൂടിയായ ശിവരാജന് പകരം ഉത്തർപ്രദേശ് സ്വദേശിയായ പ്രൊഫ. എം.എൽ. ശർമ്മയെയാണ് പുതിയ പ്രതിനിധിയായി നിയമിച്ചിരിക്കുന്നത്. വ്യക്തിപരമായ കാരണങ്ങളാൽ ശിവരാജൻ ഒഴിഞ്ഞതാണെന്നാണ് കേന്ദ്രത്തിന്റെ വിശദീകരണമെങ്കിലും ഈ നീക്കം വലിയ ചർച്ചകൾക്കാണ് വഴിതുറന്നിരിക്കുന്നത്. ഐ.ഐ.ടി റൂർക്കിയിലെ ഭൂകമ്പ എഞ്ചിനീയറിംഗ് വിഭാഗം പ്രൊഫസറും ഇന്റർനാഷണൽ സെന്റർ ഓഫ് എക്സലൻസ് ഫോർ ഡാംസ് മേധാവിയുമാണ് പുതിയ അംഗമായ പ്രൊഫ. എം.എൽ. ശർമ്മ. 2021-ലെ ഡാം സുരക്ഷാ നിയമപ്രകാരം ഈ വർഷം ജനുവരി 6-നാണ് മുല്ലപ്പെരിയാർ പരിശോധനയ്ക്കായി ബൽരാജ് ജോഷി ചെയർമാനായുള്ള ഈ സമിതിക്ക് അതോറിറ്റി രൂപം നൽകിയത്. അംഗങ്ങളുടെ മാറ്റം ഒഴികെ മറ്റ് നിബന്ധനകളിലൊന്നും മാറ്റമില്ലെന്ന് വ്യക്തമാക്കിക്കൊണ്ടുള്ള ഉത്തരവിന്റെ പകർപ്പുകൾ കേരള, തമിഴ്നാട് സർക്കാരുകൾക്ക് കൈമാറിയിട്ടുണ്ട്.ഏറ്റവും ശ്രദ്ധേയമായ കാര്യം, തമിഴ്നാട് മുഖ്യമന്ത്രി വിജയ് മുല്ലപ്പെരിയാർ ഡാം പുതിയത് പണിയുന്നതിനെതിരെ ഈയടുത്ത് ശക്തമായ പരാമർശം നടത്തിയിരുന്നു. ഇതിന് തൊട്ടുപിന്നാലെയാണ് കേരളത്തിന്റെ പ്രതിനിധിയെ സമിതിയിൽ നിന്ന് മാറ്റിക്കൊണ്ടുള്ള കേന്ദ്രത്തിന്റെ ഈ പെട്ടെന്നുള്ള നീക്കം പുറത്തുവരുന്നത് എന്നത് വലിയ രാഷ്ട്രീയ-സാമൂഹിക ചർച്ചകൾക്ക് സോഷ്യൽ മീഡിയയിൽ ഇതിനകം തുടക്കമിട്ടുകഴിഞ്ഞു. പുതിയ മാറ്റങ്ങൾ മുല്ലപ്പെരിയാർ സുരക്ഷാ പരിശോധനകളെ എങ്ങനെ ബാധിക്കുമെന്ന ആശങ്കയിലാണ് ഇപ്പോൾ മലയാളികൾ.
ഡെലിവറി ബാഗുകൾക്കപ്പുറം ലഹരി മാഫിയയുടെ തലകളിലേക്ക് അന്വേഷണം എത്തുമോ?
ഡെലിവറി ആപ്പുകളുടെ മറവിൽ ലഹരി വിൽപ്പന നടക്കുന്നതായി വർഷങ്ങളായി വാർത്തകൾ വരുന്നു. ഇടയ്ക്കിടെ ചിലരെ പിടികൂടുകയും കേസുകൾ രജിസ്റ്റർ ചെയ്യുകയും ചെയ്യുന്നുണ്ട്. പക്ഷേ പിടിയിലാകുന്നത് പലപ്പോഴും അവസാന കണ്ണികളാണ്. യഥാർത്ഥത്തിൽ ഈ വിഷം സമൂഹത്തിലേക്ക് എത്തിക്കുന്ന തലകൾ പലപ്പോഴും നിയമത്തിന്റെ പിടിയിൽ നിന്ന് രക്ഷപ്പെടുന്നതായാണ് പൊതുസമൂഹത്തിന്റെ ആശങ്ക. കേരളത്തിലേക്ക് ഒഴുകിയെത്തുന്ന മയക്കുമരുന്നുകളുടെ വ്യാപനം തടയുക എന്ന ലക്ഷ്യത്തോടെ ആരംഭിച്ച ഓപ്പറേഷൻ തൂഫാന്റെ ഭാഗമായി ആഭ്യന്തര മന്ത്രി രമേശ് ചെന്നിത്തല ഡെലിവറി ആപ്പുകളുടെ മറവിലുള്ള ലഹരി വിൽപ്പനക്കെതിരെ കർശന മുന്നറിയിപ്പ് നൽകിയിരിക്കുന്നത് സ്വാഗതാർഹമാണ്. എന്നാൽ ഈ പോരാട്ടം വിജയിക്കണമെങ്കിൽ ലഹരി കൈമാറുന്ന ആളുകളെ മാത്രം പിടികൂടിയാൽ പോരാ. അതിന്റെ പിന്നിലെ സാമ്പത്തിക ശൃംഖലയും വിതരണക്കാരും ആസൂത്രകരും സംഘാടകരുമായ വൻകിട കണ്ണികളെയും കണ്ടെത്തണം. വാലിൽ പിടിക്കുന്നതിനേക്കാൾ തലയിൽ പിടിക്കുന്ന നടപടികളാണ് ലഹരി മാഫിയയെ യഥാർത്ഥത്തിൽ തകർക്കുക. ഓപ്പറേഷൻ തൂഫാൻ വെറും റെയ്ഡുകളിലും അറസ്റ്റുകളിലും ഒതുങ്ങാതെ ലഹരി ശൃംഖലയുടെ വേരുകൾ തേടിയെത്തുന്ന നടപടിയായി മാറാൻ കഴിഞ്ഞാൽ മാത്രമേ കേരളത്തിന് ഈ വിപത്തിൽ നിന്ന് ശാശ്വതമായ ആശ്വാസം ലഭിക്കൂ.
തൂത്തുക്കുടിയിൽ ഉണ്ടായത് യഥാർത്ഥ ടോർനാണ്ടോയോ?
തമിഴ്നാട്ടിലെ തൂത്തുക്കുടി ജില്ലയുടെ ചില ഭാഗങ്ങളിൽ കഴിഞ്ഞ ദിവസം വൈകീട്ട് ചുഴലിക്കാറ്റിനോട് സമാനമായ രീതിയിൽ അതിശക്തമായ കാറ്റാണ് ആഞ്ഞടിച്ചത്. സമീപപ്രദേശത്ത് വീടുകൾ, തട്ടുകടകൾ, വാഗൈകുളം ടോൾ പ്ലാസ, ഒരു സ്വകാര്യ തീം പാർക്ക് എന്നിവിടങ്ങളിലെല്ലാം ഈ പ്രതിഭാസം വലിയ നാശനഷ്ടങ്ങളുണ്ടാക്കി. തൂത്തുക്കുടി വിമാനത്താവള പ്രദേശത്തിന് സമീപത്തുനിന്നും പ്രദേശവാസികൾ പകർത്തിയ വീഡിയോകളിൽ പൊടിപടലങ്ങളും അവശിഷ്ടങ്ങളും ഒരു ഫണൽ രൂപത്തിൽ അതിവേഗം മുകളിലേക്ക് ഉയരുന്നത് കാണാമായിരുന്നു. ഒരു യഥാർത്ഥ ടോർനാഡോയെ ഓർമ്മിപ്പിക്കുന്ന രീതിയിലായിരുന്നു ഈ പ്രതിഭാസം. ശക്തമായ കാറ്റിൽ മരങ്ങൾ കടപുഴകി വീഴുകയും വൈദ്യുതി തൂണുകൾ ഒടിയുകയും വീടുകളുടെ മേൽക്കൂര ഷീറ്റുകൾ പറന്നുപോവുകയും ചെയ്തു. ഏകദേശം രണ്ട് കോടി മുതൽ ആറ് കോടി രൂപ വരെ വിവിധ മേഖലകളിൽ നാശനഷ്ടം ഉണ്ടായതായാണ് പ്രാഥമിക കണക്കുകൾ സൂചിപ്പിക്കുന്നത്. തുറന്ന മൈതാനത്ത് ക്രിക്കറ്റ് കളിച്ചിരുന്നവർ ശക്തമായ കാറ്റ് തങ്ങളെ നിലത്ത് നിന്ന് ഉയർത്താൻ ശ്രമിച്ചതായി സാക്ഷ്യപ്പെടുത്തിയിട്ടുണ്ട്. ഭാഗ്യവശാൽ രണ്ട് പേർക്ക് നിസ്സാര പരിക്കേറ്റതൊഴിച്ചാൽ മരണങ്ങളൊന്നും റിപ്പോർട്ട് ചെയ്യപ്പെട്ടിട്ടില്ല. കാണാൻ ഒരു ടോർനാഡോ പോലെ തോന്നിച്ചെങ്കിലും ഇത് യഥാർത്ഥത്തിൽ ഒരു ചുഴലിക്കാറ്റല്ലെന്നാണ് ചെന്നൈയിലെ പ്രാദേശിക കാലാവസ്ഥാ കേന്ദ്രം വ്യക്തമാക്കുന്നത്. സമുദ്രനിരപ്പിൽ നിന്ന് ഏകദേശം 3.1 കിലോമീറ്റർ ഉയരത്തിൽ സ്ഥിതി ചെയ്യുന്ന കിഴക്ക്-പടിഞ്ഞാറ് ന്യൂനമർദം കാരണം തെക്കൻ തമിഴ്നാട്ടിൽ ശക്തമായ ഇടിമിന്നൽ ഉണ്ടായിരുന്നു. ഈ സംവിധാനം ശക്തമായ പ്രാദേശിക കാറ്റും പൊടിപടലങ്ങളും സഹിതം മുകളിലേക്ക് നീങ്ങുന്ന ശക്തമായ വായുപ്രവാഹങ്ങൾ സൃഷ്ടിക്കുകയാണുണ്ടായത്. വിമാനത്താവളത്തിന് സമീപം കണ്ട ഫണൽ പോലുള്ള രൂപം ഒരു ക്യുമുലോനിംബസ് മേഘത്തിനടിയിലെ മുകളിലേക്കുള്ള ശക്തമായ വായുപ്രവാഹം കാരണം രൂപപ്പെട്ടതാണ്. ഇത് പൊടിയും അവശിഷ്ടങ്ങളും അടങ്ങിയ വായുവിനെ ലംബമായി ലെയറുകളിലേക്ക് ഉയർത്തുകയായിരുന്നു. തെക്കുപടിഞ്ഞാറൻ മൺസൂൺ സമയത്ത് തൂത്തുക്കുടിയിൽ ടൊർണാഡോകൾ രൂപപ്പെടാൻ ആവശ്യമായ അന്തരീക്ഷ സാഹചര്യങ്ങൾ – അതായത് ശക്തമായ മർദ്ദ വ്യതിയാനങ്ങളും ഗണ്യമായ താഴ്ന്ന നിലയിലുള്ള കാറ്റ് ഷിയറും – സാധാരണയായി ഉണ്ടാകാറില്ലെന്നും, അതിനാൽ ഇതൊരു ചുഴലിക്കാറ്റല്ല മറിച്ച് മേഘങ്ങൾ മൂലമുണ്ടായ ശക്തമായ വായുപ്രവാഹം മാത്രമാണെന്നും കാലാവസ്ഥാ നിരീക്ഷകർ വിശദീകരിക്കുന്നു.
ചരിത്രത്തിലെ ഏറ്റവും വലിയ മയക്കുമരുന്ന് വേട്ട: 75 കോടി ഡോളറിന്റെ കൊക്കെയ്ൻ
ലോകം കണ്ടതിൽ വച്ച് തന്നെ ചരിത്രത്തിലെ ഏറ്റവും വലിയ മയക്കുമരുന്ന് വേട്ടയ്ക്ക് സാക്ഷ്യം വഹിച്ചിരിക്കുകയാണ് ഓസ്ട്രേലിയയിലെ സിഡ്നി നഗരം . ഷിപ്പിംഗ് കണ്ടെയ്നറിന്റെ തറഭാഗത്തിന്റെ നിറ വ്യത്യാസത്തിൽ തോന്നിയ സംശയത്തെ തുടർന്ന് പൊലീസ് നടത്തിയ വിശദമായ പരിശോധനയിലാണ് 75 കോടിയിലേറെ വില വരുന്ന കൊക്കെയ്ൻ ശേഖരം കണ്ടെത്തിയത്. വീടിന്റെ ഭൂഗർഭ അറകളിൽ സൂക്ഷിച്ചിരുന്ന ഏകദേശം മൂന്ന് ടണ്ണോളം മയക്കുമരുന്നാണ് പൊലീസ് പിടിച്ചെടുത്തത്. അന്താരാഷ്ട്ര വിപണിയിൽ ഏകദേശം 81.6 കോടി ഡോളർ അതായത് ഇന്ത്യൻ രൂപയിൽ ഏകദേശം 75,74,74,80,000 രൂപ വിലമതിക്കുന്ന 2.7 ടൺ കൊക്കെയ്നാണ് ഓസ്ട്രേലിയൻ ഫെഡറൽ പൊലീസ് കണ്ടെടുത്തത്. ലഹരിക്കടത്തുമായി ബന്ധപ്പെട്ട് 21-ഉം 25-ഉം വയസ്സുള്ള രണ്ട് യുവാക്കളെ പൊലീസ് സംഭവസ്ഥലത്തുനിന്ന് അറസ്റ്റ് ചെയ്തു. സിഡ്നിയിലെ ലണ്ടൻഡെറിയിലുള്ള ഒരു അർദ്ധ-ഗ്രാമീണ മേഖലയിലെ വസ്തുവിലാണ് പൊലീസ് ഒരേസമയം റെയ്ഡ് നടത്തിയത്. പരിശോധനയ്ക്കിടെ അവിടെയുണ്ടായിരുന്ന ഷിപ്പിംഗ് കണ്ടെയ്നറുകളുടെ തറഭാഗം വ്യാജമായി നിർമ്മിച്ചതാണെന്ന് പൊലീസ് കണ്ടെത്തുകയായിരുന്നു. ഈ കണ്ടെയ്നറുകൾക്ക് അടിയിലായി നിർമ്മിച്ച രഹസ്യ ഭൂഗർഭ അറകളിൽ പ്ലാസ്റ്റിക് ടബ്ബുകളിൽ സൂക്ഷിച്ച നിലയിലായിരുന്നു മയക്കുമരുന്ന് ശേഖരം. ഏകദേശം 30 ലക്ഷത്തോളം ആളുകൾക്ക് വിതരണം ചെയ്യാൻ ആവശ്യമായ അളവിലുള്ള കൊക്കെയ്നാണ് ഇതെന്ന് പൊലീസ് വ്യക്തമാക്കി. ഓസ്ട്രേലിയയുടെ ചരിത്രത്തിൽ കഴിഞ്ഞ 20 വർഷത്തിനിടെ ഉണ്ടാകുന്ന ഏറ്റവും വലിയ മയക്കുമരുന്ന് വേട്ടയാണിത്. ഇതിന് മുൻപ് 2007-ൽ മെൽബണിൽ നിന്ന് 4.5 ടൺ എംഡിഎംഎ പിടിച്ചെടുത്തതാണ് ഇതിനേക്കാൾ വലിയ ഏക സംഭവമായിട്ടുള്ളത്. സിഡ്നിയിൽ പൊലീസ് റെയ്ഡിനായി എത്തിയ സമയത്ത് പ്രതികളായ ഇരു യുവാക്കളും ഓടി രക്ഷപ്പെടാൻ ശ്രമിച്ചെങ്കിലും പൊലീസ് ഇവരെ പിന്തുടർന്ന് പിടികൂടുകയായിരുന്നു. വാണിജ്യാടിസ്ഥാനത്തിൽ നിരോധിത മയക്കുമരുന്ന് കൈവശം വെച്ചതിനാണ് ഇവർക്കെതിരെ കേസെടുത്തിരിക്കുന്നത്. ഓസ്ട്രേലിയൻ നിയമപ്രകാരം ഈ കുറ്റത്തിന് പരмаവധി ശിക്ഷ ജീവപര്യന്തം തടവാണ്. കോടതി പ്രതികൾക്ക് ജാമ്യം നിഷേധിച്ചു കഴിഞ്ഞു. ഓഗസ്റ്റ് 13-ന് ഇവരെ വീണ്ടും കോടതിയിൽ ഹാജരാക്കും. സിഡ്നിയിലെ ഒരു പ്രമുഖ ക്രിമിനൽ കുടുംബത്തിലെ മുൻ അംഗങ്ങൾ ഉൾപ്പെടുന്ന ‘കൊക്കോനട്ട് കാർട്ടൽ’ എന്ന വൻകിട മാഫിയാ സംഘത്തിന്റെ വെറും സഹായികൾ മാത്രമാണ് പിടിയിലായ ഈ യുവാക്കളെന്ന് പൊലീസ് വൃത്തങ്ങൾ സൂചിപ്പിച്ചു.ക്വീൻസ്ലൻഡ് ആസ്ഥാനമായി പ്രവർത്തിക്കുന്ന വിവിധ സുരക്ഷാ ഏജൻസികളുടെ സംയുക്ത ടാസ്ക് ഫോഴ്സ് രൂപീകരിച്ച് നടപ്പിലാക്കിയ ‘ഓപ്പറേഷൻ മിൻജിയാങ്’ എന്ന ദൗത്യത്തിന്റെ ഭാഗമായാണ് ഈ വൻ വേട്ട സാധ്യമായത്. കഴിഞ്ഞ മെയ് മാസത്തിൽ ആരംഭിച്ച ഈ ഓപ്പറേഷനിലൂടെ ഇതിനകം തന്നെ 178 കിലോഗ്രാം കൊക്കെയ്നും 142 കിലോഗ്രാം മെത്താംഫെറ്റാമൈനും പിടിച്ചെടുത്തിരുന്നു. ഇതോടെ ഈ ദൗത്യത്തിലൂടെ മാത്രം ആകെ പിടിച്ചെടുത്ത മയക്കുമരുന്നിന്റെ അളവ് മൂന്ന് ടണ്ണിലധികമായി ഉയർന്നു. മയക്കുമരുന്ന് ശേഖരം വടക്കൻ ക്വീൻസ്ലൻഡിലെ മിഡ്ജ് പോയിന്റിന് സമീപമുള്ള തീരത്തിലൂടെയാണ് ഓസ്ട്രേലിയയിലേക്ക് കടത്തിയതെന്നും തുടർന്ന് സിഡ്നിയിലെ സംഘത്തിന്റെ നിർദ്ദേശപ്രകാരം ട്രക്കുകളിൽ തെക്കൻ മേഖലകളിലേക്ക് എത്തിക്കുകയായിരുന്നുവെന്നും പോലീസ് കണ്ടെത്തിയിട്ടുണ്ട്. കഴിഞ്ഞ മെയ് മാസത്തിൽ മിഡ്ജ് പോയിന്റിലെ ബോട്ട് ജെട്ടിക്ക് സമീപം കത്തിനശിച്ച നിലയിൽ കണ്ടെത്തിയ ഒരു ട്രക്കിനെക്കുറിച്ച് അന്വേഷിച്ച ക്വീൻസ്ലൻഡ് പൊലീസിന് കടലിൽ നിന്ന് 40 കിലോഗ്രാം കൊക്കെയ്ൻ ലഭിച്ചിരുന്നു. അവിടെ നിന്നാണ് ഈ വൻ മാഫിയയെക്കുറിച്ചുള്ള സൂചന പൊലീസിന് ലഭിക്കുന്നത്. തുടർന്ന് നടത്തിയ അന്വേഷണത്തിൽ ആറ് പേരെ പൊലീസ് മുൻപ് അറസ്റ്റ് ചെയ്തിരുന്നു.ഈ വൻ മയക്കുമരുന്ന് ശേഖരം കടത്താൻ ഉപയോഗിച്ച ‘എംവി വെൽത്ത്’ എന്ന പ്രധാന കപ്പൽ പസഫിക് സമുദ്രത്തിലെ സോളമൻ ദ്വീപുകളുടെ അധികൃതർ തടഞ്ഞുവെച്ച് വിശദമായ അന്വേഷണം നടത്തിവരികയാണ്. സെൻട്രൽ അമേരിക്കൻ രാജ്യമായ ബെലീസിൽ രജിസ്റ്റർ ചെയ്തിട്ടുള്ളതാണ് ഈ കപ്പൽ. തെക്കേ അമേരിക്കയിൽ നിന്നോ വടക്കുകിഴക്കൻ ഏഷ്യയിൽ നിന്നോ ആയിരിക്കാം ഈ മയക്കുമരുന്ന് കപ്പലിൽ കയറ്റിയതെന്നാണ് പൊലീസ് സംശയിക്കുന്നത്. തങ്ങളുടെ ഉദ്യോഗസ്ഥരുടെ ദീർഘനാളത്തെ കഠിനാധ്വാനവും കൃത്യമായ ഏകോപനവുമാണ് ഇത്രയും വലിയൊരു അന്താരാഷ്ട്ര മയക്കുമരുന്ന് ശൃംഖലയെ തകർക്കാൻ സഹായിച്ചതെന്ന് ക്വീൻസ്ലൻഡ് പൊലീസ് വ്യക്തമാക്കി.