1.58 കോടി റേഷൻ കാർഡുകൾ ഒക്ടോബർ മുതൽ നിഷ്‌ക്രിയമാക്കും

കഴിഞ്ഞ ആറ് മാസമായി റേഷൻ ആനുകൂല്യങ്ങൾ കൈപ്പറ്റാത്ത 1.58 കോടി ‘സൈലന്റ് റേഷൻ കാർഡുകൾ’ ഒക്ടോബർ മുതൽ കേന്ദ്രസർക്കാർ താത്കാലികമായി നിഷ്‌ക്രിയമാക്കും. വ്യാജവും അർഹതയില്ലാത്തതുമായ കാർഡുകൾ ഒഴിവാക്കുന്നതിനാണ് നടപടി. കാർഡുകൾ ഉടൻ ഡാറ്റാബേസിൽ നിന്ന് നീക്കം ചെയ്യില്ല. അർഹത തെളിയിക്കാൻ കാർഡുടമകൾക്ക് മൂന്ന് മാസം സമയം നൽകും. ഈ കാലയളവിൽ ഇ-കെവൈസി പൂർത്തിയാക്കുന്ന അർഹരുടെ കാർഡുകൾ പുനഃസ്ഥാപിക്കും. ഡിജിറ്റലൈസേഷൻ, ആധാർ സീഡിങ്, ഇ-കെവൈസി എന്നിവയിലൂടെ ഇതുവരെ 5.8 കോടി കാർഡുകൾ സംവിധാനത്തിൽ നിന്ന് ഒഴിവാക്കിയതായി ഭക്ഷ്യ മന്ത്രാലയം അറിയിച്ചു. ജൂലൈ 30 വരെയുള്ള കണക്കിൽ 90.64 ശതമാനം ഇ-കെവൈസി പൂർത്തിയായിട്ടുണ്ട്.

കപ്പൽനിർമാണശാലയ്ക്കായി ഹൗറ മോഡൽ പാലം പദ്ധതി അട്ടിമറിച്ചെന്ന് ആരോപണം

പൊന്നാനിയെയും പടിഞ്ഞാറേക്കരയെയും ബന്ധിപ്പിക്കുന്ന ഹൗറ മോഡൽ സസ്പെൻഷൻ പാലത്തിന്റെ നിർമാണത്തിനായുള്ള ഭൂമിയേറ്റെടുക്കൽ നടപടികൾ കപ്പൽനിർമാണശാല പദ്ധതിയുടെ പേരിൽ തടഞ്ഞതായി ആരോപണം. പാലം നിർമാണത്തിന് കപ്പൽനിർമാണശാലയുടെ അലൈൻമെന്റ് തടസ്സമാകുമെന്ന വിലയിരുത്തലിനെ തുടർന്നാണ് ഭൂമിയേറ്റെടുക്കൽ താൽക്കാലികമായി നിർത്തിവെക്കാൻ റോഡ്‌സ് ആൻഡ് ബ്രിഡ്ജസ് ഡെവലപ്‌മെന്റ് കോർപ്പറേഷൻ ലാൻഡ് അക്വിസിഷൻ അതോറിറ്റിയോട് ആവശ്യപ്പെട്ടത്. പാലത്തിന്റെ അലൈൻമെന്റ് മാറ്റണമെന്ന നിർദേശവും ഇതിനിടെ ഉയർന്നിട്ടുണ്ട്. പദ്ധതിക്കായി പൊന്നാനി–പടിഞ്ഞാറേക്കര മേഖലയിൽ 214 കുടുംബങ്ങളാണ് ഭൂമിയും കെട്ടിടങ്ങളും വിട്ടുനൽകാൻ തയ്യാറായിരുന്നത്. നഷ്ടപരിഹാര നടപടികൾ അന്തിമഘട്ടത്തിലെത്തിയപ്പോഴാണ് ഭൂമിയേറ്റെടുക്കൽ നിർത്തിവെച്ചത്. ജനുവരി 22-ന് അവസാനഘട്ട ഹിയറിങ്ങിൽ രേഖകൾ പരിശോധിച്ച് നഷ്ടപരിഹാരം കൈമാറാനായിരുന്നു തീരുമാനം. ഭൂമിയും കെട്ടിടങ്ങളും നഷ്ടപ്പെടുന്ന കുടുംബങ്ങൾക്കായി കിഫ്ബി 38 കോടി രൂപ അനുവദിച്ചിട്ടുമുണ്ട്. കോടതിപ്പടി മുതൽ ആശുപത്രിപ്പടി വരെയുള്ള ഭാഗത്ത് 13 കുടുംബങ്ങൾ ഭൂമിയും വീടും വിട്ടുനൽകാനിരുന്നതാണ്. ഇരുപദ്ധതികളും നിലവിൽ സ്തംഭനാവസ്ഥയിലായതോടെ ഭൂമി വിട്ടുനൽകാൻ തയ്യാറായ കുടുംബങ്ങളും പ്രതിസന്ധിയിലായി. ഭൂമിയേറ്റെടുക്കൽ നടപടികൾ നിർത്തിയെങ്കിലും സ്ഥലം വിൽക്കാനോ പണയപ്പെടുത്താനോ കഴിയാത്ത അവസ്ഥയാണെന്ന് കുടുംബങ്ങൾ പറയുന്നു. നടപ്പാക്കുമെന്ന് ഉറപ്പില്ലാത്ത കപ്പൽനിർമാണശാല പദ്ധതിക്കായി ജനോപകാരപ്രദമായ പാലം പദ്ധതി തടഞ്ഞുവെന്ന ആരോപണത്തിലാണ് ഭൂവുടമകൾ.

‘എനർജി ഡ്രിങ്ക്’ പദ വിലക്ക്; FSSAIക്കെതിരെ റെഡ് ബുൾ കോടതിയിൽ

‘എനർജി ഡ്രിങ്ക്’ എന്ന പദം ഉപയോഗിക്കുന്നത് വിലക്കിയ FSSAI നടപടിക്കെതിരെ റെഡ് ബുൾ ഡൽഹി ഹൈക്കോടതിയെ സമീപിച്ചു. മുന്നറിയിപ്പ് നോട്ടീസ് നൽകാതെയാണ് നടപടി സ്വീകരിച്ചതെന്നും ഇത് ഇന്ത്യയിലെ ബിസിനസിനെ ബാധിച്ചെന്നും കമ്പനി ഹർജിയിൽ ആരോപിച്ചു. സെപ്റ്റംബർ 25നാണ് ഹർജി നൽകിയത്. ‘എനർജി ഡ്രിങ്ക്’ എന്ന വിശേഷണം ഉപഭോക്താക്കളിൽ തെറ്റിദ്ധാരണ സൃഷ്ടിക്കുന്ന ബ്രാൻഡിങ്ങാണെന്നാണ് FSSAIയുടെ നിലപാട്. അതേസമയം, ഇന്ത്യയിലെ എനർജി ഡ്രിങ്ക് വിപണി അതിവേഗം വളരുകയാണ്. 2024ൽ റെഡ് ബുൾ ഇന്ത്യയുടെ വരുമാനം 130 മില്യൺ ഡോളറിലെത്തി. 2028ഓടെ ഇന്ത്യയിലെ എനർജി ഡ്രിങ്ക് വിപണി 1.6 ബില്യൺ ഡോളറിലെത്തുമെന്നാണ് കണക്കാക്കുന്നത്. കഫെയ്ൻ, പഞ്ചസാര, ടോറിന്‍ തുടങ്ങിയ ഘടകങ്ങളുടെ സാന്നിധ്യം കണക്കിലെടുത്ത് എനർജി ഡ്രിങ്കുകൾക്ക് വിവിധ രാജ്യങ്ങളിലെ ഭക്ഷ്യ റെഗുലേറ്റർമാർ കൂടുതൽ പരിശോധന ശക്തമാക്കുന്നതിനിടെയാണ് FSSAIയുടെ നടപടി.

ആറാം ക്ലാസുകാർക്കും ത്രിഭാഷാ നയത്തിൽ ഇളവ്; സുപ്രീം കോടതി നിർദേശം

സിബിഎസ്ഇയുടെ പുതിയ ത്രിഭാഷാ നയത്തിൽ ആറാം ക്ലാസിൽ പഠിക്കുന്ന വിദ്യാർഥികൾക്കും ഇളവ് അനുവദിക്കാൻ സുപ്രീം കോടതി നിർദേശം. നിലവിൽ ഏഴ്, എട്ട്, ഒമ്പത് ക്ലാസുകളിലെ വിദ്യാർഥികൾക്ക് അനുവദിച്ചിട്ടുള്ള ഇളവ് ആറാം ക്ലാസുകാർക്കും ബാധകമാക്കണമെന്ന് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ച് നിർദേശിച്ചു. വിദ്യാർഥികളുടെ ഭാവി പരിഗണിച്ചാണ് കോടതിയുടെ തീരുമാനം. നിലവിലെ ആറാം ക്ലാസ് ബാച്ചിന് ഇളവ് അനുവദിക്കുന്നതിനോട് യോജിക്കാനാകില്ലെന്ന് കേന്ദ്രസർക്കാരിന് വേണ്ടി ഹാജരായ അഡീഷനൽ സോളിസിറ്റർ ജനറൽ ഐശ്വര്യ ഭാട്ടി കോടതിയെ അറിയിച്ചു. അതേസമയം, രാജ്യത്തെ 99 ശതമാനം സിബിഎസ്ഇ സ്കൂളുകളും പുതിയ ഭാഷാ നയം നടപ്പാക്കാൻ സജ്ജമാണെന്ന് സോളിസിറ്റർ ജനറൽ തുഷാർ മേത്ത വ്യക്തമാക്കി. ആകെയുള്ള 28,819 സിബിഎസ്ഇ സ്കൂളുകളിൽ 1.2 ശതമാനം സ്കൂളുകൾക്ക് മാത്രമാണ് ആവശ്യമായ സൗകര്യങ്ങൾ ഒരുക്കാനുള്ളതെന്നും പാഠപുസ്തകങ്ങൾ ലഭ്യമാണെന്നും കേന്ദ്രം കോടതിയെ അറിയിച്ചു. 2027ലെ അടുത്ത അധ്യയന വർഷം മുതൽ ആറാം ക്ലാസ് വിദ്യാർഥികൾക്ക് രണ്ട് മാതൃഭാഷകൾ ഉൾപ്പെടെ മൂന്ന് ഭാഷകൾ പഠിക്കുന്നത് നിർബന്ധമാക്കുന്ന നയം നടപ്പാക്കുന്നത് പരിഗണിക്കണമെന്ന് സെപ്റ്റംബർ 17ന് സുപ്രീം കോടതി സിബിഎസ്ഇയോട് ആവശ്യപ്പെട്ടിരുന്നു. ഇതിന്റെ തുടർച്ചയായാണ് ആറാം ക്ലാസുകാർക്കും നിലവിലുള്ള ഇളവ് ബാധകമാക്കാനുള്ള നിർദേശം കോടതി മുന്നോട്ടുവച്ചത്.

കനത്ത മഴയും മണ്ണിടിച്ചിലും; ഉത്തരാഖണ്ഡിൽ മലയാളികളടക്കം ആയിരത്തോളം തീർഥാടകർ കുടുങ്ങി

ഉത്തരാഖണ്ഡിൽ കനത്ത മഴയും മണ്ണിടിച്ചിലും രൂക്ഷമായതോടെ മലയാളികളടക്കം ആയിരത്തോളം തീർഥാടകർ വഴിയിൽ കുടുങ്ങി. കേദാർനാഥിൽ നിന്ന് ഗൗരികുണ്ഡിലേക്ക് മടങ്ങുകയായിരുന്ന തീർഥാടക സംഘമാണ് ഭീംബാലിയിൽ കുടുങ്ങിയത്. റോഡിൽ മണ്ണും കല്ലും വീണ് ഗതാഗതം തടസ്സപ്പെട്ടതോടെ പോലീസ് യാത്ര തടയുകയായിരുന്നു. രാവിലെ സ്ഥിതിഗതികൾ സാധാരണ നിലയിലാണെന്നറിയിച്ച് പോലീസ് നൽകിയ നിർദേശത്തെ തുടർന്നാണ് തീർഥാടകർ കേദാർനാഥിൽ നിന്ന് യാത്ര തിരിച്ചത്. എന്നാൽ പാതിവഴിയിലെത്തിയതോടെ മണ്ണിടിച്ചിൽ സാധ്യത കണക്കിലെടുത്ത് യാത്ര നിർത്തിവയ്ക്കുകയായിരുന്നു. പ്രദേശത്ത് അപകടഭീഷണി തുടരുന്നതിനാൽ തീർഥാടകർക്ക് ആവശ്യമായ താമസസൗകര്യവും സുരക്ഷയും അധികൃതർ ഉറപ്പാക്കണമെന്നാണ് ആവശ്യം. അതേസമയം, ഉത്തരാഖണ്ഡിന് പുറമേ ഉത്തർപ്രദേശ്, ഒഡിഷ, സിക്കിം, ആന്ധ്രപ്രദേശ്, ഛത്തീസ്ഗഢ് എന്നിവിടങ്ങളിലും കനത്ത മഴ നാശം വിതച്ചു. ഉത്തർപ്രദേശിൽ മൂന്ന് ദിവസമായി തുടരുന്ന മഴയിലും കൊടുങ്കാറ്റിലും 56 പേർ മരിക്കുകയും 46 പേർക്ക് പരിക്കേൽക്കുകയും ചെയ്തു. വിവിധയിടങ്ങളിൽ വെള്ളപ്പൊക്കമുണ്ടായതോടെ നിരവധി പേർ കുടുങ്ങിക്കിടക്കുകയാണ്. റോഡുകളും ഗ്രാമങ്ങളും വെള്ളത്തിനടിയിലായതിനൊപ്പം വ്യാപകമായ കൃഷിനാശവും റിപ്പോർട്ട് ചെയ്തു.

പച്ചക്കറിവില കുതിക്കുന്നു; അടുക്കള ബജറ്റിന് തിരിച്ചടി

അടുക്കള ബജറ്റിന്റെ താളം തെറ്റിച്ച് പച്ചക്കറിവില കുതിക്കുന്നു. ബീൻസ്, പയർ, ചെറിയ ഉള്ളി എന്നിവയ്ക്ക് കിലോയ്ക്ക് 100 രൂപ കടന്നു. വെളുത്തുള്ളിയുടെ വില 220 രൂപയായി. രണ്ടാഴ്ചയ്ക്കിടെ ബീൻസിന് 30 രൂപയും പയറിന് 40 രൂപയും ചെറിയ ഉള്ളിക്ക് 40 രൂപയുമാണ് വർധിച്ചത്. ഇതരസംസ്ഥാനങ്ങളിലെ മഴയും വെള്ളപ്പൊക്കവും പച്ചക്കറി വരവിനെ ബാധിച്ചതോടെ ലഭ്യത കുറഞ്ഞതാണ് വില ഉയരാൻ കാരണമെന്നാണ് വ്യാപാരികളുടെ വിലയിരുത്തൽ. വരും ദിവസങ്ങളിൽ ഉരുളക്കിഴങ്ങിനും വില കൂടാൻ സാധ്യതയുണ്ട്. തക്കാളി, വെള്ളരിക്ക, വെണ്ടയ്ക്ക തുടങ്ങിയവയ്ക്ക് കാര്യമായ വിലവർധനയില്ലെങ്കിലും പ്രധാന പച്ചക്കറികളുടെ വിലക്കയറ്റം കുടുംബ ബജറ്റിന് തിരിച്ചടിയാകുകയാണ്. വില ഉയരുന്നതോടെ വാങ്ങുന്ന അളവ് കുറയുമെന്ന ആശങ്കയിലാണ് വ്യാപാരികൾ.

അഴുക്കുവെള്ളം മാത്രം ആശ്രയം; ചിന്നാറിലെ ഗോത്രകുടുംബങ്ങൾ ദുരിതത്തിൽ

കേരള-തമിഴ്‌നാട് അതിർത്തിയിലെ ചിന്നാർ വന്യജീവിസങ്കേതത്തിനുള്ളിലെ മാങ്ങാപ്പാറക്കുടിയിലെ 20 ഗോത്രകുടുംബങ്ങൾ കടുത്ത കുടിവെള്ളക്ഷാമത്തിൽ. ശുദ്ധജലം ലഭിക്കാത്തതിനെ തുടർന്ന് കുടിക്ക് സമീപത്തെ കുഴിയിൽ കെട്ടിക്കിടക്കുന്ന അഴുക്കുവെള്ളമാണ് ഇവരുടെ ഏക ആശ്രയം. മനുഷ്യർക്കൊപ്പം വന്യജീവികളും ഉപയോഗിക്കുന്ന ഈ വെള്ളം കുടിക്കേണ്ട ഗതികേടിലാണ് കുടുംബങ്ങൾ. കുടിയിൽ നിന്ന് അഞ്ച് കിലോമീറ്റർ അകലെയുള്ള ചോലയിൽനിന്ന് പൈപ്പിലൂടെ വെള്ളമെത്തിച്ചിരുന്നതാണ് ഏക ആശ്വാസം. എന്നാൽ വേനൽ കടുത്തതോടെ നീരുറവകൾ വറ്റുകയും കാട്ടാനകളടക്കമുള്ള വന്യജീവികൾ പൈപ്പുകൾ തകർക്കുകയും ചെയ്തതോടെ ജലവിതരണം നിലച്ചു. പൈപ്പ് പുനഃസ്ഥാപിക്കാൻ ആവശ്യമായ ചെലവ് കണ്ടെത്താനാകാത്തതിനാൽ പദ്ധതി പുനരാരംഭിക്കാനും കഴിഞ്ഞിട്ടില്ല. ആറുമാസത്തിലേറെയായി കാര്യമായ മഴ ലഭിക്കാത്തതാണ് പ്രതിസന്ധി രൂക്ഷമാക്കിയതെന്ന് പ്രദേശവാസികൾ പറയുന്നു. കടുത്ത ചൂടിൽ കൃഷിയും ഉണങ്ങിയതോടെ പുതിയ കൃഷിയിറക്കാനും കഴിയാത്ത അവസ്ഥയാണ്. കുഴിയിലെ വെള്ളവും കുറഞ്ഞുവരുന്നതിനാൽ വരും ദിവസങ്ങളിൽ കുടിവെള്ള പ്രതിസന്ധി കൂടുതൽ രൂക്ഷമാകുമെന്ന ആശങ്കയിലാണ് നാട്ടുകാർ.

ശബരിമല ഇ-ടെൻഡർ അട്ടിമറി; ഉദ്യോഗസ്ഥർ കരാറുകാരെ സഹായിച്ചെന്ന് വിജിലൻസ്

ശബരിമലയിലെ 110 കടകളുടെ ഇ-ടെൻഡറിൽ ക്രമക്കേട് നടന്നതായി ദേവസ്വം വിജിലൻസിന്റെ കണ്ടെത്തൽ. ടെൻഡറിൽ പങ്കെടുത്ത കരാറുകാരുടെ വിവരങ്ങൾ ചോർന്നതായും ഉദ്യോഗസ്ഥർ കരാറുകാരെ സഹായിച്ചതായും കണ്ടെത്തി. ഇതോടെ സെപ്റ്റംബർ 29ന് നടത്താനിരുന്ന ഇ-ലേലം റദ്ദാക്കി. ടെൻഡർ രേഖകളുടെ രഹസ്യസ്വഭാവം നഷ്ടപ്പെട്ട സാഹചര്യത്തിലാണ് നടപടി റദ്ദാക്കിയത്. 110 കടകൾക്കുമായി റീ-ടെൻഡർ നടത്തും. ഉദ്യോഗസ്ഥരുടെ മൊഴി ഈ ആഴ്ച വിജിലൻസ് രേഖപ്പെടുത്തും. കുറ്റക്കാരെന്ന് കണ്ടെത്തുന്നവർക്കെതിരെ നടപടി സ്വീകരിക്കുമെന്നും ദേവസ്വം അറിയിച്ചു.