ധർമ്മശാലയിലെ പടയോട്ടം: ജീവൻമരണ പോരാട്ടത്തിനായി പഞ്ചാബ് കിങ്സും ഡൽഹി ക്യാപിറ്റൽസും
ഹിമാചൽ പ്രദേശിന്റെ മനോഹാരിതയിൽ ധർമ്മശാലയിലെ എച്ച്പിസിഎ സ്റ്റേഡിയം ഐപിഎൽ ആവേശകരമായ ഒരു പോരാട്ടത്തിന് വേദിയാകുകയാണ്. ദലൈലാമയുടെ ആസ്ഥാനമെന്ന നിലയിലും ബുദ്ധമത കേന്ദ്രമെന്ന നിലയിലും ശാന്തത കൈവരിച്ച ഈ നഗരത്തിലേക്ക് ഇന്ന് ഐപിഎല്ലിന്റെ പോരാട്ടവീര്യം വിരുന്നെത്തുന്നു. ധൗലാധർ പർവതനിരകളുടെ പശ്ചാത്തലത്തിൽ നടക്കുന്ന സീസണിലെ 55-ാം മത്സരത്തിൽ പഞ്ചാബ് കിങ്സും ഡൽഹി ക്യാപിറ്റൽസും നേർക്കുനേർ വരുമ്പോൾ, ഇരുടീമുകൾക്കും ഇത് കേവലം ഒരു മത്സരമല്ല, മറിച്ച് പ്ലേ ഓഫ് പ്രതീക്ഷകൾ നിലനിർത്താനുള്ള നിർണ്ണായക യുദ്ധമാണ്. സീസണിന്റെ പകുതി വരെ ആധിപത്യം പുലർത്തിയ പഞ്ചാബ് കിങ്സ് ഇപ്പോൾ ഒരു വലിയ തിരിച്ചടി നേരിടുകയാണ്. ആദ്യ ഏഴ് മത്സരങ്ങളിൽ ആറിലും ജയിച്ച് പോയിന്റ് പട്ടികയിൽ ഒന്നാമതായിരുന്ന പഞ്ചാബ്, തുടർച്ചയായ മൂന്ന് തോൽവികളോടെ മൂന്നാം സ്ഥാനത്തേക്ക് പിന്തള്ളപ്പെട്ടിരിക്കുന്നു. ഓപ്പണർമാരായ പ്രഭ്സിമ്രാൻ സിംഗിന്റെയും പ്രിയാൻഷ് ആര്യയുടെയും ഫോമില്ലായ്മയാണ് ടീമിനെ പ്രധാനമായും അലട്ടുന്നത്. പവർപ്ലേ ഓവറുകളിൽ വിക്കറ്റുകൾ നഷ്ടപ്പെടുന്നത് മധ്യനിരയ്ക്ക് വലിയ സമ്മർദ്ദം നൽകുന്നു. എന്നിരുന്നാലും മാർക്കസ് സ്റ്റോയിനിസിന്റെ മികച്ച ഫോമും കൂപ്പർ കൊണോലിയുടെ സെഞ്ചുറിയും അവർക്ക് ആത്മവിശ്വാസം നൽകുന്നുണ്ട്.ബൗളിംഗിൽ അർഷ്ദീപ് സിംഗിന്റെ ഫോമും ഫീൽഡിംഗിലെ പിഴവുകളും തിരുത്തി വിജയവഴിയിൽ തിരിച്ചെത്താനാണ് ശിഖർ ധവാന്റെ സംഘം ലക്ഷ്യമിടുന്നത്. മറുഭാഗത്ത് ഡൽഹി ക്യാപിറ്റൽസിന് ഇത് അതിജീവനത്തിന്റെ പോരാട്ടമാണ്. പോയിന്റ് പട്ടികയിൽ എട്ടാം സ്ഥാനത്തുള്ള ഡൽഹിക്ക് ഇനിയുള്ള എല്ലാ മത്സരങ്ങളും വിജയിച്ചാൽ മാത്രമേ നേരിയ പ്രതീക്ഷയെങ്കിലും നിലനിർത്താനാകൂ. ആദ്യ രണ്ട് മത്സരങ്ങളിലെ ജയത്തിന് ശേഷം സ്ഥിരതയാർന്ന പ്രകടനം പുറത്തെടുക്കാൻ അവർക്ക് സാധിച്ചിട്ടില്ല. കെഎൽ രാഹുൽ, പതും നിസ്സങ്ക എന്നിവരെ അമിതമായി ആശ്രയിക്കുന്ന ബാറ്റിംഗ് നിരയാണ് അവരുടെ പ്രധാന ദൗർബല്യം. അവസാന മൂന്ന് മത്സരങ്ങളിലും ബാറ്റിംഗിൽ പരാജയപ്പെട്ട അവർക്ക് മിച്ചൽ സ്റ്റാർക്ക്, കുൽദീപ് യാദവ് തുടങ്ങിയ വമ്പൻ പേരുകളുള്ള ബൗളിംഗ് നിരയുടെ സഹായവും വേണ്ടത്ര ലഭിക്കുന്നില്ല. അടുത്ത വർഷത്തെ പ്ലാനുകളെക്കുറിച്ച് അക്സർ പട്ടേൽ സൂചന നൽകിയെങ്കിലും, ഈ സീസണിൽ പൊരുതി നോക്കാൻ തന്നെയാണ് ഡൽഹിയുടെ തീരുമാനം.വേഗമേറിയ ഔട്ട്ഫീൽഡും ചെറിയ ബൗണ്ടറികളുമുള്ള ധർമ്മശാലയിലെ പിച്ച് ബാറ്റിംഗിന് അനുകൂലമാണെങ്കിലും പേസ് ബൗളർമാർക്കും ഇവിടെ ആനുകൂല്യം ലഭിക്കാറുണ്ട്. ചരിത്രപരമായി ഇവിടെ ആദ്യം ബാറ്റ് ചെയ്യുന്ന ടീമുകൾക്കാണ് കൂടുതൽ വിജയസാധ്യത കൽപ്പിക്കപ്പെടുന്നത്. 180 മുതൽ 200 വരെ റൺസ് പിറക്കാൻ സാധ്യതയുള്ള ഈ പിച്ചിൽ ടോസ് ജയിക്കുന്നവർ ബാറ്റിംഗ് തിരഞ്ഞെടുക്കാനാണ് സാധ്യത. പോയിന്റ് പട്ടികയിൽ തങ്ങളുടെ സ്ഥാനം ഭദ്രമാക്കാൻ പഞ്ചാബും, നാണക്കേടിൽ നിന്ന് രക്ഷപ്പെടാൻ ഡൽഹിയും ഇറങ്ങുമ്പോൾ ധർമ്മശാലയിലെ തണുപ്പിലും ക്രിക്കറ്റ് മൈതാനം കനലായി മാറുമെന്ന് ഉറപ്പാണ്.
2026-ലെ നിയമസഭാ തിരഞ്ഞെടുപ്പിൽ 102 സീറ്റുകളുടെ വൻ ഭൂരിപക്ഷത്തോടെ യു.ഡി.എഫ് അധികാരത്തിൽ തിരിച്ചെത്തിയിരിക്കുകയാണ്.
എങ്കിലും ഇത്ര നാളായിട്ടും ആരെയും കണ്ടെത്താനായിട്ടില്ല കോൺഗ്രസിന്റെ ലിസ്റ്റിൽ പ്രധാനമായും മുൻനിരയിലുള്ള മൂന്ന് നേതാക്കളുടെ പേരുകളാണ് മുഖ്യമന്ത്രി സ്ഥാനത്തേക്ക് പ്രധാനമായും ചർച്ച ചെയ്യപ്പെടുന്നത്. താഴെത്തട്ടിൽ നിന്ന് കെട്ടിപ്പടുത്ത ഇവരുടെ രാഷ്ട്രീയ പശ്ചാത്തലവും യോഗ്യതകളും നമുക്കൊന്ന് പരിശോധിച്ചു നോക്കാം. കെ.സി. വേണുഗോപാൽ (63 വയസ്സ്) പയ്യന്നൂർ കോളേജ് യൂണിയൻ ചെയർമാനായും തുടർന്ന് 1988-ൽ കെ.എസ്.യു (KSU) സംസ്ഥാന പ്രസിഡന്റായും പ്രവർത്തിച്ചാണ് ഇദ്ദേഹം നേതൃനിരയിലേക്ക് എത്തിയത്. എ.ഐ.സി.സി സംഘടനാ ജനറൽ സെക്രട്ടറി എന്ന നിലയിൽ ദേശീയതലത്തിൽ പാർട്ടിയെ നയിക്കുന്നതിലുള്ള പരിചയവും ഹൈക്കമാൻഡുമായുള്ള അടുത്ത ബന്ധവും. യു.പി.എ സർക്കാരിൽ സിവിൽ ഏവിയേഷൻ, ഊർജ്ജം തുടങ്ങിയ സുപ്രധാന വകുപ്പുകൾ കൈകാര്യം ചെയ്തതിലൂടെയുള്ള വികസന കാഴ്ചപ്പാട്.(1996): ആലപ്പുഴയിൽ നിന്ന് ആദ്യമായി നിയമസഭയിലെത്തുകയും പിന്നീട് ഉമ്മൻചാണ്ടി സർക്കാരിൽ മന്ത്രിയായും കേന്ദ്രമന്ത്രിയായും പ്രവർത്തിക്കുകയും ചെയ്തു. വിവിധ സംസ്ഥാനങ്ങളിലെ സങ്കീർണ്ണമായ രാഷ്ട്രീയ പ്രശ്നങ്ങൾ പരിഹരിച്ച പരിചയം കേരളത്തിലെ പാർട്ടിയെ ഐക്യത്തോടെ നയിക്കാൻ സഹായിക്കും. രമേശ് ചെന്നിത്തല (69 വയസ്സ്)തന്റെ പതിനെട്ടാം വയസ്സിൽ 1980-ൽ കെ.എസ്.യുവിന്റെ ഏറ്റവും പ്രായം കുറഞ്ഞ സംസ്ഥാന പ്രസിഡന്റായി മാറിക്കൊണ്ടാണ് ചെന്നിത്തല രാഷ്ട്രീയ ജീവിതം തുടങ്ങിയത്. കെ.പി.സി.സി പ്രസിഡന്റ്, ആഭ്യന്തര മന്ത്രി, പ്രതിപക്ഷ നേതാവ് എന്നീ നിലകളിൽ കേരള രാഷ്ട്രീയത്തിന്റെ എല്ലാ തലങ്ങളിലും പ്രവർത്തിച്ചുള്ള ദീർഘകാല അനുഭവസമ്പത്ത്. (1986): തന്റെ 28-ാം വയസ്സിൽ കേരളത്തിലെ ഏറ്റവും പ്രായം കുറഞ്ഞ മന്ത്രിയായി സത്യപ്രതിജ്ഞ ചെയ്ത ചരിത്രം.ആഭ്യന്തര മന്ത്രിയായിരുന്നപ്പോൾ ‘ഓപ്പറേഷൻ കുബേര’ പോലുള്ള പദ്ധതികളിലൂടെ ഭരണപരമായ മികവ് തെളിയിച്ചു. കേരളത്തിലെ സാധാരണ കോൺഗ്രസ് പ്രവർത്തകർക്കിടയിലുള്ള ശക്തമായ സ്വാധീനവും എല്ലാവരെയും ഒന്നിപ്പിക്കുന്ന നേതൃശൈലിയും അദ്ദേഹത്തിന് അനുകൂലഘടകങ്ങളാണ്. വി.ഡി. സതീശൻ (61 വയസ്സ്): 1986-ൽ എം.ജി സർവകലാശാല യൂണിയൻ ചെയർമാനായും പിന്നീട് കെ.എസ്.യു സംസ്ഥാന പ്രസിഡന്റായും പ്രവർത്തിച്ച് വിദ്യാർത്ഥി രാഷ്ട്രീയത്തിലൂടെ ഉയർന്നുവന്നു. 2026-ലെ തിരഞ്ഞെടുപ്പിൽ യു.ഡി.എഫിനെ 102 സീറ്റുകളുടെ വൻ വിജയത്തിലേക്ക് നയിച്ച അമരക്കാരൻ എന്ന നിലയിലുള്ള ജനപിന്തുണ.(2001): പറവൂർ മണ്ഡലത്തിൽ നിന്ന് ആദ്യമായി നിയമസഭയിലെത്തുകയും അവിടെ നിന്ന് തുടർച്ചയായി ആറ് തവണ വിജയിക്കുകയും ചെയ്തു.നിയമസഭയിൽ കണക്കുകളും വസ്തുതകളും നിരത്തി സംസാരിക്കാനുള്ള കഴിവും ആധുനികമായ വികസന കാഴ്ചപ്പാടുകളും. പ്രതിപക്ഷ നേതാവെന്ന നിലയിലുള്ള പോരാട്ട വീര്യവും ജനങ്ങൾക്കിടയിൽ നേടിയെടുത്ത പുതിയ സ്വീകാര്യതയും അദ്ദേഹത്തെ കരുത്തനായ മത്സരാർത്ഥിയാക്കുന്നു.അനുഭവസമ്പത്തും നേതൃപാടവവും ഒത്തിണങ്ങിയ ഈ മൂന്ന് നേതാക്കളിൽ ആര് നയിച്ചാലും അത് കേരളത്തിന്റെ വികസനത്തിന് മികച്ച ഊർജ്ജമാകും. ജനകീയമായ ഈ തിരഞ്ഞെടുപ്പ് പ്രക്രിയയിലൂടെ കേരളത്തിന്റെ ഭാവി നയിക്കാൻ ഏറ്റവും അനുയോജ്യനായ നേതാവിനെ ഹൈക്കമാൻഡ് നിശ്ചയിക്കുമെന്ന് നമുക്ക് പ്രത്യാശിക്കാം.
ദൃശ്യം 3 ജോർജ്ജുകുട്ടിയെ കുടുക്കാൻ മീഡിയ ട്രയൽ ട്രെയിലർ നൽകുന്ന സൂചനകൾ
മലയാള സിനിമയിലെ എക്കാലത്തെയും മികച്ച ഇൻവെസ്റ്റിഗേറ്റീവ് ത്രില്ലർ ഫ്രാഞ്ചൈസികളിലൊന്നായ ദൃശ്യം 3-യുടെ ഔദ്യോഗിക ട്രെയിലർ പുറത്തിറങ്ങിയതോടെ സോഷ്യൽ മീഡിയയിലുടനീളം വലിയ ചർച്ചകളാണ് നടക്കുന്നത്. ജീത്തു ജോസഫ് സംവിധാനം ചെയ്യുന്ന ചിത്രത്തിന്റെ പുതിയ ട്രെയിലർ ഇത്തവണ കൂടുതൽ ഭീതിയും സസ്പെൻസും നിറച്ചാണ് പ്രേക്ഷകരിലേക്ക് എത്തിയിരിക്കുന്നത്. ജോർജ്ജുകുട്ടിയുടെയും കുടുംബത്തിന്റെയും മാനസിക സമ്മർദ്ദങ്ങളും ഭയങ്ങളും ട്രെയിലറിലുടനീളം ശക്തമായി പ്രകടമാകുന്നു. മോഹൻലാൽ അവതരിപ്പിക്കുന്ന ജോർജ്ജുകുട്ടി എന്ന കഥാപാത്രം മുൻപത്തേക്കാൾ കൂടുതൽ ആശങ്കയും സമ്മർദ്ദവും നിറഞ്ഞ ഒരാളായാണ് ഇത്തവണ പ്രത്യക്ഷപ്പെടുന്നത്. ആദ്യ രണ്ട് ഭാഗങ്ങളിലും കുടുംബത്തെ രക്ഷിക്കാൻ ഏത് പരിധിയും കടന്നുപോയ ജോർജ്ജുകുട്ടിയുടെ പഴയ രഹസ്യങ്ങൾ വീണ്ടും പുറത്തുവരുമോ എന്ന ഭയം സിനിമയുടെ പ്രധാന ആകർഷണങ്ങളിലൊന്നായി മാറുന്നു. കുടുംബത്തിനുള്ളിലെ അസ്വസ്ഥതകളും പോലീസ് അന്വേഷണത്തിന്റെ നിഴലും ട്രെയിലറിൽ ശക്തമായി സൂചിപ്പിക്കുന്നുണ്ട്. മീന, എസ്തർ അനിൽ, അൻസിബ ഹസ്സൻ എന്നിവർ വീണ്ടും കുടുംബാംഗങ്ങളായി എത്തുമ്പോൾ, കഥയുടെ പശ്ചാത്തലം ഇത്തവണ കൂടുതൽ സമകാലികമായൊരു തലത്തിലേക്കാണ് നീങ്ങുന്നത്. സോഷ്യൽ മീഡിയയും മീഡിയ ട്രയലും സമൂഹത്തിൽ സൃഷ്ടിക്കുന്ന സ്വാധീനം സിനിമയുടെ കേന്ദ്ര ചർച്ചയാകുന്നുവെന്നാണ് ട്രെയിലർ നൽകുന്ന സൂചന. സമൂഹമാധ്യമങ്ങളിലൂടെയും ടെലിവിഷൻ ചർച്ചകളിലൂടെയും കുറ്റവാളികളല്ലാത്തവർ പോലും വിചാരണ ചെയ്യപ്പെടുന്ന ഇന്നത്തെ സാഹചര്യത്തിൽ, കുറ്റം ചെയ്തിട്ടും അത് മറച്ചുവെച്ചവരെന്ന സംശയത്തിന്റെ നിഴലിൽ ജീവിക്കുന്ന ജോർജ്ജുകുട്ടിയുടെയും കുടുംബത്തിന്റെയും സാമൂഹിക ഒറ്റപ്പെടലാണ് ചിത്രത്തിന്റെ പ്രധാന ഇതിവൃത്തമായി മാറുന്നത്. ജുഡീഷ്യറിയും പോലീസും തെളിവുകളുടെ അഭാവത്തിൽ കേസ് അവസാനിപ്പിച്ചെങ്കിലും, ജോർജ്ജുകുട്ടി കുറ്റക്കാരനാണെന്ന സംശയം സമൂഹത്തിൽ ഇപ്പോഴും നിലനിൽക്കുന്നു. കേസ് വീണ്ടും മാധ്യമങ്ങളിലും സോഷ്യൽ മീഡിയയിലും ചർച്ചയാകുമ്പോൾ, അവിടെ ഉയരുന്ന വിശകലനങ്ങളും പുതിയ കണ്ടെത്തലുകളും പോലീസിന് ലഭിക്കാത്ത തെളിവുകളിലേക്ക് നയിച്ചേക്കാമെന്ന സൂചനയും ട്രെയിലർ നൽകുന്നു. സാങ്കേതിക വിദ്യയും ജനക്കൂട്ട വിചാരണയും നിറഞ്ഞ ഈ കാലഘട്ടത്തിൽ, ജോർജ്ജുകുട്ടി തന്റെ കുടുംബത്തെ എങ്ങനെ സംരക്ഷിക്കുമെന്ന ആകാംക്ഷയിലാണ് ആരാധകർ. ചിത്രത്തിൽ പുതിയ കഥാപാത്രങ്ങളും നിർണായക വേഷങ്ങളിലായി എത്തുന്നുണ്ട്. ദൃശ്യം ഫ്രാഞ്ചൈസിയുടെ മൂന്നാം ഭാഗത്തിനായി ജീത്തു ജോസഫ് ഒളിപ്പിച്ചുവെച്ചിരിക്കുന്ന മറ്റ് രഹസ്യങ്ങൾ എന്താകുമെന്ന കാത്തിരിപ്പിലാണ് ഇപ്പോൾ സിനിമാലോകവും ആരാധകരും.
പ്രൊഫസറുടെ അടുത്ത നീക്കം എന്ത്? മണി ഹീസ്റ്റ് പുത്തൻ ടീസർ പുറത്ത്!
ലോകമെമ്പാടുമുള്ള സിനിമാ പ്രേമികളെ ആവേശത്തിലാഴ്ത്തിക്കൊണ്ട് നെറ്റ്ഫ്ലിക്സ് പുറത്തുവിട്ട ഏറ്റവും പുതിയ ടീസറിലൂടെ ‘മണി ഹീസ്റ്റ്’ വീണ്ടും എത്തുന്നു . 2021-ൽ അഞ്ചാം സീസണോടെ പ്രൊഫസറുടെയും സംഘത്തിന്റെയും കഥ അവസാനിച്ചു എന്ന് കരുതിയിരുന്ന ആരാധകർക്ക് പുതിയ പ്രതീക്ഷകൾ നൽകുന്നതാണ് ഈ പ്രഖ്യാപനം. സ്പെയിനിലെ സെവില്ലെ നഗരത്തിൽ നടന്ന അതിഗംഭീരമായ ഒരു പരിപാടിയിലൂടെയാണ് നെറ്റ്ഫ്ലിക്സ് ഈ പുതിയ നീക്കം വെളിപ്പെടുത്തിയത്. ആയിരക്കണക്കിന് ആരാധകരെ സാക്ഷിയാക്കി, വിഖ്യാതമായ ‘ബെല്ല ചാവോ’ എന്ന വിപ്ലവ ഗാനത്തിന്റെ അകമ്പടിയോടെ ചുവന്ന ജംപ്സ്യൂട്ടും ഡാലി മാസ്കും ധരിച്ച ഒരു വലിയ സംഘം ബോട്ടിലെത്തിയത് വിസ്മയിപ്പിക്കുന്ന കാഴ്ചയായിരുന്നു. പ്രൊഫസറുടെ ബുദ്ധിപരമായ നീക്കങ്ങൾ ഇനിയും അവസാനിച്ചിട്ടില്ലെന്നും, പണത്തിനും സ്വർണ്ണത്തിനുമപ്പുറം ഒരു പുതിയ വിപ്ലവം തുടങ്ങാനിരിക്കുകയാണ് എന്നും സൂചിപ്പിക്കുന്ന ടീസർ ഇപ്പോൾ സോഷ്യൽ മീഡിയയിൽ തരംഗമാണ്. ഈ പുതിയ പ്രഖ്യാപനം ആരാധകർക്കിടയിൽ പല സംശയങ്ങളും ഉണർത്തുന്നുണ്ട്. ഇത് സീരീസിന്റെ ആറാം സീസണാണോ അതോ പഴയ കഥാപാത്രങ്ങളെ ഉൾപ്പെടുത്തിയുള്ള മറ്റേതെങ്കിലും സ്പിൻ-ഓഫ് ആണോ എന്ന കാര്യത്തിൽ ഔദ്യോഗിക സ്ഥിരീകരണം വരാനിരിക്കുന്നതേയുള്ളൂ. നിലവിൽ, മണി ഹീസ്റ്റിലെ ജനപ്രിയ കഥാപാത്രമായ ബെർലിന്റെ ജീവിതം പറയുന്ന ‘ബെർലിൻ’ എന്ന സീരീസിന്റെ രണ്ടാം സീസൺ റിലീസിനൊരുങ്ങുകയാണ്. ഇതിനോടനുബന്ധിച്ചു തന്നെ ഒറിജിനൽ സീരീസിന്റെ തുടർച്ചയോ പുതിയൊരു ഭാഗമോ വരുന്നത് മണി ഹീസ്റ്റ് ആരാധകർക്ക് ഇരട്ടി മധുരമാണ് നൽകുന്നത്. ആഗോളതലത്തിൽ ഏറ്റവും കൂടുതൽ കാഴ്ചക്കാരുള്ള നോൺ-ഇംഗ്ലീഷ് വെബ് സീരീസുകളിൽ ഒന്നായതുകൊണ്ട് തന്നെ, പ്രൊഫസറുടെ അടുത്ത മാസ്റ്റർ പ്ലാൻ കാണാൻ ലോകം മുഴുവൻ കാത്തിരിക്കുകയാണ്.
ഇത് വേറെ ലെവൽ പ്രഖ്യാപനം! അന്താരാഷ്ട്ര ഫുട്ബോൾ വേദിയിൽ വെച്ച് ‘ഗ്രേഷ്യസ് എൽ ക്ലാസ്സിക്കോ’ ടൈറ്റിൽ ലോഞ്ച് ചെയ്തു
മുഹ്സിൻ പരാരി സംവിധാനം ചെയ്ത് ടൊവിനോ തോമസും നസ്രിയ നസീമും പ്രധാന വേഷങ്ങളിൽ എത്തുന്ന ‘ഗ്രേഷ്യസ് എൽ ക്ലാസ്സിക്കോ’ എന്ന പുതിയ ചിത്രത്തിന്റെ ടൈറ്റിൽ ലോഞ്ച് ബാഴ്സലോണയിലെ വിഖ്യാതമായ ക്യാമ്പ് നൗ സ്റ്റേഡിയത്തിൽ വെച്ച് നടന്നു. സ്പാനിഷ് ലാ ലിഗയിൽ ബാഴ്സലോണയും റയൽ മാഡ്രിഡും തമ്മിൽ നടന്ന ആവേശകരമായ എൽ ക്ലാസിക്കോ മത്സരത്തിന്റെ കിക്കോഫ് വേളയിലാണ് ടൊവിനോയും നസ്രിയയും ചേർന്ന് ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടത്. ഒരു മലയാള സിനിമയുടെ പ്രഖ്യാപനം ഇത്തരത്തിൽ ഒരു അന്താരാഷ്ട്ര കായിക വേദിയിൽ വെച്ച് തത്സമയം നടക്കുന്നത് ഇതാദ്യമായാണ്. ‘കെഎൽ 10 പത്ത്’ എന്ന ചിത്രത്തിന് ശേഷം മുഹ്സിൻ പരാരി സംവിധാനം ചെയ്യുന്ന ഈ സിനിമയ്ക്ക് വേണ്ടി അദ്ദേഹം സക്കരിയയുമായി ചേർന്നാണ് തിരക്കഥ ഒരുക്കിയിരിക്കുന്നത്. എ ആൻഡ് എച്ച് എസ് പ്രൊഡക്ഷൻസ്, ഹാപ്പി അവേഴ്സ് എന്റർടെയ്ൻമെന്റ്സ്, ബാബുഏട്ടൻ ഫിലിംസ്, ദി റൈറ്റിംഗ് കമ്പനി എന്നീ ബാനറുകളിൽ സമീർ താഹിർ, ഷൈജു ഖാലിദ്, സജിൻ അലി, അബ്ബാസ് തിരുനാവായ എന്നിവർ ചേർന്നാണ് ചിത്രം നിർമ്മിക്കുന്നത്. സുഷിൻ ശ്യാം സംഗീതം നിർവ്വഹിക്കുന്ന ചിത്രത്തിന്റെ ഛായാഗ്രഹണം വിഷ്ണു തണ്ടശ്ശേരിയാണ്. ടൊവിനോയും നസ്രിയയും ആദ്യമായി ഒന്നിക്കുന്ന ഈ ചിത്രം ഫുട്ബോൾ ആവേശത്തിന് വലിയ പ്രാധാന്യം നൽകുന്ന ഒന്നായിരിക്കുമെന്നാണ് പറയപ്പെടുന്നത്.
സോഷ്യൽ മീഡിയയിലെ ‘നാഗ ചേച്ചി’ ഇനി വെള്ളിത്തിരയിൽ; ‘സോഷ്യൽ സ്വാമി’ ഫസ്റ്റ് ലുക്ക് പോസ്റ്റർ പുറത്ത്!
സോഷ്യൽ മീഡിയയിലൂടെ മലയാളി പ്രേക്ഷകർക്ക് സുപരിചിതയായ നാഗ സൈരന്ധ്രി സിനിമയിലേക്ക് ചുവടുവെക്കുന്നു. ഡോ. അഭിലാഷ് ബാബു രചനയും സംവിധാനവും നിർവഹിക്കുന്ന ‘സോഷ്യൽ സ്വാമി’ എന്ന ചിത്രത്തിലൂടെയാണ് സൈരന്ധ്രിയുടെ അരങ്ങേറ്റം. തിരുവനന്തപുരത്ത് വെച്ചു നടന്ന എട്ടാമത് ഇൻഡിപെൻഡന്റ് ആൻഡ് എക്സ്പിരിമെന്റൽ ഫിലിം ഫെസ്റ്റിവൽ വേദിയിൽ വെച്ച് ചിത്രത്തിന്റെ ഫസ്റ്റ് ലുക്ക് പോസ്റ്റർ ഔദ്യോഗികമായി പുറത്തിറക്കി. തനതായ സംസാരശൈലിയും ബാബു സ്വാമിയെ കുറിച്ചുള്ള പരാമർശങ്ങളും വഴി സൈബർ ഇടങ്ങളിൽ വലിയ രീതിയിൽ ട്രോളുകൾക്കും ചർച്ചകൾക്കും വിധേയയായ വ്യക്തിയാണ് നാഗ സൈരന്ധ്രി. നിഗൂഢതകൾ നിറഞ്ഞ അവരുടെ വ്യക്തിത്വവും കാഴ്ചപ്പാടുകളും സിനിമയാകുമ്പോൾ അത് പ്രേക്ഷകരിൽ വലിയ കൗതുകമാണ് ഉണർത്തുന്നത്.‘സോഷ്യൽ സ്വാമി’ എന്ന പേര് തന്നെ നാഗ സൈരന്ധ്രിയുടെ സോഷ്യൽ മീഡിയാ ജീവിതവുമായി ബന്ധപ്പെട്ടതാണെന്ന സൂചനയാണ് നൽകുന്നത്. തിരുവനന്തപുരം ‘ദ വീക്കെൻഡ് അക്കാദമി’യുടെ ബാനറിൽ ക്രൗഡ് ഫണ്ടിംഗിലൂടെയാണ് (ജനകീയ കൂട്ടായ്മയിലൂടെ) ഈ ചിത്രം നിർമ്മിക്കുന്നത് എന്ന പ്രത്യേകതയും ഇതിനുണ്ട്. ഗൗതം ലെനിൻ ഛായാഗ്രഹണവും പ്രവീൺ വിജയ് എഡിറ്റിംഗും നിർവഹിക്കുന്നു. നിലവിൽ സിനിമയുടെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ഒരു സാധാരണ വ്യക്തി സോഷ്യൽ മീഡിയയിലൂടെ എങ്ങനെ സെലിബ്രിറ്റിയായി മാറുന്നുവെന്നും അതിനു പിന്നിലെ കൗതുകകരമായ വശങ്ങളുമാകാം ചിത്രം ചർച്ച ചെയ്യുന്നതെന്നാണ് സൂചനകൾ.
ലേഡി സൂപ്പര്സ്റ്റാര് ഇനി ‘ഹാപ്പിലൂപ്പില്’!പുത്തന് ടൈറ്റില് പോസ്റ്റര് പുറത്ത്.
ഒരിടവേളക്ക് ശേഷം ലേഡി സൂപ്പര്സ്റ്റാര് വീണ്ടും മലയാളക്കരയിലേക്ക്..മഞ്ജു വാര്യരെ കേന്ദ്ര കഥാപാത്രമാക്കി ആനന്ദ് മേനന് സംവിധാനം ചെയ്യുന്ന ‘ഹാപ്പിലൂപ്പ്’ എന്ന ചിത്രത്തിന്റെ ടൈറ്റില് അനൗണ്സ്മെന്റ്റ് പോസ്റ്റര് റിലീസ് ആയി. ഗൗതമന്റെ രഥം’, ‘വാഴ’ എന്നീ ഹിറ്റുകള്ക്ക് ശേഷം ആനന്ദ് മേനോന് ഒരുക്കുന്ന ഈ ഹാപ്പിലൂപ്പാണ് ഇപ്പോള് സിനിമാപ്രേമികള്ക്കിടയില് തരംഗമാവുന്നത്.മഞ്ജു വാര്യര്ക്കൊപ്പം മുകേഷ്, മധു വാര്യര്,നിശാന്ത് സാഗര്,ജെ.പി തുമിനാട്, ആതിര രാജീവ്, അനു, നിധിന്യ, നീരജ രാജേന്ദ്രന്, വി. കെ പ്രകാശ്, എന്നീ വന് താരനിര തന്നെ ചിത്രത്തിൽ അണിനിരക്കുന്നുണ്ട്. മൂവി ബക്കറ്റിന്റെ ബാനറില് ബിനീഷ് ചന്ദ്രന് നിര്മ്മിക്കുന്ന ചിത്രത്തിന്റെ കഥയും തിരക്കഥയും ഒരുക്കുന്നത് ആഷിഖ് ഐമര് ആണ്.ഛായാഗ്രഹണം ഗൗതം ശങ്കര്, എഡിറ്റര് – കണ്ണന് മോഹന്, സംഗീതം ഇലക്ട്രോണിക് കിളി& പാര്വതീഷ് പ്രദീപ്, പ്രൊഡക്ഷന് ഡിസൈനര് ക്രിപേഷ് അയ്യപ്പന്കുട്ടി, എക്സിക്യൂട്ടീവ് പ്രൊഡ്യൂസര് – അനീഷ് സി സലിം, പ്രൊഡക്ഷന് കണ്ട്രോളര് ഷബീര് മലവട്ടത്ത്, ചീഫ് അസോസിയേറ്റ് – ബിനു ജി നായര്, മേക്കപ്പ് – റോണക്സ് സേവ്യര്, വസ്ത്രാലങ്കാരം – ലിജി പ്രേമന്, വി എഫ് എക്സ് പ്രോമൈസ്, സ്റ്റില്സ് – രോഹിത് കെ സുരേഷ്, പി ആര് ഒ എ എസ് ദിനേശ്, ശബരി, പോസ്റ്റര് ഡിസൈന് റോസ്റ്റഡ് പേപ്പര്, ടൈറ്റില് ഡിസൈന് – ഡെല്ലു. വാഴ’യുടെ വന് വിജയത്തിന് ശേഷം ആനന്ദ് മേനോന് സംവിധാനം ചെയ്യുന്ന ഈ ചിത്രം ഒരു കംപ്ലീറ്റ് പാക്കേജ് ആയിരിക്കുമെന്നതില് സംശയമില്ല.വന് താരനിരയും കിടിലന് അണിയറ പ്രവര്ത്തകരും ഒന്നിക്കുന്ന ഹാപ്പിലൂപ്പിനായുള്ള കാത്തിരിപ്പിലാണ് ഇപ്പോൾ ആരാധകർ.
ആഗോള പ്രതിസന്ധി നിയന്ത്രണങ്ങളിലേക്ക് മടങ്ങാൻ പ്രധാനമന്ത്രിയുടെ ആഹ്വാനം
പശ്ചിമേഷ്യൻ സംഘർഷം ലോക സമ്പദ്വ്യവസ്ഥയെ ഉലയ്ക്കുമ്പോൾ, ഇന്ത്യയെ സാമ്പത്തിക പ്രത്യാഘാതങ്ങളിൽ നിന്ന് സംരക്ഷിക്കാൻ നിർണ്ണായകമായ ചില ‘സ്വയം നിയന്ത്രണങ്ങൾ’ മുന്നോട്ടുവെച്ചിരിക്കുകയാണ് പ്രധാനമന്ത്രി നരേന്ദ്ര മോദി. ഹൈദരാബാദിൽ നടന്ന ചടങ്ങിൽ സംസാരിക്കവെ, കോവിഡ് കാലത്തെ നിയന്ത്രണങ്ങളെ അനുസ്മരിപ്പിക്കുന്ന വിധം ജീവിതശൈലിയിൽ മാറ്റങ്ങൾ വരുത്താൻ അദ്ദേഹം രാജ്യത്തെ പൗരന്മാരോട് ആവശ്യപ്പെട്ടു. ഇതൊരു സർക്കാർ ഉത്തരവല്ലെന്നും മറിച്ച് രാജ്യത്തോടുള്ള പൗരന്റെ കടമയാണെന്നും അദ്ദേഹം വ്യക്തമാക്കി. എന്തുകൊണ്ടാണ് ഈ നിയന്ത്രണങ്ങൾ? ഇന്ത്യയുടെ സാമ്പത്തിക അടിത്തറ പ്രധാനമായും ഇറക്കുമതിയെയാണ് ആശ്രയിച്ചിരിക്കുന്നത്. നിലവിൽ പശ്ചിമേഷ്യയിലെ യുദ്ധസാഹചര്യം ക്രൂഡ് ഓയിൽ വില ബാരലിന് 120 ഡോളറിലേക്ക് എത്തിച്ചിരിക്കുകയാണ് (മുമ്പ് ഇത് 70 ഡോളറായിരുന്നു). ഇന്ത്യയുടെ ആവശ്യകതയുടെ 90 ശതമാനം ഇന്ധനവും വിദേശത്തുനിന്ന് വരുന്നതിനാൽ, ഇറക്കുമതി ചിലവ് ഇരട്ടിയായി വർദ്ധിച്ചു. കഴിഞ്ഞ കുറച്ചു മാസങ്ങൾക്കുള്ളിൽ ഇന്ത്യയുടെ വിദേശനാണ്യ ശേഖരത്തിൽ (Forex Reserves) മാത്രം 30 ബില്യൺ ഡോളറിന്റെ കുറവുണ്ടായിട്ടുണ്ട്. ഈ ചോർച്ച തടയാനാണ് ‘മുൻകരുതൽ പ്രതിരോധ’ പാക്കേജുമായി പ്രധാനമന്ത്രി രംഗത്തെത്തിയത്. പ്രധാനപ്പെട്ട നിർദ്ദേശങ്ങൾ: ഇന്ധന ഉപഭോഗം കുറയ്ക്കുക ഓഫീസുകൾ സാധ്യമായ ഇടങ്ങളിൽ ‘വർക്ക് ഫ്രം ഹോം’ രീതിയിലേക്ക് മാറണം. ഓൺലൈൻ മീറ്റിംഗുകളും വെർച്വൽ ക്ലാസുകളും വീണ്ടും സജീവമാക്കണം. ഇത് ഇന്ധന ലാഭത്തോടൊപ്പം നഗരങ്ങളിലെ ഗതാഗതക്കുരുക്ക് കുറയ്ക്കാനും സഹായിക്കും. യാത്രകൾക്കായി പൊതുഗതാഗതമോ ഇലക്ട്രിക് വാഹനങ്ങളോ ഉപയോഗിക്കാൻ അദ്ദേഹം ആഹ്വാനം ചെയ്തു. സ്വർണ്ണത്തിൽ നിയന്ത്രണം അന്താരാഷ്ട്ര വിപണിയിൽ സ്വർണ്ണവില കുതിച്ചുയരുന്ന സാഹചര്യത്തിൽ, അനാവശ്യമായ സ്വർണ്ണ ഇറക്കുമതി രാജ്യത്തിന്റെ വിദേശനാണ്യ ശേഖരത്തെ ബാധിക്കുന്നു. അതിനാൽ ആഘോഷ വേളകളിൽ സ്വർണ്ണം വാങ്ങുന്നത് പരമാവധി ഒഴിവാക്കണമെന്ന് അദ്ദേഹം ചൂണ്ടിക്കാട്ടി. വിദേശയാത്രകളും വിവാഹങ്ങളും വിദേശ രാജ്യങ്ങളിലെ വിവാഹ ആഘോഷങ്ങളും (Destination Weddings) അത്യാവശ്യമല്ലാത്ത വിനോദയാത്രകളും ഒരു വർഷത്തേക്ക് മാറ്റിവെക്കണം. പകരം പ്രാദേശിക ടൂറിസത്തെ പ്രോത്സാഹിപ്പിക്കുന്നത് രാജ്യത്തെ പണം രാജ്യത്ത് തന്നെ നിൽക്കാൻ സഹായിക്കും. കാർഷിക-വാണിജ്യ മേഖല രാസവളങ്ങളുടെ ഇറക്കുമതി ചിലവ് കുറയ്ക്കാൻ കർഷകർ പ്രകൃതിദത്ത വളങ്ങളിലേക്ക് മാറണം. കൃഷിയിടങ്ങളിൽ ഡീസൽ പമ്പുകൾക്ക് പകരം സോളാർ പമ്പുകൾ ഉപയോഗിക്കണം. ചരക്ക് നീക്കത്തിനായി ബിസിനസ്സ് ഉടമകൾ റോഡ് ഗതാഗതത്തിന് പകരം റെയിൽവേയെ കൂടുതൽ ആശ്രയിക്കണം. പാചക എണ്ണ വലിയ തോതിൽ ഇറക്കുമതി ചെയ്യുന്ന പാചക എണ്ണയുടെ ഉപയോഗം 50 ശതമാനമെങ്കിലും കുറയ്ക്കുന്നത് സാമ്പത്തിക ഭദ്രതയ്ക്കും ജനങ്ങളുടെ ആരോഗ്യത്തിനും ഒരുപോലെ ഗുണകരമാണ്.അമേരിക്ക ഉൾപ്പെടെയുള്ള വൻശക്തികൾ സ്വന്തം സാമ്പത്തിക താല്പര്യങ്ങൾ സംരക്ഷിക്കുമ്പോൾ, ഇന്ത്യയെപ്പോലുള്ള രാജ്യങ്ങൾ കരുതലോടെ നീങ്ങണമെന്നാണ് ഈ നിർദ്ദേശങ്ങൾ സൂചിപ്പിക്കുന്നത്. ഒരു വർഷത്തെ ഈ സ്വയം നിയന്ത്രണം രാജ്യത്തിന്റെ വിദേശനാണ്യ ശേഖരം വർദ്ധിപ്പിക്കാനും ഊർജ്ജ ചിലവ് കുറയ്ക്കാനും അത്യന്താപേക്ഷിതമാണെന്ന് പ്രധാനമന്ത്രി ഓർമ്മിപ്പിച്ചു.