അക്വേറിയത്തിലെ മീനുകൾ ചത്തു ; മനംനൊന്ത് യുവാവ് ജീവനൊടുക്കി
ഉത്തർപ്രദേശിലെ കാൺപൂരിൽ നിന്ന് ഏറെ ദാരുണവും വിചിത്രവുമായ ഒരു മരണവാർത്തയാണ് ഇപ്പോൾ പുറത്തുവരുന്നത്. തന്റെ അക്വേറിയത്തിലെ പ്രിയപ്പെട്ട വളർത്തു മീനുകൾ ചത്തുപോയതിൽ അതീവ ദുഃഖിതനായ ഒരു യുവാവ് സ്വന്തം ജീവനൊടുക്കി. കഴിഞ്ഞ വെള്ളിയാഴ്ച കാൺപൂരിൽ മണിക്കൂറുകളോളം നീണ്ടുനിന്ന കടുത്ത പവർകട്ടാണ് ഈ വൻ ദുരന്തത്തിന് വഴിയൊരുക്കിയത്. അക്വേറിയം ടാങ്കിലേക്ക് ആവശ്യമായ ഓക്സിജൻ എത്തിക്കുന്ന മോട്ടോർ ഉപകരണം വൈദ്യുതിയില്ലാത്തതിനാൽ പ്രവർത്തിപ്പിക്കാൻ കഴിഞ്ഞിരുന്നില്ല. പവർകട്ട് ദീർഘനേരം നീണ്ടതോടെ ശ്വാസമെടുക്കാൻ കഴിയാതെ അക്വേറിയത്തിലെ മീനുകൾ ഒന്നൊന്നായി ചത്തുപൊങ്ങുകയായിരുന്നു. തന്റെ സമയത്തിന്റെ ഭൂരിഭാഗവും മീനുകളെ പരിപാലിക്കാനും അക്വേറിയം ഭംഗിയാക്കാനും മാറ്റിവെച്ചിരുന്ന യുവാവിന് ഈ കാഴ്ച താങ്ങാൻ കഴിയുന്നതിലും അപ്പുറമായിരുന്നു. വളർത്തു മീനുകളുടെ അപ്രതീക്ഷിത മരണം വലിയ മാനസികവിഷമമുണ്ടാക്കിയതിനെ തുടർന്ന് യുവാവ് സ്വന്തം മുറിയിൽ കയറി വാതിലടക്കുകയായിരുന്നു. പിറ്റേന്ന് ഏറെ വൈകിയിട്ടും മകൻ പുറത്തേക്ക് വരാത്തതിനെ തുടർന്ന് പിതാവ് ബലം പ്രയോഗിച്ച് മുറിയുടെ വാതിൽ തുറന്നപ്പോഴാണ് മകനെ തൂങ്ങിമരിച്ച നിലയിൽ കണ്ടെത്തിയത്. മകന് മീനുകളോട് അതീവ വൈകാരികമായ അടുപ്പമുണ്ടായിരുന്നെന്നും അവയുടെ മരണം അവനെ തളർത്തിയെന്നും പിതാവ് പറഞ്ഞു . എന്നാൽ മീനുകൾ ചത്തതിന്റെ പേരിൽ മാത്രം ഒരാൾ ജീവനൊടുക്കുമോ എന്ന സംശയം പോലീസിനുണ്ട്. മരണത്തിന് പിന്നിൽ മറ്റ് കാരണങ്ങൾ വല്ലതുമുണ്ടോ എന്നറിയാൻ മൃതദേഹം പോസ്റ്റ്മോർട്ടത്തിന് അയച്ച് അന്വേഷണം ആരംഭിച്ചിരിക്കുകയാണ് അധികൃതർ.
സ്വയംചികിത്സയ്ക്ക് പൂട്ടിട്ട് കേന്ദ്ര സർക്കാർ; കഫ് സിറപ്പുകൾക്ക് ഇനി കൃത്യമായ കുറിപ്പടി വേണം
നമുക്കൊരു ചെറിയ ചുമയോ ജലദോഷവോ വന്നാൽ അടുത്തുള്ള ഫാർമസിയിൽ പോയി നേരിട്ട് കഫ് സിറപ്പ് വാങ്ങി കുടിക്കുന്ന ശീലത്തിന് ഇനി നിയമപരമായ തടസ്സം നേരിടും. ചുമയ്ക്കുള്ള സിറപ്പുകൾ ഉൾപ്പെടെ, കുടിക്കുന്ന രൂപത്തിലുള്ള എല്ലാ മരുന്നുകളും വാങ്ങുന്നതിന് ഡോക്ടറുടെ കൃത്യമായ കുറിപ്പടി (Prescription) കേന്ദ്ര സർക്കാർ നിർബന്ധമാക്കിയിരിക്കുകയാണ്. ഡ്രഗ്സ് ചട്ടങ്ങളിൽ കേന്ദ്ര ആരോഗ്യ മന്ത്രാലയം വരുത്തിയ പുതിയ ഭേദഗതി പ്രകാരം സിറപ്പുകൾക്ക് ഇതുവരെ ലഭിച്ചിരുന്ന ഇളവുകൾ പൂർണ്ണമായും ഇല്ലാതായി. എന്നാൽ ചുമയ്ക്കുള്ള ഗുളികകൾക്കും ലൊസഞ്ചസുകൾക്കും ഈ നിയന്ത്രണം ബാധകമല്ല. വിപണിയിലുള്ള ചില ചുമ സിറപ്പുകളുടെ സുരക്ഷിതത്വത്തെക്കുറിച്ച് രാജ്യത്തുണ്ടായ കടുത്ത ആശങ്കകളാണ് ഈ തീരുമാനത്തിന് പിന്നിൽ. ചില സംസ്ഥാനങ്ങളിൽ കഫ് സിറപ്പുകളിൽ അനുവദനീയമായതിലും കൂടുതൽ അളവിൽ മാരക വിഷാംശങ്ങൾ കണ്ടെത്തുകയും, അത് കഴിച്ച് കുട്ടികൾ മരണപ്പെടുകയും ചെയ്ത സംഭവങ്ങൾ റിപ്പോർട്ട് ചെയ്യപ്പെട്ടിരുന്നു. ഇതിനുപുറമേ, ഡോക്ടറുടെ നിർദ്ദേശമില്ലാതെ ആളുകൾ ഇത്തരം സിറപ്പുകൾ അമിതമായി വാങ്ങി കഴിക്കുന്നതും വലിയ ആരോഗ്യപ്രശ്നങ്ങൾ സൃഷ്ടിക്കുന്നുണ്ട്. മരുന്നുകളുടെ ഇത്തരം ദുരുപയോഗവും വ്യാജ വിപണനവും പൂർണ്ണമായി തടയുകയാണ് പുതിയ നിയമത്തിന്റെ ലക്ഷ്യം. ഈ ഉത്തരവ് പ്രാബല്യത്തിൽ വരുന്നതോടെ ഡോക്ടറുടെ കുറിപ്പടിയില്ലാതെ സിറപ്പുകൾ വിൽക്കുന്ന ഫാർമസികൾക്കെതിരെ കടുത്ത നടപടിയുണ്ടാകും. തുടക്കത്തിൽ പൊതുജനങ്ങൾക്ക് ഇത് ചെറിയ ബുദ്ധിമുട്ടുണ്ടാക്കുമെങ്കിലും, കുട്ടികളുടെയും മുതിർന്നവരുടെയും ആരോഗ്യ സുരക്ഷയ്ക്ക് ഈ നിയമം ഏറെ ഗുണം ചെയ്യുമെന്നാണ് വിലയിരുത്തപ്പെടുന്നത്. അതിനാൽ ഇനി ചുമ വരുമ്പോൾ സ്വയംചികിത്സയ്ക്ക് മുതിരാതെ ഒരു ഡോക്ടറുടെ നിർദ്ദേശം തേടാൻ മടിക്കരുത്.
ചരിത്രത്തിൽ സ്വന്തം അജണ്ടകൾ കലർത്തരുത്; ജനവികാരത്തിന് മുന്നിൽ തലകുനിച്ച് NCERT
സിന്ധുനദീതട സംസ്കാരത്തിന്റെ പ്രതീകമായ, മോഹൻജൊദാരോയിൽ നിന്ന് കണ്ടെടുത്ത ‘ഡാൻസിങ് ഗേൾ’ എന്ന വെങ്കല ശിൽപ്പത്തെക്കുറിച്ച് നമ്മളിൽ ഭൂരിഭാഗം പേരും സ്കൂളിൽ പഠിച്ചിട്ടുണ്ടാകും. ഏകദേശം അയ്യായിരത്തോളം വർഷം പഴക്കമുള്ള, നമ്മുടെ രാജ്യത്തിന്റെ അഭിമാനമായ ഒരു ചരിത്ര സ്മാരകമാണത്. എന്നാൽ കഴിഞ്ഞ കുറച്ചുദിവസങ്ങളായി ഈ ശിൽപ്പവുമായി ബന്ധപ്പെട്ട് NCERT വരുത്തിയ മാറ്റങ്ങൾ വലിയ ചർച്ചയായിരുന്നു.ഒൻപതാം ക്ലാസിലെ പുതിയ പാഠപുസ്തകത്തിൽ ഈ ശിൽപ്പത്തിന്റെ യഥാർത്ഥ രൂപം മാറ്റി, ശരീരഭാഗങ്ങളിൽ എഡിറ്റിങ്ങിലൂടെ കറുത്ത ഷേഡിങ് നൽകി വസ്ത്രം ധരിപ്പിച്ചത് പോലെ വികലമാക്കിയായിരുന്നു NCERT ഉൾപ്പെടുത്തിയത്. “കുട്ടികളുടെ പ്രായത്തിന് അനുയോജ്യമല്ല” എന്ന വിചിത്രമായ ന്യായീകരണമാണ് ഇതിന് അവർ നൽകിയത്. വിക്ടോറിയൻ കാലഘട്ടത്തിലെ ധാർമ്മികബോധം മനസ്സിൽ വെച്ചുകൊണ്ട് നമ്മുടെ പുരാതന ചരിത്രത്തെ സെൻസർ ചെയ്യാൻ ശ്രമിച്ച ഈ നടപടി വലിയ കഷ്ടമാണ്.നമ്മുടെ പുരാതനമായ കലകളും രീതികളും ആചാരങ്ങളുമൊക്കെ എന്താണോ, അത് അതേപടി തന്നെ പുസ്തകങ്ങളിൽ വരണം. അന്നത്തെ ജനങ്ങളുടെ ജീവിതരീതിയും വസ്ത്രധാരണവും കലയുമൊക്കെ കുട്ടികൾ മനസ്സിലാക്കേണ്ടത് അതിന്റെ തനിമയോട് കൂടിയാണ്. അല്ലാതെ, ഇന്നത്തെ കാലത്തെ നമ്മുടെ ഇഷ്ടാനിഷ്ടങ്ങൾക്കും കാഴ്ചപ്പാടുകൾക്കും അനുസരിച്ച് ചരിത്ര വസ്തുതകളെ എഡിറ്റ് ചെയ്യാനും ഒളിച്ചുവെക്കാനും ശ്രമിക്കുന്നത് വരുംതലമുറയോട് ചെയ്യുന്ന വലിയൊരു ചതിയാണ്. ചരിത്രത്തെയും സംസ്കാരത്തെയും ഇത്തരത്തിൽ വികലമാക്കുന്നതിനെതിരെ രാജ്യവ്യാപകമായി വലിയ പ്രതിഷേധമാണ് ഉയർന്നത്. ചരിത്രകാരന്മാരും അധ്യാപകരും പൊതുജനങ്ങളും ഇതിനെതിരെ ശക്തമായി രംഗത്തുവന്നു.എന്തായാലും, ഈ ശക്തമായ ജനവികാരത്തിന് മുന്നിൽ NCERT-ക്ക് ഒടുവിൽ തിരുത്തൽ വരുത്തേണ്ടി വന്നിരിക്കുകയാണ്. പാഠപുസ്തകത്തിലെ ആ എഡിറ്റ് ചെയ്ത ചിത്രം മാറ്റി, ശിൽപ്പത്തിന്റെ യഥാർത്ഥ രൂപം തന്നെ ഇനി ഉൾപ്പെടുത്തുമെന്ന് NCERT ഇപ്പോൾ ഔദ്യോഗികമായി അറിയിച്ചിട്ടുണ്ട്.നമ്മുടെ ചരിത്രവും ആചാരങ്ങളും അതിന്റെ പൂർണ്ണതയോടെയും തനിമയോടെയും തന്നെ കുട്ടികൾ പഠിക്കട്ടെ.
മൃഗതുല്യമായ പീഡനം: മധ്യപ്രദേശിൽ ഭാര്യയെ തൂണിൽ കെട്ടിയിട്ട് ക്രൂരമായി ഉപദ്രവിച്ച ഭർത്താവ് പിടിയിൽ
മനസ്സാക്ഷിയെ മരവിപ്പിക്കുന്ന അതിക്രൂരമായ ആഭ്യന്തര പീഡനത്തിന്റെ വാർത്തയാണ് മധ്യപ്രദേശിലെ രാജ്ഗഡ് ജില്ലയിലുള്ള ഖിൽച്ചിപൂരിൽ നിന്നും പുറത്തുവരുന്നത്. മംഗീബായ് തൻവാർ എന്ന യുവതി ഭർത്താവിൽ നിന്ന് നേരിട്ടത് കേട്ടാൽ ആരുടെയും ചോര തിളച്ചുപോകും. മദ്യപിച്ചെത്തി വഴക്കുണ്ടാക്കിയ ഭർത്താവ് സർദാർ സിങ്, മംഗീബായിയെ ക്രൂരമായി മർദ്ദിക്കുകയായിരുന്നു. ഇതേത്തുടർന്ന് പരാതിപ്പെടാൻ രാത്രിയിൽ പോലീസ് സ്റ്റേഷനിലേക്ക് ഇറങ്ങിത്തിരിച്ച യുവതിയെ വഴിയിൽ വെച്ച് ഭർത്താവ് വീണ്ടും ആക്രമിക്കുകയും ബലമായി വീട്ടിലേക്ക് തിരികെ കൊണ്ടുവരികയും ചെയ്തു. പിന്നീട് ഒരു മൃഗത്തോടെന്ന പോലെയായിരുന്നു പെരുമാറ്റം. പോലീസിൽ അറിയിക്കാൻ ഇനി എങ്ങനെ പോകുമെന്ന് വെല്ലുവിളിച്ചുകൊണ്ട് യുവതിയുടെ കഴുത്തിൽ കനത്ത ഇരുമ്പ് ചങ്ങലയിട്ട് വീട്ടുതൂണിൽ പൂട്ടിയിട്ടു. അത്രയൊന്നുമായിരുന്നില്ല, ഗ്യാസ് സ്റ്റൗവിൽ ഇരുമ്പ് വടി പഴുപ്പിച്ചെടുത്ത് മംഗീബായിയുടെ അരക്കെട്ടിലും തുടയിലുമെല്ലാം ആവർത്തിച്ച് പൊള്ളിച്ചേൽപ്പിച്ചു.നിലവിളിച്ചിട്ടും ആരും രക്ഷയ്ക്കെത്താതിരുന്ന ആ നരകത്തിൽ 24 മണിക്കൂറോളമാണ് അവർ തടവിലായത്. പോലീസിൽ പോകില്ലെന്ന് നാട്ടുകാരെക്കൂട്ടി കരാറുണ്ടാക്കാൻ ഭർത്താവ് ഗ്രാമവാസികളെ വിളിക്കാൻ പുറത്തുപോയ സമയത്താണ് ആ സ്ത്രീ ജീവനുവേണ്ടി പോരാടിയത്. വീട്ടിൽ കിടന്ന ഒരു കല്ലെടുത്ത് കഴുത്തിലെ പൂട്ടിലേക്ക് അവർ ആഞ്ഞാഞ്ഞു അടിച്ചു. ഒടുവിൽ ആ പൂട്ടിന്റെ കണ്ണി അല്പം അയഞ്ഞതോടെ, കഴുത്തിലെ ചങ്ങലയും തൂങ്ങിക്കിടക്കുന്ന പൂട്ടും മാറ്റാൻ നിൽക്കാതെ അവർ ജീവനുംകൊണ്ട് ഇറങ്ങിയോടി. ഇരുട്ടുനിറഞ്ഞ പാതകളിലൂടെയും മുള്ളുകൾ നിറഞ്ഞ കാട്ടുപ്രദേശങ്ങളിലൂടെയും കാലുകൾ ചോരയൊലിപ്പിച്ചു കൊണ്ട് ആറ് കിലോമീറ്ററോളമാണ് ആ സ്ത്രീ നടന്നുതീർത്തത്. വഴിയിൽ കണ്ടവർ കഴുത്തിലെ ചങ്ങല കണ്ട് അവർക്ക് ഭ്രാന്താണെന്ന് കരുതി അവഗണിച്ചപ്പോഴും അവർ തോറ്റുകൊടുത്തില്ല.രാത്രി പത്തു മണിയോടെ കഴുത്തിൽ ചങ്ങലയുമായി ചോരയൊലിപ്പിച്ചു കൊണ്ട് സ്റ്റേഷനിലേക്ക് കയറിവന്ന മംഗീബായിയെ കണ്ട് ഡ്യൂട്ടിയിലുണ്ടായിരുന്ന പോലീസുകാർ പോലും ഒരു നിമിഷം തരിച്ചുപോയി. ഉടൻ തന്നെ പോലീസ് ചങ്ങല അഴിച്ചുമാറ്റി അവർക്ക് വൈദ്യസഹായം ലഭ്യമാക്കുകയും ക്രൂരനായ ഭർത്താവിനെ അറസ്റ്റ് ചെയ്യുകയും ചെയ്തു. സ്വന്തം വീട്ടിൽ ഒരു സ്ത്രീക്ക് അനുഭവിക്കേണ്ടി വന്ന ഈ അതിക്രമം നാണക്കേടാണ്. മൃഗതുല്യനായ ഈ കുറ്റവാളിക്ക് നിയമം നൽകാവുന്നതിൽ വെച്ച് ഏറ്റവും കടുത്ത ശിക്ഷ തന്നെ ഉറപ്പാക്കണം.
നീറ്റ് പുനഃപരീക്ഷ: രാജ്യത്ത് ടെലിഗ്രാമിന് താൽക്കാലിക നിരോധനം; കടുത്ത നടപടികളുമായി കേന്ദ്രം
വരാനിരിക്കുന്ന നീറ്റ്-യുജി പുനഃപരീക്ഷയുടെ സുതാര്യത ഉറപ്പാക്കുന്നതിനായി പ്രമുഖ മെസേജിങ് പ്ലാറ്റ്ഫോമായ ടെലിഗ്രാമിന് രാജ്യത്ത് താൽക്കാലിക നിരോധനം ഏർപ്പെടുത്തി കേന്ദ്ര സർക്കാർ ഉത്തരവിട്ടു. ജൂൺ 21-ന് നടക്കുന്ന പരീക്ഷയ്ക്ക് മുന്നോടിയായി ചോദ്യപേപ്പർ ചോർച്ചയുമായി ബന്ധപ്പെട്ട വ്യാജ പ്രചാരണങ്ങളും തട്ടിപ്പുകളും തടയുക എന്ന ലക്ഷ്യത്തോടെയാണ് ഐടി മന്ത്രാലയത്തിന്റെ ഈ അടിയന്തര നടപടി. നിലവിലെ നിർദേശപ്രകാരം ജൂൺ 22 വരെയാണ് ആപ്പിന് പൂർണ്ണ വിലക്കുള്ളത്. ഇതിന് പുറമെ, പഴയ സന്ദേശങ്ങൾ തിരുത്തി വ്യാജ തെളിവുകൾ ഉണ്ടാക്കുന്നത് തടയാൻ ടെലിഗ്രാമിലെ ‘മെസേജ് എഡിറ്റിങ്’ ഫീച്ചർ ജൂൺ 30 വരെ ഇന്ത്യയിൽ റദ്ദാക്കാനും ഐടി മന്ത്രാലയം ആവശ്യപ്പെട്ടിട്ടുണ്ട്. പരീക്ഷകൾക്ക് മുൻപും ശേഷവും വിദ്യാർത്ഥികളെയും രക്ഷിതാക്കളെയും പറ്റിച്ച് പണം തട്ടുന്ന വലിയൊരു മാഫിയ ടെലിഗ്രാം വഴി പ്രവർത്തിക്കുന്നതായി നാഷനൽ ടെസ്റ്റിങ് ഏജൻസി (NTA) കണ്ടെത്തിയിരുന്നു. പരീക്ഷ കഴിഞ്ഞ ശേഷം തങ്ങളുടെ പഴയ പോസ്റ്റുകൾ എഡിറ്റ് ചെയ്ത്, ചോദ്യപേപ്പർ നേരത്തെ കൈവശമുണ്ടായിരുന്നു എന്ന് വരുത്തിത്തീർക്കുകയാണ് ഇവരുടെ തന്ത്രം. ഇത്തരത്തിൽ വ്യാജ ചാനലുകൾ നടത്തി പണം തട്ടിയിരുന്ന ഉത്തരേന്ത്യൻ സൈബർ സംഘങ്ങളെ ആഭ്യന്തര മന്ത്രാലയത്തിന്റെ സൈബർ ക്രൈം വിഭാഗവും പൊലീസും ചേർന്ന് നടത്തിയ അന്വേഷണത്തിൽ പിടികൂടിയിട്ടുണ്ട്. നിലവിൽ ചോദ്യപേപ്പറുകൾ ഒരിടത്തും ചോർന്നിട്ടില്ലെന്നും ഇത്തരം വ്യാജ വാർത്തകളിൽ ആരും വഞ്ചിതരാകരുതെന്നും അധികൃതർ അറിയിച്ചു. പൊതുജനങ്ങൾക്ക് താൽക്കാലികമായി നേരിടുന്ന ബുദ്ധിമുട്ടിൽ എൻടിഎ ഖേദം പ്രകടിപ്പിച്ചെങ്കിലും, പരീക്ഷയുടെ സുരക്ഷിതത്വത്തിനായി ഈ കടുത്ത തീരുമാനം അനിവാര്യമാണെന്ന് വ്യക്തമാക്കി.