ടെസ്റ്റ് ക്രിക്കറ്റിലെ അരങ്ങേറ്റ മത്സരത്തിൽ രണ്ട് അർധസെഞ്ചുറികൾ നേടി വെസ്റ്റിൻഡീസ് താരം കെവിൻ വിക്കം റെക്കോഡ് പട്ടികയിൽ ഇടംപിടിച്ചു. ബംഗ്ലാദേശിനെതിരായ രണ്ടാം ടെസ്റ്റിലാണ് താരം ഈ നേട്ടം സ്വന്തമാക്കിയത്. ആദ്യ ഇന്നിങ്സിൽ 61 റൺസും രണ്ടാം ഇന്നിങ്സിൽ 78 റൺസും നേടിയതോടെയാണ് വിക്കം ശ്രദ്ധേയനായത്.
അരങ്ങേറ്റ ടെസ്റ്റിൽ രണ്ട് അർധസെഞ്ചുറികൾ നേടുന്ന എട്ടാമത്തെ വെസ്റ്റിൻഡീസ് താരമാണ് വിക്കം. 1978ൽ ഓസ്ട്രേലിയക്കെതിരായ അരങ്ങേറ്റ മത്സരത്തിൽ ഈ നേട്ടം കൈവരിച്ച ശിവ്നരെയ്നായിരുന്നു ഇതിന് മുമ്പ് പട്ടികയിലുണ്ടായിരുന്നത്. 48 വർഷത്തെ ഇടവേളയ്ക്ക് ശേഷമാണ് മറ്റൊരു വിൻഡീസ് താരം ഈ നേട്ടം ആവർത്തിക്കുന്നത്. 1930ൽ ഇംഗ്ലണ്ടിനെതിരെ ഫ്രാങ്ക് ഡി കയേഴ്സാണ് ആദ്യമായി ഈ നേട്ടം സ്വന്തമാക്കിയത്.
അതേസമയം, അരങ്ങേറ്റ ടെസ്റ്റിലെ രണ്ട് ഇന്നിങ്സുകളിലും സെഞ്ചുറി നേടിയ ഏക വെസ്റ്റിൻഡീസ് താരം ലോറൻസ് റോവാണ്. 1972ൽ ന്യൂസിലൻഡിനെതിരെ നടന്ന മത്സരത്തിൽ 214, 100 എന്നിങ്ങനെയായിരുന്നു താരത്തിന്റെ സ്കോർ. അരങ്ങേറ്റ ടെസ്റ്റിൽ ഏറ്റവും കൂടുതൽ റൺസ് നേടിയ താരമെന്ന റെക്കോഡും റോവിന്റെ പേരിലാണ്.






