ആഗോള ഡീസൽ ക്ഷാമം ഇന്ത്യൻ എണ്ണശുദ്ധീകരണ കമ്പനികൾക്ക് നേട്ടമാകും

ആഗോള വിപണിയിൽ ഡീസൽ ലഭ്യത കുറഞ്ഞത് ഇന്ത്യൻ എണ്ണശുദ്ധീകരണ കമ്പനികളുടെ ലാഭം വർധിപ്പിക്കുമെന്ന് ഇക്വിറസ് റിസർച്ചിന്റെ റിപ്പോർട്ട്. ചൈനയിൽ നിന്നുള്ള കയറ്റുമതി കുറയുന്നതും പ്രധാന വിപണികളിലെ ഡീസൽ ശേഖരം താഴുന്നതും ഇന്ത്യൻ കമ്പനികൾക്ക് അനുകൂലമാകും. ഡീസലിന്റെ ആഗോള ദൗർലഭ്യം ശുദ്ധീകരണ കമ്പനികളുടെ ലാഭക്ഷമത ഉയർത്തുമെന്നും റിപ്പോർട്ട് വ്യക്തമാക്കുന്നു. 2026 നവംബറിൽ ചൈനയിൽ നിന്നുള്ള ഡീസൽ കയറ്റുമതി 8 ലക്ഷം ടണ്ണിൽ താഴെയാകുമെന്നാണ് വിലയിരുത്തൽ. ഒക്ടോബർ അവസാനത്തോടെ രാജ്യത്തെ വ്യാവസായിക ഡീസൽ ശേഖരം 1.11 കോടി ടണ്ണായി കുറഞ്ഞു. 2011-ൽ കണക്കെടുപ്പ് ആരംഭിച്ചതിനു ശേഷമുള്ള ഏറ്റവും താഴ്ന്ന നിലയാണിത്. അമേരിക്കയിലും ശേഖരം കുറയുന്നതിനാൽ ക്രൂഡ് ഓയിലും ഡീസലും തമ്മിലുള്ള വിലവ്യത്യാസമായ ഡീസൽ ക്രാക്ക് വർധിക്കുന്നത് ഇന്ത്യൻ ശുദ്ധീകരണ കമ്പനികളുടെ വരുമാനത്തിന് ഗുണകരമാകും. അതേസമയം, പൊതുമേഖലാ എണ്ണ ഉത്പാദകരായ ഒ.എൻ.ജി.സി., ഓയിൽ ഇന്ത്യ എന്നിവ വെല്ലുവിളികൾ നേരിടുകയാണ്. വിൻഡ്ഫോൾ ടാക്സ്, എണ്ണ വിപണന കമ്പനികൾക്കുള്ള ഇളവുകൾ, സർക്കാർ ഇടപെടലുകൾ എന്നിവ നിക്ഷേപകരുടെ വിശ്വാസത്തെ ബാധിച്ചിട്ടുണ്ട്. പഴയ എണ്ണപ്പാടങ്ങളിലെ ഉത്പാദനം കുറയുന്നതും പുതിയ പദ്ധതികൾ വൈകുന്നതും ഉത്പാദന വളർച്ചയ്ക്ക് തടസ്സമാകുന്നതായും റിപ്പോർട്ട് ചൂണ്ടിക്കാട്ടുന്നു.
കാസ്റ്റിങ് കൗച്ച് സിനിമയിൽ മാത്രമല്ല, എല്ലാ മേഖലകളിലുമുണ്ട്തുറന്നുപറഞ്ഞ് രമ്യ കൃഷ്ണൻ

സമൂഹത്തിൽ സ്ത്രീകൾ നേരിടുന്ന അതിക്രമങ്ങളെക്കുറിച്ചും സിനിമാ മേഖലയിലെ കാസ്റ്റിങ് കൗച്ചിനെക്കുറിച്ചും തുറന്നുപറഞ്ഞ് നടി രമ്യ കൃഷ്ണൻ. ഇത്തരം അനുഭവങ്ങൾ സിനിമാ ലോകത്ത് മാത്രം ഒതുങ്ങിനിൽക്കുന്നതല്ലെന്നും ലിംഗഭേദമന്യേ വിവിധ മേഖലകളിൽ സംഭവിക്കുന്നുണ്ടെന്നും താരം ചൂണ്ടിക്കാട്ടി. എന്നാൽ ഗ്ലാമറിന്റെ പശ്ചാത്തലമുള്ള തൊഴിൽ മേഖലയായതിനാൽ സിനിമയിലെ ഇത്തരം സംഭവങ്ങൾ കൂടുതൽ ചർച്ചയാകുന്നുവെന്നും അവർ വ്യക്തമാക്കി. ഇത്തരം സംഭവങ്ങൾ അമേരിക്ക പോലുള്ള പുരോഗമനപരമായ രാജ്യങ്ങളിൽ പോലും നടക്കുന്നുണ്ടെന്നതിന് എപ്സ്റ്റീൻ ഫയലുകൾ ഉദാഹരണമാണെന്ന് താരം പറഞ്ഞു. അതുകൊണ്ടുതന്നെ ഇന്ത്യയിൽ ഇത്തരം സംഭവങ്ങൾ നടക്കുന്നില്ലെന്ന് അവകാശപ്പെടാനാകില്ലെന്നും മുൻപും ഉണ്ടായിട്ടുള്ളതും ഇപ്പോഴും തുടരുന്നതും ഭാവിയിലും സംഭവിക്കാവുന്നതുമായ യാഥാർഥ്യമാണിതെന്നും രമ്യ കൃഷ്ണൻ അഭിപ്രായപ്പെട്ടു. നിർബന്ധത്തിന് വഴങ്ങിയാണോ, സ്വന്തം ഇഷ്ടപ്രകാരമാണോ അതോ യാദൃശ്ചികമായാണോ ഇത്തരം അനുഭവങ്ങൾ ഉണ്ടാകുന്നതെന്നത് ഓരോ സാഹചര്യത്തെയും ആശ്രയിച്ചിരിക്കുമെന്നും രമ്യ കൃഷ്ണൻ പറഞ്ഞു. സിനിമാ മേഖലയിലെ സംഭവങ്ങൾ മാത്രം ചർച്ച ചെയ്യപ്പെടുമ്പോൾ മറ്റ് തൊഴിൽ മേഖലകളിൽ സ്ത്രീകൾ നേരിടുന്ന സമാനമായ അനുഭവങ്ങൾ പലപ്പോഴും ശ്രദ്ധിക്കപ്പെടാതെ പോകുന്നുണ്ടെന്നും താരം ചൂണ്ടിക്കാട്ടി.
മലയാളത്തിൽ വരുന്നത് മുഴുവൻ ബിഗ് ബജറ്റ് ചിത്രങ്ങൾകാരണം വ്യക്തമാക്കി ദുൽഖർ സൽമാൻ

തമിഴ്, തെലുങ്ക് സിനിമാ മേഖലകളിൽ അഭിനയിക്കുമ്പോൾ താരപദവിയുടെ അമിതഭാരം അനുഭവപ്പെടാറില്ലെന്ന് നടൻ ദുൽഖർ സൽമാൻ. താൻ അവിടെ ഒരു പരിധിവരെ വിപണിമൂല്യമുള്ള താരമാണെന്നും അദ്ദേഹം പറഞ്ഞു. എന്നാൽ മലയാളത്തിലേക്ക് എത്തുമ്പോൾ വലിയ ബജറ്റിലുള്ള ചിത്രങ്ങളാണ് കൂടുതലായും തന്നെ തേടിയെത്തുന്നത്. ഇതിന് തനിക്കോ സംവിധായകർക്കോ ഉത്തരവാദിത്തമുണ്ടെന്ന് കരുതുന്നില്ലെന്നും ദുൽഖർ വ്യക്തമാക്കി. മലയാള സിനിമയുടെ സ്വപ്നങ്ങളും ലക്ഷ്യങ്ങളും വലുതായതുകൊണ്ടാകാം വലിയ പ്രൊജക്ടുകൾ ലഭിക്കുന്നതെന്നാണ് താരത്തിന്റെ വിലയിരുത്തൽ. ഒടിടിയിലൂടെ മലയാള സിനിമ ഭാഷാ അതിർത്തികൾ മറികടന്നെങ്കിലും പാൻ ഇന്ത്യൻ തലത്തിലുള്ള തിയേറ്റർ ബിസിനസിൽ ഇനിയും വലിയ മുന്നേറ്റം കൈവരിക്കാനുണ്ടെന്നും അദ്ദേഹം ചൂണ്ടിക്കാട്ടി. ഈ ലക്ഷ്യം മുന്നിൽക്കണ്ടുള്ള ശ്രമങ്ങളുടെ ഭാഗമായിരിക്കാം തനിക്ക് ലഭിക്കുന്ന വലിയ ചിത്രങ്ങളെന്നും ദുൽഖർ കൂട്ടിച്ചേർത്തു. മറ്റ് ഭാഷകളിലും സിനിമകൾ ചെയ്യുന്നതിനാൽ അവിടങ്ങളിലെ വിപണിമൂല്യം കൂടി കണക്കിലെടുത്തായിരിക്കാം സംവിധായകർ തന്നെ സമീപിക്കുന്നതെന്നും ‘ആകാശത്തിൽ ഒരു താരകം’ (AOT) എന്ന പുതിയ ചിത്രത്തിന്റെ പ്രചാരണത്തിന്റെ ഭാഗമായി ഗലാട്ട പ്ലസിന് നൽകിയ അഭിമുഖത്തിൽ അദ്ദേഹം പറഞ്ഞു.
മുൻ കാമുകന്മാരുമായി സൗഹൃദത്തിന് പരിധിയുണ്ട്നിലപാട് വ്യക്തമാക്കി ശ്രുതി ഹാസൻ

മുൻ പ്രണയബന്ധങ്ങളെക്കുറിച്ചും ഡേറ്റിങ് അനുഭവങ്ങളെക്കുറിച്ചും തുറന്നുപറഞ്ഞ് നടി ശ്രുതി ഹാസൻ. പ്രണയബന്ധം അവസാനിച്ചാലും പരസ്പര ബഹുമാനത്തോടെ സൗഹൃദം തുടരാമെന്നും അതിന് വ്യക്തമായ അതിർവരമ്പുകൾ വേണമെന്നും താരം പറഞ്ഞു. നടി സുഹാസിനിയുമായുള്ള അഭിമുഖത്തിലായിരുന്നു പ്രതികരണം. മുൻ കാമുകന്മാരിൽ ചിലരെ ഇപ്പോഴും വിളിക്കാറുണ്ടെന്നും അവരിൽ ഒരാളുമായി നല്ല സൗഹൃദം നിലനിൽക്കുന്നുണ്ടെന്നും ശ്രുതി പറഞ്ഞു. ഒരു ബന്ധം വിജയിച്ചില്ലെന്നതുകൊണ്ട് അതിലെ വ്യക്തികൾ മോശക്കാരാകണമെന്നില്ല. എന്നാൽ മുൻ കാമുകന്മാരുമായി വളരെ അടുത്ത സൗഹൃദം സാധ്യമല്ലെന്നും ബെസ്റ്റ് ഫ്രണ്ടാകാൻ കഴിയില്ലെന്നും താരം വ്യക്തമാക്കി. വീണ്ടും ഒരുമിക്കാനാണ് ആഗ്രഹമെങ്കിൽ പഴയ ബന്ധത്തിലേക്ക് മടങ്ങിപ്പോകുന്നതാണ് നല്ലതെന്നും അല്ലാത്തപക്ഷം ആരോഗ്യകരമായ അകലം പാലിക്കണമെന്നും ശ്രുതി അഭിപ്രായപ്പെട്ടു. അധികം ഡേറ്റിങ്ങിന് പോയിട്ടില്ലെന്നും പ്രണയത്തിലായിരുന്നവർക്കൊപ്പം മാത്രമാണ് ഡിന്നറിന് പോയിട്ടുള്ളതെന്നും ഒരാളെ അടുത്തറിയാൻ വേണ്ടി മാത്രമുള്ള ഡേറ്റുകൾക്ക് താൽപര്യമില്ലെന്നും താരം കൂട്ടിച്ചേർത്തു.
പ്രായം കുറഞ്ഞിട്ടും ചേച്ചിയുടെ വേഷംസ്വാസികയെ പ്രശംസിച്ച് ദുൽഖർ

ദുൽഖർ സൽമാനെ നായകനാക്കി പവൻ സാദിനേനി സംവിധാനം ചെയ്യുന്ന ചിത്രമാണ് ‘ആകാശംലോ ഒക താര’. ചിത്രത്തിൽ ദുൽഖറിന്റെ ചേച്ചിയുടെ വേഷത്തിലാണ് നടി സ്വാസിക എത്തുന്നത്. പ്രായത്തിൽ തനിക്കു താഴെയാണെങ്കിലും ചേച്ചിയുടെ കഥാപാത്രം ഏറ്റെടുത്ത സ്വാസികയുടെ തീരുമാനത്തെയും അഭിനയത്തെയും പ്രശംസിച്ചിരിക്കുകയാണ് ദുൽഖർ. സിനിമയിൽ തന്റെ ചേച്ചിയായാണ് സ്വാസിക അഭിനയിക്കുന്നതെന്നും എന്നാൽ യഥാർഥ ജീവിതത്തിൽ തനിക്കാൾ പ്രായം കുറവാണെന്നും ദുൽഖർ പറഞ്ഞു. പ്രായവ്യത്യാസം പരിഗണിക്കാതെ കഥാപാത്രത്തെ ഏറ്റെടുത്തതിന് സ്വാസികയോട് നന്ദിയും താരം അറിയിച്ചു. അവർക്കൊപ്പം ചെലവഴിച്ച ഓരോ ഷൂട്ടിങ് ദിനവും മികച്ച അനുഭവമായിരുന്നെന്നും ദുൽഖർ കൂട്ടിച്ചേർത്തു. സ്വാസികയുടെ അഭിനയം ഏറെ സ്വാഭാവികവും വിശ്വസനീയവുമാണെന്നും അതുകൊണ്ടുതന്നെ താൻ ശരിക്കും അവരുടെ അനിയനാണെന്ന് തോന്നിപ്പോയെന്നും ദുൽഖർ പറഞ്ഞു. അത്രത്തോളം മികച്ച അഭിനേത്രിയാണ് സ്വാസികയെന്നും താരം വാനോളം പുകഴ്ത്തി. ചിത്രത്തിലെ ഇരുവരുടെയും സഹോദര ബന്ധം എങ്ങനെയായിരിക്കുമെന്ന ആകാംക്ഷയിലാണ് ആരാധകർ.
സൂര്യയെ തലയ്ക്കടിക്കാൻ ആദ്യം മടി തോന്നി, ധൈര്യം നൽകി താരംഷൂട്ടിങ് അനുഭവം പങ്കുവെച്ച് നസ്ലിൻ

സൂര്യക്കൊപ്പമുള്ള രസകരമായ ഷൂട്ടിങ് അഭിനയാനുഭവങ്ങൾ പങ്കുവെച്ച് നടൻ നസ്ലിൻ. ബോട്ടിൽ കൊണ്ട് തലയ്ക്കടിക്കുന്ന രംഗം ചിത്രീകരിച്ചപ്പോൾ ആദ്യ ടേക്കുകളിൽ തനിക്ക് മടി തോന്നിയിരുന്നുവെന്നും എന്നാൽ സൂര്യ ധൈര്യം നൽകിയതോടെയാണ് രംഗം പൂർത്തിയാക്കിയതെന്നും നസ്ലെൻ പറഞ്ഞു. ഇരുവരുടെയും ആദ്യ കോമ്പിനേഷൻ രംഗം ഓട്ടോയിലായിരുന്നുവെന്നും താരം ഓർത്തെടുത്തു. സിനിമയ്ക്ക് ലഭിക്കുന്ന മികച്ച പ്രതികരണത്തിൽ സന്തോഷമുണ്ടെങ്കിലും വിജയത്തിനു ശേഷം ജീവിതത്തിൽ വലിയ മാറ്റങ്ങളൊന്നും സംഭവിച്ചിട്ടില്ലെന്ന് നസ്ലിൻ വ്യക്തമാക്കി. താൻ ആഗ്രഹിച്ച കാര്യങ്ങളാണ് ഇപ്പോൾ ജീവിതത്തിൽ നടന്നുകൊണ്ടിരിക്കുന്നതെന്നും താരം കൂട്ടിച്ചേർത്തു. സിനിമകൾ തിരഞ്ഞെടുക്കാൻ പ്രത്യേക പ്ലാനിങ്ങൊന്നും നടത്താറില്ലെന്നും കഥ കേൾക്കുമ്പോൾ താൽപര്യം തോന്നുന്ന ചിത്രങ്ങളാണ് സ്വീകരിക്കാറുള്ളതെന്നും നസ്ലിൻ പറഞ്ഞു. സിനിമയുടെ ആവശ്യത്തിനനുസരിച്ച് പരിശീലനം ഉൾപ്പെടെയുള്ള തയ്യാറെടുപ്പുകൾ നടത്താറുണ്ടെന്നും മികച്ചൊരു സിനിമ രൂപപ്പെടുത്തുന്നതിൽ സംവിധായകർക്കും തിരക്കഥാകൃത്തുക്കൾക്കും നിർണായക പങ്കുണ്ടെന്നും താരം വ്യക്തമാക്കി.
വിവാഹത്തെക്കുറിച്ചുള്ള ചോദ്യത്തിന് സുഹാസിനിയോട് തിരിച്ചുചോദിച്ച് ശ്രുതി ഹാസൻ; താരത്തിന്റെ വാക്കുകൾ വൈറൽ

വിവാഹം, പ്രായം, വ്യക്തിജീവിതം തുടങ്ങിയ വിഷയങ്ങളിൽ നിരന്തരം ഉയരുന്ന ചോദ്യങ്ങൾക്ക് വ്യത്യസ്തമായ മറുപടികളുമായി നടി ശ്രുതി ഹാസൻ. സംവിധായികയും നടിയുമായ സുഹാസിനി മണിരത്നവുമായുള്ള അഭിമുഖത്തിനിടെയാണ് താരത്തിന്റെ രസകരവും ബോൾഡുമായ പ്രതികരണങ്ങൾ ശ്രദ്ധ നേടിയത്. വ്യക്തിപരമായ കാര്യങ്ങളെക്കുറിച്ച് ആവർത്തിച്ച് ചോദിക്കുന്നവർക്കു മുന്നിൽ മടിയില്ലാതെ തന്റെ നിലപാട് വ്യക്തമാക്കുകയായിരുന്നു ശ്രുതി. അഭിമുഖത്തിനിടെ പതിവായി കേൾക്കേണ്ടിവരുന്ന ചോദ്യങ്ങൾക്ക് വായടപ്പിക്കുന്ന മറുപടി നൽകാൻ സുഹാസിനി ആവശ്യപ്പെട്ടു. ‘എപ്പോഴാണ് വിവാഹം കഴിക്കാൻ പോകുന്നത്?’ എന്ന സുഹാസിനിയുടെ ചോദ്യത്തിന്, ‘നിങ്ങൾ എപ്പോഴാണ് വിവാഹമോചനം നേടാൻ പോകുന്നത്?’ എന്നായിരുന്നു ശ്രുതിയുടെ കൗണ്ടർ. പ്രായം എത്രയാണെന്ന ചോദ്യത്തിനും കൃത്യമായ മറുപടി നൽകാതെ ഗൂഗിളിൽ തിരഞ്ഞുനോക്കാൻ തമാശരൂപേണ നിർദേശിച്ചു. താരത്തിന്റെ ഈ മറുപടികൾ അഭിമുഖത്തിൽ ചിരി പടർത്തി. ഇതിനു പുറമെ, ശരീരഭാരത്തെക്കുറിച്ചുള്ള അനാവശ്യ ചോദ്യങ്ങൾക്കും ശ്രുതി മറുപടി നൽകി. ‘എന്തുകൊണ്ടാണ് ഇത്രയും മെലിഞ്ഞിരിക്കുന്നത്, ഭക്ഷണമൊന്നും തരുന്നില്ലേ?’ എന്ന ചോദ്യത്തിന് താൻ ആവശ്യത്തിന് ഭക്ഷണം കഴിക്കാറുണ്ടെന്നും ഫിറ്റ്നസിനാണ് കൂടുതൽ പ്രാധാന്യം നൽകുന്നതെന്നും താരം വ്യക്തമാക്കി. വ്യക്തിജീവിതത്തിലും ശരീരത്തിലും മറ്റുള്ളവർ അനാവശ്യമായി ഇടപെടുന്നതിനെ തമാശയും ആത്മവിശ്വാസവും കലർത്തി നേരിട്ട ശ്രുതിയുടെ പ്രതികരണങ്ങളാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്.
ദുൽഖറിന്റെ വിനയവും അഭിനയമികവിനെയും പ്രശംസിച്ച് അല്ലു അർജുൻ

നടൻ ദുൽഖർ സൽമാന്റെ അഭിനയമികവിനെയും സിനിമാ തെരഞ്ഞെടുപ്പുകളെയും പ്രശംസിച്ച് തെലുങ്ക് സൂപ്പർതാരം അല്ലു അർജുൻ. മലയാളത്തിൽ അരങ്ങേറ്റം കുറിച്ചതു മുതൽ ദുൽഖറിന്റെ കരിയർ വളർച്ച ശ്രദ്ധിച്ചിട്ടുണ്ടെന്നും ഓരോ ഭാഷയിലും മികച്ച സിനിമകൾ സമ്മാനിക്കാൻ അദ്ദേഹത്തിന് സാധിച്ചിട്ടുണ്ടെന്നും അല്ലു അർജുൻ പറഞ്ഞു. മലയാളത്തിൽനിന്ന് തമിഴിലെത്തി മണിരത്നത്തെപ്പോലുള്ള സംവിധായകർക്കൊപ്പം പ്രവർത്തിച്ച ദുൽഖർ പിന്നീട് തെലുങ്കിലും ശ്രദ്ധേയമായ നേട്ടങ്ങൾ കൈവരിച്ചെന്ന് അല്ലു അർജുൻ പറഞ്ഞു. ‘മഹാനടി’, ‘സീതാരാമം’, ‘ലക്കി ഭാസ്കർ’ തുടങ്ങിയ ചിത്രങ്ങളിലൂടെ തെലുങ്ക് പ്രേക്ഷകരുടെ പ്രിയങ്കരനായി മാറിയ ദുൽഖറിന്റെ സിനിമാ തെരഞ്ഞെടുപ്പുകൾ ഏറെ ഇഷ്ടമാണെന്നും അദ്ദേഹം കൂട്ടിച്ചേർത്തു. സൂപ്പർതാരം മമ്മൂട്ടിയുടെ മകനാണെങ്കിലും സ്റ്റാർ കിഡ് എന്നതിന്റെ യാതൊരു പ്രഭാവവും ദുൽഖറിന്റെ പെരുമാറ്റത്തിൽ പ്രകടമല്ലെന്ന് അല്ലു അർജുൻ പറഞ്ഞു. ലളിതവും വിനയപൂർവവുമായ പെരുമാറ്റമാണ് അദ്ദേഹത്തിന്റെ പ്രത്യേകത. ലോക പോലുള്ള ചിത്രത്തിൽ ചെറിയൊരു കാമിയോ വേഷത്തിലും ദുൽഖർ എത്തിയ കാര്യം പരാമർശിച്ച താരം, മലയാളി അഭിനേതാക്കളിൽ തെലുങ്ക് പ്രേക്ഷകർക്ക് ഏറെ പ്രിയപ്പെട്ടവരിൽ ഒരാളാണ് ദുൽഖറെന്നും വ്യക്തമാക്കി.
ഉറ്റ സുഹൃത്തിൽ നിന്ന് ജീവിതപങ്കാളിയിലേക്ക്; ഗൗതവുമായുള്ള പ്രണയകഥ തുറന്നുപറഞ്ഞ് കാജൽ അഗർവാൾ

ബോളിവുഡിലും തെന്നിന്ത്യൻ സിനിമയിലും ഒരുപോലെ തിളങ്ങിയ താരമാണ് കാജൽ അഗർവാൾ. വിവാഹത്തിനും കുടുംബജീവിതത്തിനുമായി സിനിമയിൽ നിന്ന് ചെറിയ ഇടവേളയെടുത്ത താരം ഇപ്പോൾ ശക്തമായ തിരിച്ചുവരവിലാണ്. ഇതിനിടെ ഭർത്താവ് ഗൗതം കിച്ച്ലുവുമായുള്ള പ്രണയകഥ വെളിപ്പെടുത്തിയിരിക്കുകയാണ് കാജൽ. ‘ഹ്യൂമൻസ് ഓഫ് ബോംബെ’ക്ക് നൽകിയ അഭിമുഖത്തിലാണ് താരം മനസുതുറന്നത്. ഒരു സുഹൃത്തിന്റെ വിവാഹച്ചടങ്ങിൽ വെച്ചാണ് ഇരുവരും ആദ്യമായി കണ്ടുമുട്ടിയത്. 13 വർഷം മുമ്പ് തുടങ്ങിയ സൗഹൃദം പിന്നീട് പ്രണയത്തിലേക്ക് വഴിമാറി. എന്നാൽ പിന്നീട് വേർപിരിഞ്ഞെങ്കിലും സുഹൃത്തുക്കളായി തുടർന്നു. ഇതിനിടെ മറ്റുള്ളവരുമായി ഡേറ്റ് ചെയ്തെങ്കിലും തങ്ങൾ തമ്മിലുള്ള ബന്ധത്തിന്റെ പ്രത്യേകത തിരിച്ചറിയുകയായിരുന്നു. കോവിഡ് കാലത്താണ് ഒരുമിച്ച് ജീവിക്കണമെന്ന തീരുമാനത്തിലേക്ക് ഇരുവരും എത്തിയത്. ഇത്തവണ വിവാഹം കഴിക്കുകയോ എന്നെന്നേക്കുമായി പിരിയുകയോ ചെയ്യണമെന്ന നിലപാടാണ് താൻ ഗൗതമിനോട് വ്യക്തമാക്കിയതെന്നും കാജൽ പറഞ്ഞു. 2020 ഒക്ടോബർ 30-ന് മുംബൈയിൽ വെച്ചായിരുന്നു കാജലിന്റെയും ഗൗതമിന്റെയും വിവാഹം. അടുത്ത ബന്ധുക്കൾ മാത്രമാണ് ചടങ്ങിൽ പങ്കെടുത്തത്. 2022 ഏപ്രിലിൽ ദമ്പതികൾക്ക് നീൽ എന്ന മകൻ ജനിച്ചു. ബിസിനസുകാരനായ ഗൗതമിനൊപ്പം കുടുംബജീവിതം ആസ്വദിക്കുന്ന കാജൽ സിനിമയിലും സജീവമാണ്. ‘ക്യൂൻ ഹോ ഗയാ നാ’യിലൂടെ അഭിനയരംഗത്തെത്തിയ താരം ‘തുപ്പാക്കി’, ‘ജില്ല’, ‘വിവേഗം’, ‘മെർസൽ’ തുടങ്ങിയ ചിത്രങ്ങളിലൂടെ തെന്നിന്ത്യയിലും ശ്രദ്ധേയ സാന്നിധ്യമായി.
വിലകുറഞ്ഞ ഡ്രോണുകൾ യുദ്ധതന്ത്രങ്ങൾ മാറ്റുന്നു: സംയുക്ത സൈനിക മേധാവി

കുറഞ്ഞ ചെലവിലുള്ള ഡ്രോണുകളുടെയും ആയുധങ്ങളുടെയും വ്യാപകമായ ഉപയോഗം ആധുനിക യുദ്ധരീതികളെ മാറ്റിമറിക്കുകയാണെന്ന് സംയുക്ത സൈനിക മേധാവി ജനറൽ എൻ.എസ്. രാജ സുബ്രമണി. ന്യൂഡൽഹിയിൽ നടന്ന എഎൻഐ നാഷണൽ സെക്യൂരിറ്റി സമ്മിറ്റിൽ സംസാരിക്കുകയായിരുന്നു അദ്ദേഹം. 3,000 ഡോളർ വിലയുള്ള ഡ്രോണിനെ തകർക്കാൻ 10 ലക്ഷം ഡോളറിന്റെ മിസൈൽ ഉപയോഗിക്കേണ്ടിവരുന്നത് പ്രതിരോധച്ചെലവ് വർധിപ്പിക്കുന്നതായും അദ്ദേഹം ചൂണ്ടിക്കാട്ടി. കുറഞ്ഞ ചെലവിൽ വൻതോതിൽ നിർമ്മിക്കാവുന്ന ആയുധങ്ങൾ വികസിപ്പിക്കേണ്ടത് അനിവാര്യമാണെന്നും അദ്ദേഹം പറഞ്ഞു. എഐ, ഡാറ്റ, നിർണായക ധാതുക്കൾ തുടങ്ങിയ മേഖലകളിലെ നിയന്ത്രണത്തിനായി അമേരിക്കയും ചൈനയും തമ്മിൽ കടുത്ത മത്സരമാണ് നടക്കുന്നത്. സൈനികവും സാമ്പത്തികവുമായ ശക്തി നേടാൻ ഇത്തരം സാങ്കേതികവിദ്യകളിൽ സ്വയംപര്യാപ്തത അനിവാര്യമാണെന്നും അദ്ദേഹം വ്യക്തമാക്കി. ഭാവിയിലെ യുദ്ധങ്ങളിൽ രാജ്യത്തിന്റെ മുഴുവൻ പ്രദേശവും യുദ്ധക്കളമായി മാറാമെന്നും ജനറൽ മുന്നറിയിപ്പ് നൽകി. വ്യവസായങ്ങൾ, ഊർജകേന്ദ്രങ്ങൾ, വാർത്താവിനിമയ ശൃംഖലകൾ, ഡാറ്റാ സെന്ററുകൾ, സാധാരണ ജനങ്ങൾ എന്നിവരെല്ലാം ആക്രമണഭീഷണി നേരിടാൻ സാധ്യതയുണ്ടെന്നും സമ്പൂർണ സുരക്ഷിതത്വം ഇനി ആർക്കും ഉറപ്പാക്കാനാവില്ലെന്നും അദ്ദേഹം പറഞ്ഞു.