അമേരിക്കയുടെ പുതിയ തീരുവ ഭീഷണി
യുഎസ് ഭരണകൂടത്തിന്റെ പുതിയ തീരുവ ഭീഷണിക്ക് പിന്നിലെ രാഷ്ട്രീയവും സാമ്പത്തികവുമായ ഇടപെടലുകൾ ഇന്ത്യൻ വിപണിയെ ആശങ്കയിലാക്കുന്നു. ഇന്ത്യയും അമേരിക്കയും തമ്മിലുള്ള നിർണ്ണായകമായ വ്യാപാരചർച്ചകൾ നടന്നുകൊണ്ടിരിക്കെ തന്നെയാണ് ഇന്ത്യയുടെ മേൽ സമ്മർദ്ദം ചെലുത്തുന്ന തരത്തിലുള്ള ഇത്തരമൊരു നീക്കം ട്രംപ് ഭരണകൂടം നടത്തിയിരിക്കുന്നത്. വ്യാപാരക്കരാറുകൾ സംബന്ധിച്ച ചർച്ചകൾ സമാന്തരമായി നടക്കുന്നുണ്ടെങ്കിലും, അമേരിക്കൻ വ്യാപാര നിയമത്തിലെ 301-ാം വകുപ്പ് പ്രയോഗിച്ച് ഇറക്കുമതി തീരുവ വർദ്ധിപ്പിക്കാനുള്ള തീരുമാനം ഇന്ത്യയെ പ്രതിരോധത്തിലാക്കുന്നതാണ്. യുഎസ് സുപ്രീം കോടതി നേരത്തെ പകരം തീരുവ റദ്ദാക്കിയ സാഹചര്യത്തിൽ, പകരം സംവിധാനങ്ങൾ ഉപയോഗിച്ച് അന്താരാഷ്ട്ര വ്യാപാരത്തിൽ തങ്ങളുടെ മേൽക്കൈ ഉറപ്പിക്കാനാണ് അമേരിക്കൻ നീക്കമെന്ന് വിദഗ്ധർ വിലയിരുത്തുന്നു. നിർബന്ധിത തൊഴിൽ സാഹചര്യങ്ങളെ മുൻനിർത്തി യുഎസ് ട്രേഡ് റെപ്രസെന്റേറ്റീവ് നടത്തിയ അന്വേഷണത്തിന്റെ അടിസ്ഥാനത്തിൽ പ്രഖ്യാപിച്ചിരിക്കുന്ന 12.5% തീരുവ ഉടൻ പ്രാബല്യത്തിൽ വരില്ലെങ്കിലും, ജൂലൈ മാസത്തോടെ ഇതൊരു വലിയ പ്രതിസന്ധിയായി മാറാനാണ് സാധ്യത. ഇന്ത്യ പോലുള്ള രാജ്യങ്ങളുടെ മേൽ ഇത്തരം നിയന്ത്രണങ്ങൾ ഏർപ്പെടുത്തുന്നത് അന്താരാഷ്ട്ര വ്യാപാര ചട്ടങ്ങൾക്ക് വിരുദ്ധമാണെന്നും, തങ്ങൾ എവിടെ നിന്ന് ഉൽപന്നങ്ങൾ ഇറക്കുമതി ചെയ്യണമെന്ന് തീരുമാനിക്കാനുള്ള രാജ്യത്തിന്റെ പരമാധികാരത്തിന്മേലുള്ള പരോക്ഷമായ കൈകടത്തലാണിതെന്നും ശക്തമായ അഭിപ്രായങ്ങൾ ഉയരുന്നുണ്ട്. ഏതായാലും, വരും ദിവസങ്ങളിൽ നടക്കാനിരിക്കുന്ന പബ്ലിക് ഹിയറിംഗും തുടർചർച്ചകളും ഇന്ത്യയുടെ നിലപാടിനെ സംബന്ധിച്ചിടത്തോളം വളരെ നിർണ്ണായകമായിരിക്കും.
’ക്യാമറ ഓഫ് ചെയ്ത് നേരിട്ട് വരാം’; ടിക് ടോക്ക് ലൈവ് തർക്കത്തിനൊടുവിൽ ഷാർജയിൽ ദാരുണ കൊലപാതകം
വെർച്വൽ ലോകത്തെ വെല്ലുവിളികളും അനാവശ്യ ഈഗോയും എത്രത്തോളം ഭയപ്പെടുത്തുന്ന ദുരന്തങ്ങളിലേക്ക് വഴിമാറാം എന്നതിന്റെ ഞെട്ടിക്കുന്ന വാർത്തയാണ് യുഎഇയിൽ നിന്നും പുറത്തുവരുന്നത്. ഷാർജ അൽ നഹ്ദയിൽ വെച്ച് കണ്ണൂർ മാട്ടൂൽ സ്വദേശിയായ ഇസ്മായിൽ പൊന്നാരംഎന്ന മലയാളി യുവാവ് കടുത്ത വാഗ്വാദങ്ങൾക്കൊടുവിൽ അതിക്രൂരമായി കുത്തേറ്റു കൊല്ലപ്പെട്ടു. കഴിഞ്ഞ കുറേ നാളുകളായി സോഷ്യൽ മീഡിയ പ്ലാറ്റ്ഫോമുകളിലൂടെ ഇരുവരും തമ്മിൽ കടുത്ത വ്യക്തിപരമായ തർക്കങ്ങളും സൈബർ പോരുകളും നിലനിന്നിരുന്നു. ഈ പകയുടെ തുടർച്ചയായി കൊലപാതകം നടക്കുന്നതിന് തൊട്ടുമുൻപുള്ള മണിക്കൂറുകളിൽ പോലും ഇവർ ടിക് ടോക്ക് ലൈവിലെത്തുകയും പരസ്പരം അസഭ്യവർഷം നടത്തുകയും വെല്ലുവിളിക്കുകയും ചെയ്തു. ലൈവിനിടയിൽ “ധൈര്യമുണ്ടെങ്കിൽ ടാക്സി വിളിച്ചാണെങ്കിലും വരാൻ” ഇസ്മായിൽ വെല്ലുവിളിച്ചപ്പോൾ, “ഇതാ ക്യാമറ ഓഫ് ചെയ്ത് ഞാൻ നേരിട്ട് വരികയാണ്” എന്നായിരുന്നു പ്രതി നൽകിയ മറുപടി. ഈ വെല്ലുവിളി വെറുമൊരു വാക്കിലൊതുക്കാതെ, കയ്യിൽ മാരകായുധവുമായി പ്രതി ഇസ്മായിൽ താമസിക്കുന്ന സ്ഥലത്തേക്ക് നേരിട്ടെത്തുകയും അദ്ദേഹത്തെ അതിക്രൂരമായി കുത്തിക്കൊല്ലുകയുമായിരുന്നു. വിവരമറിഞ്ഞ് മിനിറ്റുകൾക്കകം സ്ഥലത്തെത്തിയ ഷാർജ പോലീസ് പ്രതിയെ പിടികൂടി. കൂടാതെ സംഭവസമയത്ത് അവിടെയുണ്ടായിരുന്ന മറ്റ് ചില മലയാളികളെയും പോലീസ് നിലവിൽ കസ്റ്റഡിയിലെടുത്തിട്ടുണ്ട്. ഒരു നിമിഷത്തെ ദേഷ്യവും വ്യൂസിനും ലൈക്കുകൾക്കും വേണ്ടിയുള്ള സോഷ്യൽ മീഡിയയിലെ മത്സരബുദ്ധിയും ഒടുവിൽ ഒരു മനുഷ്യജീവനെടുക്കുന്ന അവസ്ഥയിലേക്ക് പ്രവാസലോകത്ത് മാറിയത് വലിയ തോതിലുള്ള ആശങ്കയാണ് ഉണ്ടാക്കുന്നത്. കേസിൽ ഷാർജ പോലീസ് കർശനമായ തുടരന്വേഷണവും ശക്തമായ നിയമനടപടികളും ആരംഭിച്ചിട്ടുണ്ട്.
കെ.എസ്.ആർ.ടി.സി: ആശ്രിത നിയമനങ്ങളിലെ പ്രതിസന്ധികളും പുതിയ പ്രതീക്ഷകളും
കെ.എസ്.ആർ.ടി.സി പോലുള്ള പൊതുമേഖലാ സ്ഥാപനങ്ങളിൽ ജോലിയിലിരിക്കെ ജീവൻ നഷ്ടപ്പെടുന്നവരുടെ കുടുംബങ്ങൾ ദീർഘകാലമായി നേരിടുന്ന വലിയൊരു പ്രതിസന്ധിയാണ് ആശ്രിത നിയമനങ്ങളുടെ നിരോധനം. കുടുംബത്തിന്റെ അത്താണിയായ വ്യക്തി പെട്ടെന്നുണ്ടായ അപകടങ്ങളിലോ അകാലമരണത്തിലോ വിടപറയുമ്പോൾ, ആ കുടുംബം സാമ്പത്തികമായും സാമൂഹികമായും തകർന്നുപോകുന്നു. ഇത്തരത്തിൽ വർഷങ്ങളോളം നീതി നിഷേധിക്കപ്പെട്ട നൂറുകണക്കിന് കുടുംബങ്ങൾക്ക് ആശ്വാസമേകുന്ന തീരുമാനങ്ങൾ ഇപ്പോൾ ഭരണതലത്തിൽ നിന്നും ഉണ്ടായിരിക്കുന്നു എന്നത് വലിയൊരു മാറ്റമാണ്.ദീർഘകാലമായി തുടരുന്ന നിയമന നിരോധനവും, സുശീൽ ഖന്ന റിപ്പോർട്ടിന്റെ മറവിലുള്ള സാമ്പത്തിക നിയന്ത്രണങ്ങളും ആശ്രിത നിയമനങ്ങളെ പൂർണ്ണമായും സ്തംഭനത്തിലാക്കിയിരുന്നു. ജോലിക്കായി മുട്ടാത്ത വാതിലുകളില്ലാത്ത അവസ്ഥയിലായ കുടുംബങ്ങൾക്ക് തുച്ഛമായ വേതനത്തിൽ ലഭിക്കുന്ന താൽക്കാലിക ജോലി എന്നതിലുപരി, സ്ഥിരമായൊരു വരുമാനമാർഗ്ഗം അസാധ്യമായിരുന്നു. നിയമന നിരോധനം നിലവിൽ വന്ന 2016 മുതൽ 2025 വരെയുള്ള കാലയളവിൽ അർഹരായവർക്ക് ആശ്രിത നിയമനം നൽകാൻ സർക്കാർ തീരുമാനിച്ചത് ഈ വലിയ പ്രതിസന്ധിക്ക് അവസാനമിടാൻ സഹായിക്കും.ആദ്യഘട്ടത്തിൽ 439 പേരുടെ പട്ടിക തയ്യാറാക്കി യൂണിറ്റ് ഓഫീസുകളിലേക്ക് പരിശോധനയ്ക്കായി അയച്ചുകഴിഞ്ഞു. ഇതിൽ 150 പേർക്ക് അടിയന്തരമായി നിയമനം നൽകാനാണ് നിലവിലെ തീരുമാനം. പൊതുമേഖലാ സ്ഥാപനങ്ങളിൽ നടപ്പിലാക്കുന്ന പുതിയ നിയമന നയങ്ങൾ പ്രകാരം, പി.എസ്.സി വഴിയുള്ള നിയമനങ്ങളും ആശ്രിത നിയമനങ്ങളും തമ്മിലുള്ള അനുപാതം പാലിക്കേണ്ടതുണ്ട്. ഇത്തരത്തിലുള്ള സാങ്കേതിക തടസ്സങ്ങളും നിയമപരമായ വെല്ലുവിളികളും നിലനിൽക്കുമ്പോൾ തന്നെ, അർഹരായവർക്ക് ബദലി ജീവനക്കാരായി അവസരം നൽകാനുള്ള തീരുമാനം നീതിയിലേക്കുള്ള വലിയൊരു കാൽവെപ്പാണ്.ഈ വിഷയം വെറുമൊരു നിയമനപ്രശ്നം എന്നതിലുപരി, ജീവൻ കൊടുത്തും സ്ഥാപനത്തെയും പൊതുജനങ്ങളെയും സംരക്ഷിക്കുന്ന സാധാരണക്കാരായ ജീവനക്കാരുടെ കുടുംബങ്ങളോട് കാണിക്കേണ്ട ഏറ്റവും കുറഞ്ഞ കടപ്പാട് കൂടിയാണ്. വർഷങ്ങളായി നീതി തേടി അലയുന്നവർക്ക് ഇനി ആശ്വാസത്തോടെ ജീവിക്കാൻ കഴിയട്ടെ എന്ന് പ്രത്യാശിക്കാം.
കടൽവെള്ളം ഇനി കുടിവെള്ളം
വിപ്ലവകരമായ മാറ്റവുമായി സൗരോർജ സാങ്കേതികവിദ്യകുടിവെള്ളക്ഷാമം രൂക്ഷമാകുന്ന ആഗോള സാഹചര്യത്തിൽ, കടൽവെള്ളത്തെ ശുദ്ധജലമാക്കി മാറ്റാൻ പുതിയ വഴികളൊരുക്കി ശാസ്ത്രലോകം. യൂണിവേഴ്സിറ്റി ഓഫ് റോച്ചസ്റ്ററിലെ ഗവേഷകർ വികസിപ്പിച്ചെടുത്ത അത്യാധുനിക സൗരോർജ സാങ്കേതികവിദ്യ, കടലിനെ ആശ്രയിച്ചുള്ള ജലലഭ്യതയിൽ വലിയൊരു മാറ്റത്തിനാണ് തുടക്കമിട്ടിരിക്കുന്നത്. ലേസർ സാങ്കേതികവിദ്യ ഉപയോഗിച്ച് രൂപമാറ്റം വരുത്തിയ മെറ്റൽ പാനലുകളാണ് ഈ സംവിധാനത്തിന്റെ ഹൃദയം. മുൻപ് സോളാർ ഡിസാലിനേഷൻ സംവിധാനങ്ങളിൽ നേരിട്ടിരുന്ന ഉപ്പും ധാതുക്കളും അടിഞ്ഞുകൂടി പാനലുകൾ കേടാകുന്ന പ്രശ്നത്തെ, ‘സൂപ്പർവിക്കിങ്’ പ്രതലങ്ങൾ ഉപയോഗിച്ച് ഈ സാങ്കേതികവിദ്യ പരിസ്ഥിതി സൗഹൃദമായി മറികടക്കുന്നു. പരിസ്ഥിതിക്ക് ദോഷകരമായ ലവണാംശമുള്ള ദ്രാവകം അവശേഷിപ്പിക്കാതെ വെള്ളത്തെ ശുദ്ധീകരിക്കാൻ സാധിക്കുമെന്നതിനൊപ്പം, വേർതിരിച്ചെടുക്കുന്ന ലിഥിയം പോലുള്ള ധാതുക്കൾ ബാറ്ററികളുടെ നിർമ്മാണത്തിനും ഉപയോഗിക്കാം എന്നത് ഈ കണ്ടുപിടുത്തത്തെ കൂടുതൽ സവിശേഷമാക്കുന്നു. ‘ലൈറ്റ്: സയൻസ് ആൻഡ് ആപ്ലിക്കേഷൻസ്’, ‘ജേണൽ ഓഫ് മെറ്റീരിയൽസ് കെമിസ്ട്രി എ’ എന്നീ ശാസ്ത്രജേണലുകളിലാണ് ഈ പഠനം പ്രസിദ്ധീകരിച്ചിരിക്കുന്നത്.
പകൽ ജോലി കഴിഞ്ഞ് രാത്രി ബൈക്ക് ടാക്സി, ഒപ്പം പിഎച്ച്ഡി പഠനവും.
സമയം ഒന്നിനും തികയുന്നില്ല എന്ന് എപ്പോഴും പരാതി പറയുന്നവരാണ് നമ്മളിൽ ഭൂരിഭാഗം പേരും. എന്നാൽ, മനസ്സ് വെച്ചാൽ 24 മണിക്കൂറിനുള്ളിൽ എന്തെല്ലാം കാര്യങ്ങൾ ചെയ്ത് തീർക്കാൻ സാധിക്കുമെന്ന് സ്വന്തം ജീവിതത്തിലൂടെ തെളിയിക്കുകയാണ് ദീപക് പാണ്ഡേ എന്ന യുവാവ്. ഇൻസ്റ്റഗ്രാമിൽ പങ്കുവെച്ച ഒരു വീഡിയോ യിലൂടെയാണ് തൻ്റെ വിസ്മയിപ്പിക്കുന്ന ദിനചര്യയെക്കുറിച്ച് ദീപക് ലോകത്തോട് തുറന്നുപറഞ്ഞത്.ഒരു സാധാരണ 9 to 5 ജോലി, അതിനുശേഷം രാത്രികളിൽ ബൈക്ക് ടാക്സി ഡ്രൈവർ, ഒപ്പം പിഎച്ച്ഡി പഠനവും സ്വന്തമായി പാചകവും വീഡിയോ എഡിറ്റിംഗുമെല്ലാം ചേരുന്നതാണ് ഈ യുവാവിന്റെ ഒരു ദിവസം. കേൾക്കുമ്പോൾ തന്നെ അമ്പരപ്പ് തോന്നുമെങ്കിലും ഇതെല്ലാം ഒന്നിച്ച് കൊണ്ടുപോകാൻ തനിക്ക് സാധിക്കുന്നുണ്ടെന്ന് ദീപക് വ്യക്തമാക്കുന്നു.പകൽ ജോലി കഴിഞ്ഞാൽ ഒന്നിനും ഊർജ്ജമില്ലെന്ന് കരുതി, ജീവിതത്തിൽ വലിയ സന്തോഷമൊന്നുമില്ലാതെ കഴിഞ്ഞിരുന്ന ഒരു ഭൂതകാലം തനിക്കുണ്ടായിരുന്നുവെന്ന് ദീപക് ഓർക്കുന്നു. എന്നാൽ ഇന്ന് അതേ വ്യക്തി തന്നെയാണ് വൈകുന്നേരം 5 മണി മുതൽ രാത്രി 11 മണി വരെ ബൈക്ക് ടാക്സി ഓടിക്കുന്നതും, സ്വന്തമായി ആഹാരം പാകം ചെയ്യുന്നതും, വീഡിയോ എഡിറ്റിംഗും പിഎച്ച്ഡി പഠനവുമെല്ലാം ഒരേസമയം മുന്നോട്ട് കൊണ്ടുപോകുന്നതും. ഇത്രയേറെ കാര്യങ്ങൾ തിരക്കിട്ട് ചെയ്യുമ്പോഴും മുൻപത്തേക്കാൾ താനിന്ന് ഏറെ സന്തോഷവാനാണെന്ന് ഈ യുവാവ് പറയുന്നു.ഈ സന്തോഷത്തിന് പിന്നിലെ രഹസ്യവും ദീപക് പങ്കുവെക്കുന്നുണ്ട്. ജീവിതത്തിൽ ആദ്യമായി തന്റെ യഥാർത്ഥ കഴിവ് എത്രത്തോളമുണ്ടെന്ന് തിരിച്ചറിയാൻ കഴിഞ്ഞതാണ് ആ മാറ്റത്തിന് കാരണം. നാട്ടുകാർ എന്ത് പറയും എന്ന പേടിയും, പുതിയതായി എന്തെങ്കിലും ചെയ്യണമെങ്കിൽ നിലവിലുള്ള ജോലി ഉപേക്ഷിക്കേണ്ടി വരുമോ എന്ന ആശങ്കയും കാരണം പണ്ട് സ്വന്തം കഴിവുകളെ താൻ തന്നെ മൂടിവെക്കുകയായിരുന്നു. എന്നാൽ പതിയെ ആ ചിന്തകളെ മാറ്റിമറിക്കാൻ ദീപക്കിന് സാധിച്ചു.ആദ്യം പിഎച്ച്ഡി പഠനത്തിലേക്ക് കടന്ന ദീപക്, പിന്നീട് ബൈക്ക് ടാക്സി ഓടിക്കാനും അതിനുശേഷം കണ്ടന്റ് ക്രിയേഷനിലേക്കും തിരിഞ്ഞു. ഇന്ന് ഈ തിരക്കുകളെല്ലാം ഒരുമിച്ച് മാനേജ് ചെയ്യാൻ തനിക്ക് മികച്ച രീതിയിൽ സാധിക്കുന്നുണ്ടെന്നും ദീപക് കൂട്ടിച്ചേർക്കുന്നു. സമയം കുറവാണെന്ന് പറഞ്ഞ് മടിച്ചിരിക്കുന്നവർക്ക് മുന്നിൽ, കൃത്യമായ സമയക്രമീകരണവും കഠിനാധ്വാനവും ഉണ്ടെങ്കിൽ ഏത് പ്രതിസന്ധിയും മറികടക്കാമെന്ന് തെളിയിക്കുന്ന ദീപക്കിന്റെ ക വീഡിയോ ഇതിനോടകം തന്നെ സോഷ്യൽ മീഡിയയിൽ വലിയ രീതിയിൽ വൈറലായിക്കഴിഞ്ഞു.
സൈബർ ആക്രമണങ്ങളെ കാശാക്കി മാറ്റിയ ബുദ്ധിശാലി! ആരാണ് യഥാർത്ഥത്തിൽ ഉർഫി ജാവേദ്
കണ്ടുകണ്ണുതള്ളിയ ഫാഷൻ പരീക്ഷണങ്ങൾ കൊണ്ട് സോഷ്യൽ മീഡിയയെ എപ്പോഴും ചൂടുപിടിപ്പിക്കുന്ന പേരാണ് ഉർഫി ജാവേദ്. തുണിക്കു പകരം പത്രക്കടലാസും സേഫ്റ്റി പിന്നും ബ്ലേഡും വരെ വസ്ത്രമാക്കാൻ മടിയില്ലാത്ത ഈ പെൺകുട്ടിയുടെ ഇന്നത്തെ തിളക്കത്തിന് പിന്നിൽ കടുത്ത ദാരിദ്ര്യത്തിന്റെയും അവഗണനകളുടെയും കഠിനമായ കഥയുണ്ട്. ഒരു സാധാരണ ഉത്തർപ്രദേശ് കുടുംബത്തിൽ ജനിച്ച്, അച്ഛന്റെ പീഡനങ്ങൾ സഹിക്കാനാവാതെ കൗമാരപ്രായത്തിൽ തന്നെ വീടുവിട്ടിറങ്ങിയവളാണ് ഉർഫി. കയ്യിൽ കാശില്ലാതെ ഡൽഹിയിലെ കോൾ സെന്ററുകളിൽ പണിയെടുത്തും ട്യൂഷനെടുത്തുമാണ് തുടക്കത്തിൽ ജീവിച്ചത്. പിന്നീട് മുംബൈയിലെ ഗ്ലാമർ ലോകത്തേക്ക് എത്തിയെങ്കിലും ഗോഡ്ഫാദർമാരില്ലാത്തതിനാൽ കടുത്ത വിവേചനങ്ങളാണ് നേരിടേണ്ടി വന്നത്. സീരിയൽ സെറ്റുകളിൽ ചെറിയ വേഷങ്ങൾ ചെയ്തപ്പോൾ ജൂനിയർ ആർട്ടിസ്റ്റുകളോട് കാണിക്കുന്ന മോശം പെരുമാറ്റവും അവഗണനയും അവരെ ഏറെ സങ്കടപ്പെടുത്തി. മാസം വെറും 40,000 രൂപ കിട്ടാൻ വേണ്ടി അവർ അത്രയധികം കഷ്ടപ്പെട്ടിരുന്നു. എന്നാൽ ‘ബിഗ് ബോസ് ഒടിടി’ എന്ന റിയാലിറ്റി ഷോ ഉർഫിയുടെ ജീവിതം മാറ്റിമറിച്ചു. ഷോയിൽ നിന്ന് പെട്ടെന്ന് പുറത്തായെങ്കിലും, ഒരു സാധാരണ ‘മാലിന്യസഞ്ചി’ (garbage bag) കൊണ്ട് അവർ ഡിസൈൻ ചെയ്ത വസ്ത്രം സോഷ്യൽ മീഡിയയിൽ വൻ തരംഗമായി. പിന്നീട് എയർപോർട്ടിൽ വെച്ചുള്ള വിഡിയോകൾ വൈറലായതോടെ കടുത്ത സൈബർ ആക്രമണങ്ങളും ബോഡി ഷെയ്മിങ്ങും ട്രോളുകളുമാണ് ഉർഫിക്ക് നേരിടേണ്ടി വന്നത്.പക്ഷേ, ആ ട്രോളുകളെല്ലാം ഉർഫി സ്വന്തം വിജയത്തിനുള്ള ഇന്ധനമാക്കി മാറ്റി! വിമർശിച്ചവരുടെ വായടപ്പിച്ചുകൊണ്ട് സ്വന്തമായി ഡിഐവൈ (DIY) ഫാഷൻ ഉള്ളടക്കങ്ങൾ നിർമ്മിച്ച് അവർ ഇൻസ്റ്റാഗ്രാമിൽ തരംഗം സൃഷ്ടിച്ചു. ഇന്ന് വൻകിട ബ്രാൻഡുകൾ ലക്ഷങ്ങൾ കൊടുത്ത് ഉർഫിയുടെ ഡേറ്റുകൾക്കായി കാത്തുനിൽക്കുന്നു. പരിഹസിച്ചവർക്ക് മുന്നിൽ സ്വന്തം അധ്വാനം കൊണ്ട് ഒരു വലിയ ഫാഷൻ ഐക്കണായി വളർന്ന ഉർഫി ജാവേദിന്റെ കഥ ഏതൊരു സിനിമയെയും വെല്ലുന്ന ഒന്നാണ്.
വ്ലോഗർമാർ ജാഗ്രതൈ! എയർപോർട്ടിൽ ക്യാമറ ഓണാക്കിയാൽ വിമാനയാത്ര സ്വപ്നമായി മാറും
വിമാനത്താവളങ്ങളിലെ സുരക്ഷാ മേഖലകളിൽ മൊബൈൽ ഫോണും ക്യാമറകളും ഉപയോഗിച്ച് ദൃശ്യങ്ങൾ പകർത്തുന്നതിന് മുൻപുള്ളതിനേക്കാൾ വലിയ വിലക്കാണ് കേന്ദ്ര വ്യോമയാന മന്ത്രാലയം ഇപ്പോൾ കൊണ്ടുവന്നിട്ടുള്ളത്. ടെർമിനലിൽ കയറിയത് മുതൽ വിമാനത്തിൽ കയറുന്നത് വരെയുള്ള യാത്രയുടെ ഓരോ ഘട്ടവും റീൽസായും വ്ലോഗായും മാറ്റുന്നവർ ഇനി കാര്യമായി ശ്രദ്ധിക്കേണ്ടതുണ്ട്. നിയമം ലംഘിച്ച് അനുമതിയില്ലാത്ത ഇടങ്ങളിൽ ചിത്രീകരണം നടത്തിയാൽ കനത്ത പിഴയോടൊപ്പം, ക്യാമറയോ ഫോണോ കണ്ടുകെട്ടാനും സാധ്യതയുണ്ട്. ഇതിനെല്ലാം പുറമേ വ്യോമയാന മന്ത്രാലയത്തിന്റെ കരിമ്പട്ടികയിൽ (No-Fly List) ഉൾപ്പെടുത്തി യാത്ര വിലക്കാനും ഈ പുതിയ വ്യവസ്ഥകൾ അധികൃതർക്ക് അധികാരം നൽകുന്നു. സുരക്ഷാ പരിശോധന നടക്കുന്ന സ്ഥലങ്ങൾ, ഇമിഗ്രേഷൻ കൗണ്ടറുകൾ, ബോർഡിങ് ഗേറ്റുകൾ, റൺവേ തുടങ്ങിയ സെൻസിറ്റീവ് ആയ മേഖലകളിൽ ചിത്രീകരണം കർശനമായി വിലക്കിയിരിക്കുന്നു. ജമ്മു, ശ്രീനഗർ, അമൃത്സർ പോലെയുള്ള സംയുക്ത സൈനിക-സിവിലിയൻ വിമാനത്താവളങ്ങളിൽ ഈ നിയന്ത്രണം കൂടുതൽ ശക്തമാണ്. എയർപോർട്ടിലെ പൊതുയിടങ്ങളിൽ വെച്ച് മറ്റുള്ളവരുടെ സ്വകാര്യതയെയും സുരക്ഷയെയും ബാധിക്കാത്ത രീതിയിൽ മാത്രമേ ഇനി ഫോട്ടോകൾ എടുക്കാൻ സാധിക്കൂ. പ്രൊഫഷണൽ രീതിയിലോ വ്ലോഗിങ്ങിനായോ ദൃശ്യങ്ങൾ പകർത്താൻ ആഗ്രഹിക്കുന്നവർ ഡിജിസിഎയുടെയോ എയർപോർട്ട് അതോറിറ്റിയുടെയോ മുൻകൂട്ടിയുള്ള പ്രത്യേക അനുമതി പത്രം ഉറപ്പാക്കേണ്ടതുണ്ട്.
അതിരു കടന്നു പ്രണയം…പാക് യുവാവ് പിടിയിൽ
ഓൺലൈൻ വഴി തുടങ്ങിയ പ്രണയത്തിനൊടുവിൽ കാമുകിയെ നേരിൽ കാണാൻ അതിർത്തി മറികടന്ന് ഇന്ത്യയിലെത്തിയ പാകിസ്ഥാൻ അധിനിവേശ കാശ്മീർ സ്വദേശി പിടിയിൽ.ജമ്മു കശ്മീരിലെ ഉറി സെക്ടറിലുള്ള യുവതിയെ തേടിയെത്തിയ 22-കാരനായ സീഷാൻ അഹമ്മദ് മീറാണ് ഇന്ത്യൻ അതിർത്തിക്കുള്ളിൽ വെച്ച് സൈന്യത്തിന്റെ പിടിയിലായത്. ഞായറാഴ്ച രാവിലെ ഒൻപതരയോടെ ഉറിയിലെ സിലിക്കോട്ട് മേഖലയിൽ സംശയാസ്പദമായ സാഹചര്യത്തിൽ കണ്ടെത്തിയ ഇയാളെ സൈന്യം കസ്റ്റഡിയിലെടുക്കുകയായിരുന്നു. ചോദ്യം ചെയ്യലിലാണ് അതിർത്തികൾ നിസ്സാരമാക്കിയ ഈ ‘ഓൺലൈൻ പ്രണയകഥ’ പുറത്തുവരുന്നത്. പാക് അധിനിവേശ കശ്മീരിലെ മുസാഫറാബാദ് സ്വദേശിയായ സീഷാന്റെ പക്കൽ നിന്നും പാകിസ്ഥാൻ തിരിച്ചറിയൽ കാർഡും സുരക്ഷാ ഉദ്യോഗസ്ഥർ കണ്ടെടുത്തു. സോഷ്യൽ മീഡിയയിലൂടെ പരിചയപ്പെട്ട ഉറി സ്വദേശിനിയായ ഇറാം ബാനു എന്ന യുവതിയുമായി താൻ കടുത്ത പ്രണയത്തിലാണെന്നും, അവളെ കാണാൻ വേണ്ടിയാണ് നിയന്ത്രണ രേഖ മറികടന്നതെന്നും യുവാവ് സമ്മതിച്ചിട്ടുണ്ട്. ഓൺലൈൻ വഴി പരിചയപ്പെട്ട ഇരുവരും നിരന്തരം സമ്പർക്കം പുലർത്തിയിരുന്നതായി അധികൃതർ വ്യക്തമാക്കുന്നു. നിലവിൽ സീഷാനെയും ഇയാൾ കാണാനെത്തിയ യുവതിയെയും സുരക്ഷാ ഏജൻസികൾ ചോദ്യം ചെയ്തുവരികയാണ്. യുവാവിന്റെ മൊഴികളിലെ സത്യബോധവും അതോടൊപ്പം ഇതിന് പിന്നിൽ മറ്റെന്തെങ്കിലും ലക്ഷ്യങ്ങളുണ്ടോ എന്നും സുരക്ഷാ ഉദ്യോഗസ്ഥർ വിശദമായി പരിശോധിക്കുന്നുണ്ട്.
മിൽമ പാൽ, തൈര് വില വർധന: പുതിയ നിരക്കുകൾ ഇന്ന് മുതൽ പ്രാബല്യത്തിൽ
മിൽമ പാലിനും തൈരിനും ഇന്ന് മുതൽ വില വർധനവ് നിലവിൽ വന്നു. പാൽ ലിറ്ററിന് നാല് രൂപയും തൈര് കിലോഗ്രാമിന് പത്ത് രൂപയുമാണ് വർധിപ്പിച്ചിരിക്കുന്നത്. ഉത്പാദനച്ചെലവ് ക്രമാതീതമായി വർധിച്ച സാഹചര്യത്തിലാണ് ഈ വിലക്കയറ്റം അനിവാര്യമായതെന്ന് മിൽമ നേരത്തെ വ്യക്തമാക്കിയിരുന്നു. ഉപഭോക്താക്കൾ ശ്രദ്ധിക്കേണ്ട കാര്യം എന്തെന്നാൽ പുതിയ പാക്കറ്റുകൾ വിപണിയിൽ എത്തുന്നത് വരെ പഴയ വില രേഖപ്പെടുത്തിയ കവറുകളിലായിരിക്കും പാൽ ലഭ്യമാവുക. നെയ്യ് ഉൾപ്പെടെയുള്ള മറ്റ് മിൽമ ഉൽപ്പന്നങ്ങളുടെ വിലയും വരും ദിവസങ്ങളിൽ ഉയരാൻ സാധ്യതയുണ്ട്.വർധിപ്പിച്ച വിലയുടെ 83.75 ശതമാനവും നേരിട്ട് കർഷകർക്ക് ലഭിക്കുന്ന രീതിയിലാണ് വിതരണം ക്രമീകരിച്ചിരിക്കുന്നത്. ഇതിലൂടെ ലിറ്ററിന് 3.33 രൂപ വീതം കർഷകരുടെ വരുമാനത്തിൽ അധികമായി ലഭിക്കും. ബാക്കി വരുന്ന തുകയിൽ 6.25 ശതമാനം വീതം പാൽ സൊസൈറ്റികൾക്കും വിതരണക്കാർക്കും നൽകും. മിൽമയുടെ പ്രവർത്തനങ്ങൾക്കായി 2.5 ശതമാനം തുക മാറ്റിവെക്കുമ്പോൾ 0.75 ശതമാനം കർഷക ക്ഷേമനിധിയിലേക്കും 0.5 ശതമാനം പ്ലാസ്റ്റിക് മാലിന്യ നിർമാർജന പദ്ധതികൾക്കുമായാണ് വിനിയോഗിക്കുന്നത്. പുതിയ നിരക്കുകൾ പ്രകാരം മഞ്ഞ കവർ പാലിന് 27 രൂപയും, നീല, ഓറഞ്ച് കവർ പാലുകൾക്ക് 30 രൂപ വീതവുമാണ് വില. പച്ച കവർ പാലിന് 32 രൂപയും ഒരു ലിറ്റർ കൗ മിൽക് ബോട്ടിലിന് 75 രൂപയുമാണ് പുതിയ വില. തൈര് ക്ലാസിക് 40 രൂപയ്ക്കും തൈര് എലൈറ്റ് 45 രൂപയ്ക്കുമാണ് ഇനി ലഭിക്കുക. പാചകവാതകത്തിന് പിന്നാലെ പാലിനും തൈരിനും കൂടി വില കൂടിയതോടെ ഹോട്ടൽ ഭക്ഷണത്തിന്റെ ചെലവ് ഇനിയും ഉയരുമെന്ന ആശങ്കയിലാണ് ഹോട്ടലുടമകളും സാധാരണക്കാരും.
വാണിജ്യ സിലിണ്ടര് വില വീണ്ടും കൂട്ടി; ഗാര്ഹിക സിലിണ്ടര് വിലയില് മാറ്റമില്ല
രാജ്യത്ത് പാചകവാതക വില വീണ്ടും വർധിപ്പിച്ചു. വാണിജ്യ ആവശ്യങ്ങൾക്കുള്ള എൽപിജി സിലിണ്ടറിന്റെ വിലയിലാണ് ഇപ്പോൾ വൻ വർധനവുണ്ടായിരിക്കുന്നത്. എന്നാൽ, ഗാർഹിക സിലിണ്ടറുകളുടെ വിലയിൽ നിലവിൽ മാറ്റമില്ലെന്നത് മാത്രമാണ് ആശ്വാസം.പുതുക്കിയ വില ജൂൺ 1 മുതൽ പ്രാബല്യത്തിൽ വന്നു. 19 കിലോഗ്രാം വാണിജ്യസിലിണ്ടറിന് ഡൽഹിയിൽ 42 രൂപയാണ് വർധിപ്പിച്ചത്. ഇതോടെ ഡൽഹിയിൽ സിലിണ്ടറിന് 3113.50 രൂപയായി. അഞ്ച് കിലോഗ്രാം സിലിണ്ടറിന് 11 രൂപയും വർധിപ്പിച്ചു. ഡൽഹിയിൽ വില 821.50 രൂപയും കൊൽക്കത്തയിൽ 19 കിലോ സിലിണ്ടറിന് 50 രൂപയും കൂട്ടി. ഗാർഹിക സിലിണ്ടറുകളുടെ വിലയിൽ നിലവിൽ മാറ്റമില്ലെന്നാണ് റിപ്പോർട്ട്. തുടര്ച്ചയായുണ്ടാകുന്ന ഈ വിലവര്ധനവ് ഹോട്ടല് വ്യവസായത്തെ കടുത്ത അനിശ്ചിതത്വത്തിലേക്കാണ് തള്ളിവിടുന്നത്.പശ്ചിമേഷ്യൻ രാജ്യങ്ങളിലെ രാഷ്ട്രീയ പ്രതിസന്ധിയാണ് പെട്ടെന്നുള്ള ഈ വിലവർധനവിന് കാരണമായി ചൂണ്ടിക്കാണിക്കുന്നത്. മെയ് ആദ്യവാരത്തിലും വാണിജ്യ സിലിണ്ടറുകൾക്ക് 900 രൂപയിലേറെ വർധിപ്പിച്ചിരുന്നു. പൈപ്പ് വഴി പ്രകൃതി വാതകം ലഭിക്കുന്ന പിഎൻജി കണക്ഷനുള്ള വീടുകളിൽ ഇനി മുതൽ എൽപിജി സിലിണ്ടറുകൾ ഉപയോഗിക്കാൻ അനുവാദമില്ല. പിഎൻജി കണക്ഷനുള്ള ഉപഭോക്താക്കൾ തങ്ങളുടെ എൽപിജി സിലിണ്ടറും കണക്ഷനും നിർബന്ധമായും സറണ്ടർ ചെയ്യേണ്ടിവരും. പിഎൻജി സൗകര്യമില്ലാത്ത മറ്റ് പ്രദേശങ്ങളിലേക്ക് താമസം മാറുന്ന സാഹചര്യമുണ്ടായാൽ എൽപിജി കണക്ഷനുകൾ പുനഃസ്ഥാപിച്ചു നൽകും തുടങ്ങിയ നിബന്ധനകൾ ഗ്യാസ് കമ്പനികൾ ഇതിനകം തന്നെ ഉപഭോക്താക്കളെ അറിയിച്ചിട്ടുണ്ട്.