കൗമാരക്കാരായ മക്കൾ സോഷ്യൽ മീഡിയയിൽ സമയം ചെലവഴിക്കുന്നത് എന്തിനൊക്കെയാണെന്ന് അറിയാതെ ആശങ്കപ്പെടുന്ന രക്ഷിതാക്കൾക്ക് ഇനി ആശ്വാസം. കുട്ടികൾ ഇൻസ്റ്റഗ്രാമിൽ തിരയുന്ന പുതിയ താൽപ്പര്യങ്ങൾ ഇനി നേരിട്ട് രക്ഷിതാക്കളെ അറിയിക്കാനൊരുങ്ങുകയാണ് മെറ്റ. കുട്ടികളുടെ സുരക്ഷയുമായി ബന്ധപ്പെട്ട പരാതികൾ വർധിച്ചതോടെയാണ് മെറ്റയുടെ തീരുമാനം.
ഈ പുതിയ ഫീച്ചർ വഴി, കൗമാരക്കാരായ ഉപഭോക്താക്കൾ ഇടപെടുന്ന പൊതുവായ വിഷയങ്ങൾ എന്തെല്ലാമാണെന്ന് മെറ്റ രക്ഷിതാക്കളെ അറിയിക്കും. ഇതിനുപുറമെ, കൗമാരക്കാർ അവരുടെ ആൽഗൊരിതത്തിൽ പുതിയ എന്തെങ്കിലും താൽപ്പര്യം കാണിക്കുന്നുണ്ടെങ്കിൽ ആ വിവരവും താമസിയാതെ രക്ഷിതാക്കളിലേക്ക് എത്തും.
ഇൻസ്റ്റഗ്രാം, ഫേസ്ബുക്ക്, മെസഞ്ചർ എന്നിവയുടെ കൺട്രോൾ ഇനി ഫാമിലി സെന്ററിലൂടെ നിയന്ത്രിക്കാം. ആപ്പുകളിൽ കുട്ടികൾ എത്ര സമയം ചെലവഴിക്കുന്നു എന്നത് സംബന്ധിച്ച കൃത്യമായ വിവരങ്ങളും വരും മാസങ്ങളിൽ ലഭ്യമാകും. ചുരുക്കത്തിൽ, മക്കളുടെ ഡിജിറ്റൽ ലോകത്തെ ഓരോ ചലനവും ഇനി രക്ഷിതാക്കളുടെ വിരൽത്തുമ്പിലുണ്ടാകും.
