റൊണാൾഡോയുടെ അഭാവത്തിൽ പോർച്ചുഗലിന് വൻ തിരിച്ചടി; ഡെന്മാർക്കിനോട് തോൽവി

സൂപ്പർ താരം ക്രിസ്റ്റ്യാനോ റൊണാൾഡോയുടെ അഭാവത്തിൽ കളത്തിലിറങ്ങിയ പോർച്ചുഗലിന് യുവേഫ നേഷൻസ് ലീഗിൽ ഞെട്ടിക്കുന്ന തോൽവി. ഒന്നിനെതിരേ നാല് ഗോളുകൾക്കാണ് ഡെന്മാർക്ക് പോർച്ചുഗലിനെ പരാജയപ്പെടുത്തിയത്. മികച്ച താരനിരയുമായി എത്തിയ പോർച്ചുഗലിനെതിരെ തുടക്കം മുതൽ ആധിപത്യം പുലർത്തിയ ഡെന്മാർക്ക് അർഹിച്ച വിജയം സ്വന്തമാക്കുകയായിരുന്നു. റൊണാൾഡോയ്ക്ക് പകരം ഗോൺസാലോ റാമോസാണ് പോർച്ചുഗലിന്റെ മുന്നേറ്റനിരയെ നയിച്ചത്. ബ്രൂണോ ഫെർണാണ്ടസ്, ജാവോ ഫെലിക്‌സ്, റൂബൻ നെവസ് തുടങ്ങിയ പ്രമുഖ താരങ്ങളും ടീമിലുണ്ടായിരുന്നു. എന്നാൽ ഡെന്മാർക്കിന്റെ മുന്നേറ്റങ്ങൾക്ക് മുന്നിൽ പോർച്ചുഗീസ് പ്രതിരോധം പലപ്പോഴും പതറി. മത്സരത്തിന്റെ 43-ാം മിനിറ്റിൽ ലഭിച്ച പെനാൽറ്റി പിയെരി ഹൊയ്‌ബെർഗ് ലക്ഷ്യത്തിലെത്തിച്ചതോടെ ഡെന്മാർക്ക് ലീഡ് നേടി. ആദ്യ പകുതി അവസാനിക്കുമ്പോൾ ഒരു ഗോളിന് മുന്നിലായിരുന്നു ഡെന്മാർക്ക്. രണ്ടാം പകുതിയിലും പോർച്ചുഗലിന് മത്സരത്തിൽ ആധിപത്യം സ്ഥാപിക്കാനായില്ല. ഒടുവിൽ നാല് ഗോളുകൾ നേടി ഡെന്മാർക്ക് വിജയം ഉറപ്പിച്ചപ്പോൾ പോർച്ചുഗലിന് ആശ്വാസമായത് ഒരു ഗോൾ മാത്രം. റൊണാൾഡോയുടെ അഭാവം ടീമിന്റെ പ്രകടനത്തെ ബാധിച്ചുവെന്ന വിലയിരുത്തലുകൾക്കും ഈ തോൽവി വഴിയൊരുക്കി.

സോഷ്യൽ മീഡിയ ട്രോളുകളും ഗോസിപ്പുകളും വേദനിപ്പിക്കാറുണ്ട്തുറന്നുപറഞ്ഞ് ധനുഷ്

സോഷ്യൽ മീഡിയയിൽ തനിക്കെതിരെ ഉയരുന്ന ട്രോളുകളെയും ഗോസിപ്പുകളെയും കുറിച്ച് മനസുതുറന്ന് നടൻ ധനുഷ്. തന്റെ പുതിയ ചിത്രമായ ‘ഓം’ സിനിമയുടെ പ്രീ-റിലീസ് ചടങ്ങിലായിരുന്നു താരത്തിന്റെ പ്രതികരണം. ജീവിതത്തിലുടനീളം താൻ ഒരു അണ്ടർഡോഗ് ആയിരുന്നുവെന്നും അറിയാത്ത പല വിവാദങ്ങളിലേക്കും തന്നെ വലിച്ചിഴയ്ക്കാറുണ്ടെന്നും ധനുഷ് പറഞ്ഞു. ‘തേരെ ഇഷ്‌ക് മേം’ സിനിമയുടെ പ്രചാരണത്തിനിടെ സ്റ്റൈലിസ്റ്റായ കാവ്യ തന്റെ വസ്ത്രത്തിലെ ചുളിവുകൾ മാറ്റാൻ ശ്രമിച്ച വീഡിയോയുടെ പേരിലും അഹങ്കാരിയെന്ന വിമർശനം നേരിടേണ്ടി വന്നതായി താരം വ്യക്തമാക്കി. പ്രതിസന്ധികളെ അതിജീവിച്ച് ഒരു അണ്ടർഡോഗ് വിജയം നേടുമ്പോഴുള്ള സന്തോഷം മറ്റൊന്നിനും പകരംവയ്ക്കാനാകില്ലെന്നാണ് ധനുഷിന്റെ അഭിപ്രായം. തന്റെ ആരാധകർ കാറ്റിനെപ്പോലും അതിജീവിക്കാൻ കഴിയുന്ന കത്തുന്ന പന്തം പോലെയാണെന്നും അദ്ദേഹം വിശേഷിപ്പിച്ചു. സോഷ്യൽ മീഡിയയിലെ ട്രോളുകളും ഫാൻ വാറുകളും തന്നെ വിഷമിപ്പിക്കാറുണ്ടെന്നും എന്നാൽ ജോലിയിൽ മാത്രം ശ്രദ്ധിച്ച് മുന്നോട്ടുപോകാനാണ് തീരുമാനമെന്നും താരം പറഞ്ഞു. അതേസമയം, തന്റെ സിനിമകളെക്കുറിച്ച് മക്കൾ നൽകുന്ന അഭിപ്രായങ്ങൾ വളരെ കർക്കശമായിരിക്കുമെന്ന് ധനുഷ് വെളിപ്പെടുത്തി. സിനിമ ഇഷ്ടപ്പെട്ടാൽ അഭിനന്ദിക്കുമെങ്കിലും മോശമാണെന്ന് തോന്നിയാൽ ഒട്ടും മയമില്ലാതെയാണ് വിമർശിക്കാറുള്ളത്. അതുകൊണ്ടുതന്നെ പുതിയ ചിത്രങ്ങളെക്കുറിച്ച് മക്കളോട് അഭിപ്രായം ചോദിക്കാൻ പോലും തനിക്ക് ഭയമാണെന്നും താരം തമാശരൂപേണ പറഞ്ഞു.

‘ഭൗമ’യ്ക്ക് രണ്ടാം ഭാഗം വരുന്നുഔദ്യോഗിക പ്രഖ്യാപനവുമായി അണിയറപ്രവർത്തകർ

തിയേറ്ററുകളിൽ മികച്ച പ്രേക്ഷക-നിരൂപക പ്രശംസ നേടി മുന്നേറുന്ന ഗോഥിക് ഹൊറർ മിസ്റ്ററി ത്രില്ലർ ചിത്രം ‘ഭൗമ’യ്ക്ക് രണ്ടാം ഭാഗം ഒരുങ്ങുന്നു. ചിത്രത്തിന്റെ വിജയാഘോഷത്തോടനുബന്ധിച്ച് സംഘടിപ്പിച്ച പ്രസ് മീറ്റിലാണ് അണിയറപ്രവർത്തകർ രണ്ടാം ഭാഗത്തിന്റെ ഔദ്യോഗിക പ്രഖ്യാപനം നടത്തിയത്. ആദ്യ ഭാഗത്തിൽ അവശേഷിച്ച ദുരൂഹതകൾക്ക് തുടർച്ചയായിരിക്കും പുതിയ ചിത്രമെന്ന സൂചനയും അണിയറപ്രവർത്തകർ നൽകി. റെജിൻ എസ്. ബാബു സംവിധാനം ചെയ്ത ചിത്രത്തിൽ ദിലീഷ് പോത്തൻ അവതരിപ്പിച്ച ഈശോ എന്ന പോലീസ് കഥാപാത്രത്തിന് വലിയ സ്വീകാര്യതയാണ് ലഭിച്ചത്. വിനീത്, സാഗർ സൂര്യ, രേവതി ശർമ്മ, ലെന എന്നിവരും ചിത്രത്തിൽ ശ്രദ്ധേയമായ വേഷങ്ങളിലെത്തി. പ്രത്യേകിച്ച് ക്ലൈമാക്സ് രംഗങ്ങളും അതിലൂടെ പുറത്തുവന്ന രഹസ്യങ്ങളും പ്രേക്ഷകർക്കിടയിൽ വലിയ ചർച്ചയായി മാറിയിരുന്നു. ക്രിസ്റ്റോ സേവ്യറിന്റെ സംഗീതവും ശരൺ വേലായുധന്റെ ഛായാഗ്രഹണവും ചിത്രത്തിന്റെ നിഗൂഢമായ അന്തരീക്ഷം കൂടുതൽ മികവുറ്റതാക്കി. ആദ്യ ഭാഗത്തിന് ലഭിച്ച മികച്ച പ്രതികരണമാണ് രണ്ടാം ഭാഗം ഒരുക്കാൻ പ്രചോദനമായതെന്ന് അണിയറപ്രവർത്തകർ വ്യക്തമാക്കി. രണ്ടാം ഭാഗത്തിലെ താരനിർണയവും മറ്റ് വിവരങ്ങളും വൈകാതെ പുറത്തുവിടുമെന്നും അറിയിച്ചു.

ചെറിയ ഉള്ളിക്ക് റെക്കോഡ് വില; കോയമ്പത്തൂരിൽ കിലോയ്ക്ക് 200 രൂപ

കോയമ്പത്തൂർ വിപണിയിൽ ചെറിയ ഉള്ളിയുടെ വില കുതിച്ചുയരുന്നു. മൊത്തവില കിലോയ്ക്ക് 180 രൂപയിലെത്തിയപ്പോൾ ചില്ലറവില 200 രൂപയായി. വിപണിയിലേക്കുള്ള വരവ് കുറഞ്ഞതാണ് വില വർധനയ്ക്ക് കാരണം. ഒരുമാസമായി തുടരുന്ന വിലക്കയറ്റം അടുത്ത ദിവസങ്ങളിലും തുടരുകയാണെങ്കിൽ മൊത്തവില 200 രൂപയിലെത്തുമെന്ന് കോയമ്പത്തൂർ ടി.കെ. മാർക്കറ്റ് പച്ചക്കറി വ്യാപാരിസംഘം പ്രസിഡന്റ് എം. രാജേന്ദ്രൻ പറഞ്ഞു. നിലവിൽ ആലാന്തുറ, പല്ലടം മേഖലകളിലെ വൻകിട കർഷകരുടെ കൈവശം മാത്രമാണ് ചെറിയ ഉള്ളി സ്റ്റോക്കുള്ളത്. തമിഴ്നാട്ടിലെയും കേരളത്തിലെയും വിപണികളിലേക്ക് പ്രധാനമായും ഇവിടെനിന്നാണ് ഉള്ളി എത്തിക്കുന്നത്. ഡിസംബർ പകുതിയോടെ അടുത്ത വിളവെടുപ്പ് ആരംഭിക്കുന്നതുവരെ വില കുറയാൻ സാധ്യതയില്ലെന്നാണ് വ്യാപാരികളുടെ വിലയിരുത്തൽ. സവാളയുടെയും വെളുത്തുള്ളിയുടെയും വിലയിലും വർധനയുണ്ട്. സവാളയുടെ മൊത്തവില കിലോയ്ക്ക് 60 രൂപയായി. മഹാരാഷ്ട്രയിൽനിന്ന് ഒരാഴ്ചയ്ക്കകം പുതിയ സവാള എത്തുന്നതോടെ വില 40 രൂപയായി കുറയുമെന്നാണ് പ്രതീക്ഷ. അതേസമയം, ഒന്നാംതരം വെളുത്തുള്ളിയുടെ മൊത്തവില കിലോയ്ക്ക് 300 രൂപയിലെത്തി.

ടൊവിനോയുടെ വിക്ടറിന് കൈയടി; ‘സീൻ’ വിജയത്തിൽ ഹൃദയം നിറഞ്ഞ കുറിപ്പുമായി സൂര്യ

‘സീൻ’ സിനിമയുടെ വിജയത്തിന് പിന്നാലെ സോഷ്യൽ മീഡിയയിൽ ഹൃദയസ്പർശിയായ കുറിപ്പുമായി നടൻ സൂര്യ. ചിത്രത്തിൽ വിക്ടർ എന്ന കഥാപാത്രമായി കാമിയോ വേഷത്തിലെത്തിയ ടൊവിനോ തോമസിനോടുള്ള നന്ദി അറിയിച്ചുകൊണ്ടാണ് താരം കുറിപ്പ് പങ്കുവെച്ചത്. മലയാള സിനിമയോടുള്ള സ്നേഹവും ചിത്രത്തിന്റെ ഭാഗമായ എല്ലാവരോടുമുള്ള കടപ്പാടും സൂര്യ കുറിപ്പിൽ പ്രകടിപ്പിച്ചു. അങ്ങേയറ്റം സ്നേഹത്തോടെയും വലിയ മനസ്സോടെയുമാണ് ടൊവിനോ ചിത്രത്തിന്റെ ഭാഗമായതെന്നും വിക്ടർ എന്ന കഥാപാത്രത്തെ അവതരിപ്പിച്ചതിന് എത്ര നന്ദി പറഞ്ഞാലും മതിയാകില്ലെന്നും സൂര്യ കുറിച്ചു. മലയാള സിനിമയിലെ പ്രിയപ്പെട്ട സഹതാരങ്ങൾക്കും സാങ്കേതിക പ്രവർത്തകർക്കും മറ്റ് അണിയറപ്രവർത്തകർക്കും ചിത്രത്തിന്റെ യാത്രയിൽ ഒപ്പം നിന്ന എല്ലാവർക്കും താരം നന്ദി അറിയിച്ചു. മലയാള സിനിമയ്ക്കുള്ള തങ്ങളുടെ ചെറിയൊരു പ്രണയലേഖനമാണ് ‘സീൻ’ എന്നും സൂര്യ കൂട്ടിച്ചേർത്തു. കുറിപ്പിനൊപ്പം ടൊവിനോ അവതരിപ്പിച്ച വിക്ടർ എന്ന കഥാപാത്രത്തിന്റെ ചെറിയ ടീസർ വീഡിയോയും സൂര്യ പങ്കുവെച്ചിട്ടുണ്ട്. ചിത്രത്തിലെ ടൊവിനോയുടെ സാന്നിധ്യത്തിനും സൂര്യയുടെ കുറിപ്പിനും സോഷ്യൽ മീഡിയയിൽ ശ്രദ്ധ ലഭിക്കുകയാണ്.

മെസ്സിയില്ലാതെ ആദ്യ മത്സരം; അർജന്റീനയെ വീഴ്ത്തി യുറഗ്വായ്

ലയണൽ മെസ്സി ദേശീയ ടീമിൽനിന്ന് വിരമിച്ചതിന് ശേഷമുള്ള ആദ്യ മത്സരത്തിൽ അർജന്റീനയ്ക്ക് തോൽവി. സൗഹൃദമത്സരത്തിൽ ഒന്നിനെതിരേ രണ്ട് ഗോളുകൾക്കാണ് യുറഗ്വായ് അർജന്റീനയെ കീഴടക്കിയത്. പന്തടക്കത്തിലും ആക്രമണങ്ങളിലും അർജന്റീന മുന്നിട്ടുനിന്നെങ്കിലും അവസരങ്ങൾ ഗോളാക്കി മാറ്റാനായില്ല. നിക്കോ പാസ്, ഹൂലിയൻ അൽവാരസ്, തിയാഗോ അൽമാഡ എന്നിവർ നയിച്ച മുന്നേറ്റങ്ങൾ ആദ്യപകുതിയിൽ ഫലം കണ്ടില്ല. ഇരുടീമുകളും ഗോൾ നേടാതെ ആദ്യ പകുതി അവസാനിച്ചു. രണ്ടാം പകുതി തുടങ്ങി മൂന്നാം മിനിറ്റിൽ തന്നെ യുറഗ്വായ് ലീഡ് നേടി. ഫ്രീകിക്ക് പ്രതിരോധിക്കുന്നതിനിടെ അർജന്റീന താരം ലിയനാർഡോ ബലേർഡിയുടെ ദേഹത്ത് തട്ടി പന്ത് സ്വന്തം വലയിലെത്തുകയായിരുന്നു. 53-ാം മിനിറ്റിൽ കോർണറിൽനിന്ന് ലഭിച്ച അവസരം ഹെഡറിലൂടെ വലയിലെത്തിച്ച് മാക്‌സി അരാഹോ യുറഗ്വായുടെ ലീഡ് രണ്ടാക്കി ഉയർത്തി. രണ്ട് ഗോളിന് പിന്നിലായ അർജന്റീന 73-ാം മിനിറ്റിൽ തിരിച്ചടിച്ചു. ഹൂലിയൻ അൽവാരസാണ് ടീമിനായി ആശ്വാസഗോൾ നേടിയത്. ശേഷിച്ച സമയത്ത് സമനില ഗോളിനായി അർജന്റീന ശക്തമായ നീക്കങ്ങൾ നടത്തിയെങ്കിലും യുറഗ്വായ് പ്രതിരോധം മറികടക്കാനായില്ല. പന്തടക്കത്തിലും ഷോട്ടുകളിലും മുന്നിട്ടുനിന്നിട്ടും ഫിനിഷിങ്ങിലെ പിഴവുകൾ അർജന്റീനയ്ക്ക് തിരിച്ചടിയായി. ഒടുവിൽ വിജയം യുറഗ്വായ് സ്വന്തമാക്കി.

അഭിരാം കൊലക്കേസ്: തൊണ്ടിമുതലുകൾ കണ്ടെത്താനാകാതെ പോലീസ്; പ്രതികളുടെ മൊഴികളിൽ വൈരുധ്യം

പാങ്ങപ്പാറ അഭിരാം കൊലപാതകക്കേസിൽ നിർണായക തെളിവുകൾ കണ്ടെത്താനാകാതെ അന്വേഷണസംഘം. കൊലപാതകം നടന്ന് രണ്ടാഴ്ച പിന്നിട്ടിട്ടും ആയുധങ്ങളോ മറ്റ് തൊണ്ടിമുതലുകളോ കണ്ടെത്താനായിട്ടില്ല. അഭിരാം ധരിച്ചിരുന്ന വസ്ത്രങ്ങൾ, കൊലപാതകത്തിന് ഉപയോഗിച്ച ബെൽറ്റ്, അഭിരാമിന്റെയും സുഹൃത്ത് ആനന്ദിന്റെയും മൊബൈൽ ഫോണുകൾ എന്നിവയാണ് കണ്ടെത്താനുള്ളത്. തെളിവുകൾ നശിപ്പിക്കാൻ പ്രതികൾ ശ്രമിച്ചതായാണ് പോലീസിന്റെ സംശയം. തൊണ്ടിമുതലുകൾ സമീപത്തെ തോട്ടിൽ ഉപേക്ഷിച്ചെന്നായിരുന്നു 17-കാരനായ ഒന്നാം പ്രതിയുടെ മൊഴി. എന്നാൽ ഇവ കുറ്റിക്കാട്ടിലേക്കാണ് വലിച്ചെറിഞ്ഞതെന്ന് മറ്റൊരു പ്രതിയായ ഉമർ മൊഴി നൽകി. ഇതിന്റെ അടിസ്ഥാനത്തിൽ കാടുമൂടിയ പ്രദേശങ്ങളിലും തെറ്റിയാർ തോട്ടിലും സ്കൂബ ഡൈവിങ് സംഘത്തിന്റെ സഹായത്തോടെ മണിക്കൂറുകളോളം തിരച്ചിൽ നടത്തിയെങ്കിലും ഒന്നും കണ്ടെത്താനായില്ല. തെളിവുകൾ മറ്റെവിടെയെങ്കിലും കൊണ്ടുപോയി നശിപ്പിച്ചിരിക്കാമെന്നാണ് പോലീസിന്റെ നിഗമനം. അന്വേഷണത്തിന്റെ തുടക്കം മുതൽ നാല് പ്രതികളും പരസ്പരവിരുദ്ധമായ മൊഴികളാണ് നൽകുന്നത്. ഇതോടെ കേസിലെ തെളിവുകൾ കണ്ടെത്തുന്നത് അന്വേഷണസംഘത്തിന് വെല്ലുവിളിയായിരിക്കുകയാണ്. പ്രതികളെ വീണ്ടും കസ്റ്റഡിയിൽ വാങ്ങി ഒരുമിച്ചിരുത്തി ചോദ്യം ചെയ്യാനാണ് പോലീസിന്റെ നീക്കം. ഇതിനായി ഉടൻ കോടതിയിൽ അപേക്ഷ നൽകും.

കിഫ്ബിക്ക് ആറുമാസത്തിനിടെ 997 കോടി രൂപയുടെ നഷ്ടം

കിഫ്ബിയുടെ സാമ്പത്തികനിലയിൽ ആശങ്കയുയർത്തി തുടർച്ചയായ നഷ്ടം. ഈ സാമ്പത്തികവർഷം സെപ്റ്റംബറിൽ അവസാനിച്ച രണ്ടാം പാദത്തിൽ 483.3 കോടി രൂപയാണ് നഷ്ടം. ആദ്യ രണ്ട് പാദങ്ങളിലുമായി നഷ്ടം 997.19 കോടി രൂപയായി. കിഫ്ബി ഡയറക്ടർ ബോർഡ് അംഗീകരിച്ച ഓഡിറ്റ് ചെയ്യാത്ത കണക്കുകളാണിത്. വരുമാനം ലഭിക്കാത്ത അടിസ്ഥാനസൗകര്യ പദ്ധതികളിലെ നിക്ഷേപവും ഉയർന്ന പലിശബാധ്യതയുമാണ് നഷ്ടത്തിന് പ്രധാന കാരണങ്ങൾ. കിഫ്ബി 8,600 കോടിയിലേറെ രൂപ വായ്പയെടുത്തിട്ടുണ്ട്. ഇതിന് 8.4 മുതൽ 9.67 ശതമാനം വരെയാണ് പലിശ. വായ്പ തിരിച്ചടയ്ക്കാനും പലിശ നൽകാനും കിഫ്ബിയുടെ സ്വന്തം വരുമാനം മതിയാകുന്നില്ലെന്നാണ് കണക്കുകൾ സൂചിപ്പിക്കുന്നത്. ആറുമാസത്തിനിടെ സർക്കാർ 2,790.86 കോടി രൂപ നൽകിയെങ്കിലും കിഫ്ബി നിയമപ്രകാരം ഇത് വരുമാനമായല്ല, മൂലധനമായാണ് കണക്കാക്കുന്നത്. അതിനാൽ ലാഭനഷ്ട കണക്കിൽ ഈ തുക ഉൾപ്പെടില്ല. കഴിഞ്ഞ സർക്കാരിന്റെ അവസാനകാലത്ത് നടപ്പാക്കിയ ‘സി.എം. വിത്ത് മി’ പദ്ധതിയുമായി ബന്ധപ്പെട്ട അടിസ്ഥാനസൗകര്യ വികസനത്തിന് കിഫ്ബി 338.99 കോടി രൂപ ചെലവിട്ടിട്ടുണ്ട്. കൂടാതെ, വായ്പ തിരിച്ചടവ് മുടങ്ങിയതിനെ തുടർന്ന് കെ.എസ്.എഫ്.ഡി.സി.യുടെ കീഴിലുള്ള അഞ്ച് പദ്ധതികൾക്കായി നൽകിയ വായ്പ എൻ.പി.എ. ആയി കണക്കാക്കിയതും രണ്ടാം പാദത്തിലെ നഷ്ടം വർധിപ്പിച്ചു.

ആശയവിനിമയ തകരാർ; അമേരിക്കയിൽ വിമാന സർവീസുകൾ നിർത്തിവെച്ചു

എയർ ട്രാഫിക് കൺട്രോൾ സംവിധാനത്തിലെ തകരാറിനെ തുടർന്ന് അമേരിക്കയിൽ വെള്ളിയാഴ്ച ഉച്ചയ്ക്ക് ശേഷമുള്ള വിമാന സർവീസുകൾ ഫെഡറൽ ഏവിയേഷൻ അഡ്മിനിസ്‌ട്രേഷൻ (എഫ്.എ.എ.) താത്കാലികമായി നിർത്തിവെച്ചു. യാത്രക്കാരുടെ സുരക്ഷ മുൻനിർത്തിയാണ് നടപടി. രാജ്യത്തെ 22 റീജിയണൽ എയർ ട്രാഫിക് കൺട്രോൾ സെന്ററുകളെയും തകരാർ ബാധിച്ചതായി ഗതാഗത സെക്രട്ടറി ഷോൺ ഡഫി അറിയിച്ചു. സംഭവത്തിൽ സാങ്കേതിക വിദഗ്ധർ അന്വേഷണം നടത്തിവരികയാണ്. പഴയ എയർ ട്രാഫിക് കൺട്രോൾ സംവിധാനങ്ങൾ നവീകരിക്കാൻ കഴിഞ്ഞ വർഷം 12.5 ബില്യൺ ഡോളർ അനുവദിച്ചിരുന്നു. പദ്ധതി പൂർത്തിയാക്കാൻ 30 ബില്യൺ ഡോളർ കൂടി ആവശ്യമാണെന്നും ഇതിനായി വൈറ്റ് ഹൗസ് കോൺഗ്രസിനെ സമീപിച്ചിട്ടുണ്ടെന്നും അദ്ദേഹം വ്യക്തമാക്കി.

ശബരിമല തീർഥാടകർക്ക് രണ്ട് ലക്ഷം രൂപയുടെ ഇൻഷുറൻസ് പരിരക്ഷ

ശബരിമല തീർഥാടകർക്ക് എൽ.ഐ.സിയുമായി സഹകരിച്ച് ഇൻഷുറൻസ് പരിരക്ഷ ഏർപ്പെടുത്താൻ തിരുവിതാംകൂർ ദേവസ്വം ബോർഡ് തീരുമാനിച്ചു. തീർഥാടനത്തിനിടെ മരണം സംഭവിച്ചാൽ രണ്ട് ലക്ഷം രൂപ നഷ്ടപരിഹാരം ലഭിക്കും. വെർച്വൽ ക്യൂ, സ്പോട്ട് ബുക്കിങ് സംവിധാനങ്ങളിലൂടെ ദർശനത്തിനെത്തുന്ന എല്ലാവർക്കും പരിരക്ഷ ലഭിക്കുമെന്ന് ബോർഡ് പ്രസിഡന്റ് കെ. ജയകുമാർ അറിയിച്ചു. തീർഥാടകരിൽനിന്ന് ഇൻഷുറൻസ് തുകയൊന്നും ഈടാക്കില്ല. പദ്ധതിക്കായി ഒന്നരക്കോടി രൂപയാണ് ദേവസ്വം ബോർഡ് പ്രീമിയമായി അടയ്ക്കുന്നത്. സന്നിധാനത്ത് എത്തുന്നതിന്റെ തലേദിവസം മുതൽ മൂന്ന് ദിവസത്തേക്കാണ് ഇൻഷുറൻസ് പരിരക്ഷ ലഭിക്കുക. എന്നാൽ തലേദിവസം സംഭവിക്കുന്ന അപകടമരണങ്ങൾക്ക് മാത്രമായിരിക്കും പരിരക്ഷ. സന്നിധാനത്ത് എത്തുന്ന ദിവസവും തുടർന്നുള്ള ദിവസവും ഹൃദയാഘാതം ഉൾപ്പെടെയുള്ള സ്വാഭാവിക മരണങ്ങൾക്കും അപകടമരണങ്ങൾക്കും ഇൻഷുറൻസ് ലഭിക്കും. തീർഥാടകർക്ക് ഇൻഷുറൻസ് സംബന്ധമായ സഹായങ്ങൾ ലഭ്യമാക്കുന്നതിനായി പമ്പയിൽ ഹെൽപ്പ് ഡെസ്‌ക് ആരംഭിക്കുന്നതും ദേവസ്വം ബോർഡിന്റെ പരിഗണനയിലുണ്ട്.