ആധാർ കാർഡിലെ ജനനത്തീയതി തിരുത്തുന്നതിനുള്ള മാനദണ്ഡങ്ങളിൽ വ്യക്തതയില്ലാത്തത് അപേക്ഷകരെ പ്രതിസന്ധിയിലാക്കുന്നു. ആവശ്യമായ രേഖകൾ സമർപ്പിച്ചിട്ടും അപേക്ഷ നിരസിക്കപ്പെടാനുള്ള സാധ്യതയും, രേഖകൾ തെറ്റാണെന്ന് കണ്ടെത്തിയാൽ സേവനകേന്ദ്രങ്ങൾക്ക് പിഴ ചുമത്തുമെന്ന വ്യവസ്ഥയും കാരണം പല ആധാർ സേവനകേന്ദ്രങ്ങളും ജനനത്തീയതി തിരുത്തൽ അപേക്ഷകൾ സ്വീകരിക്കാൻ മടിക്കുകയാണ്. ഇതോടെ ആധാറിൽ തെറ്റായി രേഖപ്പെടുത്തിയ ജനനത്തീയതി തിരുത്തുന്നത് പലർക്കും ഏറെ ബുദ്ധിമുട്ടായി മാറിയിരിക്കുകയാണ്.
പുതിയ ആധാർ എടുക്കുന്നതിനും നിലവിലുള്ള ആധാറിലെ വിവരങ്ങൾ തിരുത്തുന്നതിനുമായി സമർപ്പിക്കാവുന്ന രേഖകളുടെ പട്ടികയിൽ നിന്ന് യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യു.ഐ.ഡി.എ.ഐ.) കഴിഞ്ഞ ഡിസംബറിൽ നിരവധി രേഖകൾ ഒഴിവാക്കിയിരുന്നു. വ്യാജരേഖകൾ ഉപയോഗിച്ച് ആധാർ വിവരങ്ങളിൽ മാറ്റം വരുത്തുന്നത് തടയുക എന്ന ലക്ഷ്യത്തോടെയായിരുന്നു നടപടി. എന്നാൽ ഇതിന് പിന്നാലെയാണ് ജനനത്തീയതി തിരുത്തൽ കൂടുതൽ സങ്കീർണമാകുന്നതായി പരാതികൾ ഉയർന്നത്.
നിലവിൽ ജനനസർട്ടിഫിക്കറ്റ് പോലുള്ള ആധികാരിക രേഖ സമർപ്പിക്കുന്ന അപേക്ഷകളിലാണ് ആധാറിലെ ജനനത്തീയതി തിരുത്താൻ പ്രധാനമായും അവസരം ലഭിക്കുന്നത്. ഫോട്ടോ പതിച്ചതും ബാർകോഡ് ഉൾപ്പെടുന്നതുമായ എസ്.എസ്.എൽ.സി. ബുക്ക്, പാസ്പോർട്ട് തുടങ്ങിയവ അംഗീകൃത രേഖകളായി പരിഗണിക്കപ്പെടുന്നുണ്ടെങ്കിലും ഇവ ഉപയോഗിച്ചുള്ള അപേക്ഷകൾ പലപ്പോഴും നിരസിക്കപ്പെടുന്നതായും പരാതിയുണ്ട്.
ജനനത്തീയതി തിരുത്തുന്നതിനുള്ള രേഖകളുടെ പട്ടികയിൽ നിന്ന് സ്കൂൾ സർട്ടിഫിക്കറ്റുകൾ നേരത്തേതന്നെ ഒഴിവാക്കിയിരുന്നു. ഇതോടെ എസ്.എസ്.എൽ.സി. ബുക്ക് കൈവശമില്ലാത്ത പ്രായമായവരുടെ ആധാർ വിവരങ്ങളിലെ ജനനത്തീയതി തിരുത്തലും കൂടുതൽ പ്രയാസകരമായി.
ആധാർ എടുക്കുന്നതിനും വിവരങ്ങൾ പുതുക്കുന്നതിനും ഉപയോഗിക്കാവുന്ന രേഖകളിൽ നിന്ന് പാൻ കാർഡ്, സ്കൂൾ വിടുതൽ സർട്ടിഫിക്കറ്റ്, സ്കൂൾ ട്രാൻസ്ഫർ സർട്ടിഫിക്കറ്റ്, ഭിന്നശേഷി സർട്ടിഫിക്കറ്റ്, സർക്കാർ വകുപ്പുകൾ നൽകുന്ന ഫോട്ടോ പതിച്ച തിരിച്ചറിയൽ കാർഡ്, കേന്ദ്ര-സംസ്ഥാന സർക്കാരുകൾ നൽകുന്ന കുടുംബാവകാശ രേഖ, പൊതുമേഖലാ ബാങ്കുകൾ നൽകുന്ന ഫോട്ടോ പതിച്ച പാസ്ബുക്ക് തുടങ്ങിയവയും നേരത്തെ ഒഴിവാക്കിയിരുന്നു.
രേഖകൾ സംബന്ധിച്ച മാനദണ്ഡങ്ങളിൽ വ്യക്തത വരുത്തുകയും അംഗീകരിക്കാവുന്ന രേഖകളുടെ കാര്യത്തിൽ ഏകീകൃത സമീപനം ഉറപ്പാക്കുകയും ചെയ്താൽ മാത്രമേ ആധാറിലെ തെറ്റായ ജനനത്തീയതി തിരുത്തുന്നതിനുള്ള പ്രതിസന്ധിക്ക് പരിഹാരമാകൂ എന്നാണ് അപേക്ഷകരുടെ ആവശ്യം.
